تۇڭعىش پرەزيدەنتتىڭ تۇڭعىش قىزى، سەناتتىڭ سپيكەرى، داريعا نازارباەۆا تۋرالى تاعى دا ءبىر  ەكى اۋىز ءسوز جازباقپىز، بۇگىن.

كەشەلى-بەرى الەۋمەتتىك جەلىنى داريعا نۇرسۇلتانقىزىنىڭ اتىنان اشىلعان «تۆيتتەر» پاراقشاسىنىڭ شاتا ءتىلدى، شالا ساۋاتتى شيماي-شاتپاقتارى شارلاپ ءجۇر.

جەتىمدەردى سۇرەڭسىزگە تەڭەگەن، قىرعىزداردى ۇسقىنسىز قۇبىجىققا بالاعان، بوق اۋىزدى، بادىك ءتىلدى @dariga_senate دەيتىن اككاۋنتتىڭ جازبالارى تۋرالى ايتىپ وتىرمىز.

اككاۋنت «داريگا نازارباەۆا» دەگەن اتپەن تىركەلگەن. تىركەلگەن ۋاقىتى: 2019 جىلدىڭ اقپان ايى. 356 وقىرمانى، 9 جازباسى بار ەكەن تاعى.

وسى اككاۋنت كەشە عانا ءبىر پوست جاريالاپتى. سوندا ءبۇي دەپتى: «پريدۋمالا سەبە نوۆىي تيتۋل، يا بۋدۋ – ەلاناسى!».

بوتەن تىلدەگى بۇل جازبانىڭ قازاقشا قوتارماسى بىلاي بولادى: «مەن وزىمە جاڭا اتاق ويلاپ تاپتىم. ەندى مەن – ەل اناسى بولامىن!».

«ەل اكەسىنىڭ» تۇڭعىشى ەندى «ەل اناسى» بولماق پا دەپ، داۋرىققان جۇرت الەۋمەتتىك جەلىدە اجەپتاۋىر تالقى جاساپتى. د.ن-ءىڭ اتىنا قاراتا نەشە ءتۇرلى سىني سوزدەر ايتىلىپتى.

وسىنى كورگەن ءبىز، 30 جىل ەل باسقارعان اكەسىنىڭ ءوزى ءوز-وزىنە اتاق بەرۋگە ارلانعان ادام ەدى، ءبىرىنشى قىزدىڭ بۇل قاي ساسقانى دەدىك. سويتتىك تە، «تۆيتتەردەگى» الگى پاراقشانى شولىپ شىقتىق. سونىمىز دۇرىس بولعان ەكەن...

24-ناۋرىز كۇنى داريگا نازارباەۆا دەگەن اككاۋنت قىرعىزداردى تىلدەپتى. ءجاي تىلدەپ قانا قويسا كانە، اۋزىنا اق يت كىرىپ، كوك يت شىققانشا كوكبەتتىك جاساپتى. ورىس ادەبيەتىنىڭ ەڭ ەكزوتيكالىق تەرميندەرىن (بوقتىق سوزدەردى) قولدانا وتىرىپ، بار ءوشىن قوڭسىلاس قونىستانعان قىرعىز تۋعانداردان الىپتى.

«ۆ درەۆنوستي دەتدوموۆ نە بىلو، پو ەتومۋ كازاحي سبراسىۆالي كدەتەي-ۋرودوۆ سو سكالى، نو وني ۆىجيلي، تاك پوياۆيليس كىرگىزى»، دەپ جازبا جاريالاعان. قازاقشالاساق، «ەرتەرەكتە  جەتىمدەر ءۇيى بولماعان. سوندىقتان قازاقتار قۇبىجىق بالالاردى جاردان لاقتىراتىن. بىراق ولار ءتىرى قالدى. ءسويتىپ قىرعىزدار پايدا بولدى» دەگەنگە سايادى. بۇل ارينە، ايىر قالپاقتى اعايىننىڭ اشۋىن كەلتىرگەن. ءبىراز تالقى بولعان.

ال جاڭاعى اككاۋنت اۆتورى ودان ءارى قىرعىز اعايىندارعا تاعى شۇيلىگىپ، شەكارانى جاۋىپ تاستايمىن دەپ، دوق كورسەتكەندەي سويلەيدى. وزىنە قاراتا ايتىلعان سىني پىكىرلەرگە تۇكىرگەنى بارىن اشىق ايتادى. بۇنىڭ بارلىعى دا بەيساۋات، بادىك، ءتىپتى بوقاۋىزدى، انايى تىلمەن جازىلادى. ءبىز الگى @dariga_senate دەيتىن اككاۋنتتىڭ بارلىق جازبالارىن تىزبەلەپ جاتپادىق. وعان جۇيكەمىز شىدامادى.

