قازاقستاندىق كاسىپقوي بوكسشى جانىبەك ءالىمحانۇلى (5-0, 2 كو) 12 ءساۋىر كۇنى اقش تورىندە كەزەكتى جەكپە-جەگىن وتكىزەدى.

بۇعان دەيىن بەس كەزدەسۋدى ءوز پايداسىنا شەشكەن ءالىمحانۇلى كاسىپقوي رينگتەگى التىنشى جەكپە-جەگىندە 2 بىردەي چەمپيوندىق بەلبەۋگە تالاسقالى وتىر. لوس انجدەلەستە وتەتىن بوكس كەشىندە شارشى الاڭعا شىعاتىن جانىبەك مەكسيكالىق كريستيان ولليۆاسپەن جۇدىرىقتاسادى. 10 راۋندقا جوسپارلانعان بۇل جەكپە-جەكتە WBO Global جانە WBC Continental Americas چەمپيوندىق بەلبەۋلەرى ساراپقا سالىنادى.

ەرەكشە ايتا كەتەرلىگى، جانىبەك جەڭىس سانىن كوبەيتۋ ماقساتىندا تومەن دەڭگەيلى بوكسشىلارمەن كەزدەسىپ جۇرگەن جوق. ماسەلەن وتكەن جىلى 3 قاراشا كۇنى تەحاس شتاتىنداعى ەل-پاسو قالاسىندا جولىققان قارسىلاسى امەريكالىق ۆان الەكساندر 13 جەكپە-جەك وتكىزىپ، 12-ءىن جەڭگەن. بەسىنشى جەكپە-جەگىندەگى قارسىلاسى تاعى ءبىر امەريكالىق بوكسشى ستيۆەن مارتينەس (18-4, 13 كو) تە ناشار سپورتشى ەمەس بولاتىن.

الدا كەزدەسكەلى وتىرعان قارسىلاسى كريستيان ولليۆاس 20 جەكپە-جەك وتكىزىپ، ونىڭ 16-ىن جەڭگەن اسا تاجىريبەلى بوكسشى.

ەستەرىڭىزدە بولسا، جانىبەك ءالىمحانۇلى وتكەن جىلى ماۋسىم ايىندا الەمگە ايگىلى پروموۋتەر بوب ارۋممەن كەلىسىمشارتقا قول قويعان بولاتىن.

الدىنا ۇلكەن ماقسات قوياتىن جانىبەك اقش-قا قاتارداعى كوپ كوكسشىنىڭ ءبىرى بولۋ ءۇشىن بارعان جوق. ول ۇنەمى Qazaq stylە دەگەندى ايتىپ جۇرەدى. الەم بوكسىنا جاقسى تانىس "مەكسيكالىق ستيل" دەگەن بار، ءدال سول سەكىلدى "قازاق بوكس ءستيلىن" الەمگە تانىتۋدى كوزدەيتىنىن جاسىرمايدى. ءارى ءوز سالماعىنىڭ ۇزدىكتەرىمەن، الەم چەمپيوندارىمەن كەزدەسكىسى كەلەتىنىن ايتادى.

««كانەلو» - مەنىڭ سالماعىمداعى كوشباسشى. مەن الەم چەمپيونىمەن جەكپە-جەك وتكىزگىم كەلەدى، سوندىقتان «كانەلومەن» ايقاسقاندى قالايمىن. GGG وعان جەڭىلدى، ءبىز گەننادي ەكەۋمىز ءبىر ەلدەنبىز، سوندىقتان «كانەلودان» بەلبەۋلەردى تارتىپ الىپ، قايتا قازاقستانعا اپارعىم كەلەدى»، - دەگەن ەدى جانىبەك Fino Boxing-گە بەرگەن سۇحباتىندا.

اقش تورىندە ونەر كورسەتىپ جۇرگەن قازاقستاندىق كاسىپقوي بوكسشىلار از ەمەس. الايدا، ءدال قازىر الەم چەمپيونى اتاعى ءۇشىن جەكپە-جەك وتكىزۋگە ەش قايسىسىنىڭ مۇمكىندىگى جوق. جانكۇيەرلەر ءالى دە بولسا گەننادي گولوۆكين سىندى الەم چەمپيونىن اسىعا كۇتەدى. كاسىپقوي بوكستاعى جولىن جاڭا باستاپ جاتقان جاستاردى ايتپاعاندا، اۋەسقوي بوكستا ءتاپ-ءتاۋىر جەتىستىككە جەتكەن جانىبەك ءالىمحانۇلى قازاق جانكۇيەرلەرىنىڭ ءۇمىتىن اقتاۋعا ءبىر تابان جاقىن دەپ ەسەپتەيمىز.