داريعا نۇرسۇلتانقىزىنىڭ ساياسي قىزمەتىنە سىني كوزقاراسىمىزدى ءبىر ەمەس، بىرنەشە مارتە جازساق تا، ءدال وسى داۋلى جازباعا كەلگەندە ول كىسىنى ارانداتۋشىعا قيمادىق. ءيا، جاڭاعى جاعا ۇستاتارلىق، جاۋ شاقىرعان جاعىمسىز جازبالاردى باسقا-باسقا ەمەس، داريعا نۇرسۇلتانقىزىنىڭ ءوزى تاراتتى دەگەنگە سەنگىمىز جوق.

سوندىقتان، الداعى ۋاقتا سەناتتىڭ ءباسپاسوزى، داريعا نازارباەۆانىڭ ءوزى بۇل ماسەلەگە قاتىستى پىكىر بىلدىرەدى دەپ كۇتەمىز.

تاقىرىپقا تۇزدىق. داريعا نۇرسۇلتانقىزى نازارباەۆانىڭ اتىنا قاراتا ايتىلىپ جاتقان سىن از ەمەس. ونىڭ سەناتور مانسابىندا ءجۇرىپ ايتقان كەي سوزدەرى ءالى كۇنگە ەل ىشىندە قىزۋ تالقىلانۋدا.

داريعا نۇرسۇلتانقىزى نازارباەۆا جوعارىدا ايتقانىمىزداي، قازاقستاننىڭ ەكىنشى ادامى، قازىر. پارلامەنتتىڭ جوعارعى پالاتاسى سانالاتىن سەناتتى باسقارادى.  كەيبىر ساياساتكەرلەردىڭ بولجاۋىنشا، ول الداعى سايلاۋداعى باستى فاۆوريتتەردىڭ ءبىرى. جۋىردا «Financial Times» باسىلىمى «داريعا نازارباەۆا: قازاقستاننىڭ دۋبلەر پرەزيدەنتى» (Dariga Nazarbayeva: Kazakhstan’s understudy president) اتتى ماقالا جاريالادى.

ماسكەۋلىك ءبىلىمى بار وپەرا ءانشىسى، تۇڭعىش پرەزيدەنتتىڭ تۇڭعىش قىزى ەلدەگى العاشقى ايەل باسشى بولۋعا دايىن كورىنەدى.

ءارى قاراي ماقالا اۆتورى ەكس-پرەزيدەنت نازارباەۆتىڭ ءۇش جىل بۇرىن ايتقان سوزدەرىن مىسال ەتىپتى. «ءۇش جىل بۇرىن قازاقستاننىڭ سول كەزدەگى پرەزيدەنتى نۇرسۇلتان نازارباەۆ قازاقستاننىڭ مەملەكەت باسشىسى رەتىندە ايەل ادامدى قابىلداۋعا ءازىر ەكەنىن اشىق ايتقان. «بۇل مۇمكىن. مەنىڭ ءۇش قىزىم بارىن ەسكەرسەك، مەنىڭ ايەل زاتىنا كوڭىلىم ەرەكشە» دەگەن ەدى نازارباەۆ» دەپ جازادى «Financial Times» باسىلىمى.

ءتۇيىن. ەلدەگى سوڭعى اپتالارداعى اۋىس-تۇيىستەن كەيىن داريعا نازارباەۆانىڭ ساياسي ءرولى جوعارىلادى. ەڭ كەمىندە ول سەناتتىڭ سپيكەرى، قازاقستاننىڭ «زاپاستاعى» پرەزيدەنتى اتاندى.

جوعارىداعى ارانداتۋشى پيعىلدى اككاۋنتتىڭ كىمگە تيەسىلى ەكەنىن انىقتاۋ قازاقستاننىڭ قۇزىرلى ورگاندارىنىڭ مىندەتىندەگى شارۋا. ەگەر اككاۋنت شىن مانىندە داريعا نازارباەۆاعا تيەسىلى بولسا، ونىڭ وتستاۆكاسى ءوتىنىش ەمەس، تالاپ بولماق. كەرىسىنشە جاعدايدا، مەملەكەتارالىق الاۋىزدىقتى تۋدىرماق نيەتتىلەر انىقتالىپ، جازالانۋى كەرەك...

سوندىقتان دا قازاقستاننىڭ قۇزىرلى ورگاندارى بۇنى باقىلاۋعا الىپ، ماسەلەنىڭ اق-قاراسىن انىقتاۋى ءتيىس. ويتپەگەندە، بۇل جازبالار مەملەكەتتەر اراسىندا داۋ تۋدىرىپ جىبەرۋى ابدەن مۇمكىن. بىزدىكى قاۋىپ! بىزدىكى ساقتىق!

نۇرگەلدى ابدىعانيۇلى

Abai.kz