ءبارىمىز بىلەتىندەي، جاقىندا قازاقستاندىق كاسىپقوي بوكسشى فيرۋزا شاريپوۆا توڭىرەگىندە ۇلكەن داۋ تۋىندادى. ءبىر جىل بويى چەمپيوندىق اتاعىن قورعاماعان شاريپوۆا  IBO جانە WBC Silver بەلبەۋلەرىنەن ايىرىلىپ قالدى. بۇنى قارجىنىڭ ازدىعى مەن دەمەۋشىنىڭ جوقتىعىنان كورگەن بوكسشى وكپەسىن ايتقان.

«IBO الەم چەمپيونى اتاعى مەن WBC Silver بەلبەۋىنەن ايىرىلعانىمدى اقپارات قۇرالدارىنان ءبىلدىم. بۇعان سەبەپ، ءبىز ءبىر جىلدان استام ۋاقىت چەمپيوندىق اتاعىمدى قورعاعان جوقپىز. ال ەرەجە بويىنشا چەمپيوندىق اتاقتى قورعاپ تۇرۋ كەرەك. بىلتىر جىل سوڭىندا WBC جانە IBO الەم چەمپيونى اتاعى ءۇشىن ەۆا ۆالسترەممەن جەكپە-جەك وتكىزۋدى جوسپارلاعان ەدىك. الايدا قارجىلىق ماسەلەلەر بۇعان كەدەرگى بولدى. مادەنيەت جانە سپورت مينيسترىنە جانە اكىمدەرگە حات جازىپ، قارجىلاي كومەك سۇرادىق. وكىنىشكە قاراي، بىزگە قاراجات تابىلمادى.

ازىرگە مەن WIBA نۇسقاسى بويىنشا الەم چەمپيونىمىن. ال قالعان اتاقتاردان ايىرىلۋ مەنىڭ جانە كوماندامنىڭ كىناسى ەمەس. مەن بەلدەۋلەرىمدى شايقاستا جوعالتقان جوقپىن. وكىنىشكە وراي، قازاقستاندا بىزگە ەشكىم قولداۋ كورسەتپەدى.

قازىرگى ۋاقىتتا 63,5 كەلى سالماق دارەجەسىندە الەم چەمپيونى تيتۋلىن يەلەنۋ ءۇشىن جۇمىس ىستەپ جاتىرمىز. قازىر دەمەۋشى ىزدەستىرۋ ۇستىندەمىز، بۇل ماسەلە ءالى شەشىلگەن جوق. ءبىز مادەنيەت جانە سپورت مينيسترلىگى مەن قازاقستاندىق كاسىپكەرلەردىڭ قولداۋىن كۇتىپ وتىرمىز»، - دەدى شاريپوۆا.

بوكسشى قىز وزىنە مەملەكەت تاراپىنان كومەك كورسەتىلمەدى دەپ مالىمدەمە جاساعانىمەن، مادەنيەت جانە سپورت مينيسترلىگى بۇنى جوققا شىعاردى.

«وتاندىق سپورتشىعا قولداۋ كورسەتۋ ماقساتىندا، فيرۋزا شاريپوۆانىڭ WBC چەمپيوندىق بەلبەۋىنىڭ يەگەرى ەۆا ۆالسترەممەن بىرىككەن جەكپە-جەگىن وتكىزۋ ءۇشىن قر مادەنيەت جانە سپورت مينيسترلىگى 2018 جىلدىڭ مامىر ايىندا 74,8 ملن كولەمىندە قاراجات ءبولدى. الايدا، وسى جەكپە-جەكتى وتكىزۋدىڭ ورنىنا، يۋليا كۋتسەنكومەن ءوز تيتۋلىن قورعاۋ جەكپە-جەگىن وتكىزگەن.  وسىلايشا، اسا ماڭىزدى بىرلەسكەن كەزدەسۋگە بولىنگەن  74,8 ملن. تەڭگە قاراجات قورعاي جەكپە-جەگىن ۇيىمداستىرۋعا جۇمسالعان»، - مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ باسشىسى سەرىك ساپيەۆ.

وسىدان كەيىن قازاقستاندىق جۋرناليستەرگە سۇحبات بەرگەن شاريپوۆانىڭ پروموۋتەرى، رەسەيلىك مەنەدجەر سەرگەي زاۆيلسكي مەملەكەت بولگەن قارجىنى مۇلدە ازسىنىپ وتىر. ونىڭ ايتۋىنشا، مينيسترلىك تاراپىنان بولىنگەن اقشا فيرۋزانىڭ جەكپە-جەكتەرىندەي بوكس كەشىن ۇيىمداستىرۋعا جەتپەيدى. سول ءۇشىن تاعى دا 500 مىڭنان ميلليون اقش دوللارى كولەمىندە قارجىلاي كومەك كەرەك ەكەن.

رەسەيلىك مەنەدجەردىڭ ايتۋىنشا، شاريپوۆاعا مەملەكەت جوعاردا اتالعان 74,8 ملن. تەڭگەگە دەيىن دە بىرنەشە مارتە كومەكتەسكەن. العاش رەت EXPO حالىقارالىق كورمەسى اياسىندا كەزدەسۋ وتكىزگەندە اقشالاي قولداۋ جاساعان. ال ەكىنشى مارتە «سامۇرىق قازىنا» قورى قارجى ءبولىپ، فيرۋزانىڭ 2017 جىلى الماتىدا  WBC, IBO بەلبەۋلەرى ءۇشىن جەكپە-جەك وتكىزۋىنە كومەكتەسكەن.

دەمەك، "قازاقستاندا بىزگە ەشكىم قولداۋ كورسەتپەدى" دەپ وكپەلەپ جۇرگەن بوكسشى قىزعا قازاقستان بيلىگى ءۇش مارتە قارجى بەرگەن. ءارى بۇل اقشانىڭ از ەمەس ەكەنىن سپورتشىنىڭ مەنەدجەرى مويىنداپ وتىر. "قازىر جالپى مولشەرى ەسىمدە جوق، ۇشاقتا وتىر ەدىم. ءبىر شەتىنەن بۇل وتە كوپ اقشا" دەپدى سەرگەي زاۆيلسكي قازاقستاندىق جۋرناليست سەرىك نويانبايۇلىنا بەرگەن سۇحباتىندا.

ءبىز بۇل مالىمەتتى سالىستىرۋ ءۇشىن ايتىپ وتىرمىز. سەبەبى، قازاق بوكس جانكۇيەرلەرى ۇلكەن ءۇمىت ارتىپ وتىرعان جانىبەك ءالىمحانۇلىنا مەملەكەت مۇلدە دەمەۋشىلىك جاساعان جوق. بۇل تۋرالى بوكسشىنىڭ PR ديرەكتورى بەرىك سۇلتان جانىبەكتىڭ بەسىنشى جەكپە-جەگى الدىندا forbes.kz-گە بەرگەن سۇحباتىندا بىلاي دەگەن ەدى:

«بوكسشى ءار جەكپە-جەك سايىن ءوسۋى كەرەك. ءوسۋ ءۇشىن قاجەتتى ۆيتاميندەر، بىلىكتى ماماندارمەن جۇمىس ىستەۋ كەرەك. بۇيىرتسا وسى جەكپە-جەكتەن سوڭ بىرنەشە تانىمال مامانداردى كوماندامىزعا الۋدى جوسپارلاپ وتىرمىز. ول ءۇشىن ارينە قوسىمشا قاراجات كەرەك. ءبىز بۇگىنگە دەيىن ەشقانداي دەمەۋشى ىزدەگەنىمىز جوق. سەبەبى اقشامىز كوماندانىڭ شىعىنىنا جەتىپ تۇردى. بىراق وسى جەكپە-جەكتەن سوڭ ىزدەۋگە كىرىسەمىز. ەلىمىزدەگى ۇلكەن كومپانيالارمەن كەلىسىمشارت جاساپ، ولاردىڭ برەندىن جارنامالايتىن كۇن دە الىس ەمەس دەپ ويلايمىن. دەمەۋشىلەرمەن ۇسىنار ۇسىنىستارىمىز دا دايىن».

قۋانىش قاپپاس

Abai.kz