كەزدەسۋ بارىسىندا نۇرسۇلتان نازارباەۆقا مينيسترلىكتىڭ قازىرگى قىزمەتى جانە الداعى جۇمىس جوسپارى تۋرالى مالىمدەلدى.

ەلباسى سىرتقى ساياسي باعىتىمىزدىڭ ساباقتاستىعىن قامتاماسىز ەتۋدىڭ جانە قازاقستاننىڭ ستراتەگيالىق سەرىكتەستەرىمەن ىنتىماقتاستىقتى نىعايتۋعا باعىتتالعان شارالاردى بىرتىندەپ ىسكە اسىرۋدىڭ ماڭىزدىلىعىنا توقتالدى.

– ەلىمىزدە ەلەۋلى ساياسي وزگەرىستەر بولدى. بيلىكتىڭ قالىپتى ءارى بەيبىت جولمەن بەرىلۋىن قامتاماسىز ەتىپ، بۇكىل الەمگە كونستيتۋتسيا اياسىندا ارەكەت ەتەتىنىمىزدى كورسەتتىك. بۇل – بارشا جۇرت ءۇشىن ايتۋلى وقيعا. قازىر ەڭ باستىسى – وسىعان دەيىن قالىپتاسقان سىرتقى ساياسي باعىتىمىزدان اينىماۋ. ەڭ الدىمەن، جاقىن كورشىلەرىمىزبەن اراداعى قاتىناستارعا نازار اۋدارۋ كەرەك. بۇل قاتىناستار ءوزارا سەنىمگە نەگىزدەلۋگە ءتيىس، – دەدى نۇرسۇلتان نازارباەۆ.

قازاقستاننىڭ تۇڭعىش پرەزيدەنتى، سونداي-اق، شەت ەلدەرگە جاسالاتىن ساپارلارعا جانە حالىقارالىق ءىس-شارالارعا مۇقيات دايىندالۋ قاجەتتىگىن اتاپ ءوتتى.

– قازىرگى تاڭدا مىناداي ماسەلەلەرگە باسا ءمان بەرۋ كەرەك. بىرىنشىدەن، وڭتۇستىك كورەيا پرەزيدەنتىنىڭ قازاقستانعا ساپارى. ەكىنشىدەن، «ءبىر بەلدەۋ، ءبىر جول» فورۋمىنا قاتىسۋ ءۇشىن قىتاي حالىق رەسپۋبليكاسىنا جاسالاتىن ساپار. سونىمەن قاتار، ەۋرازيا ەكونوميكالىق وداعىنىڭ مەرەيتويلىق ءسامميتىن وتكىزۋ ءۇشىن جاقسىلاپ دايىندالۋ كەرەك. ونىڭ بەس جىلدىعىن ەلوردامىزدا اتاپ وتەمىز، – دەدى ەلباسى.

سىرتقى ىستەر ءمينيسترى ب.اتامقۇلوۆ ەلىمىزدە بولعان ساياسي وقيعالاردى حالىقارالىق ۇيىمداردىڭ باسشىلارى وڭ باعالاپ جاتقانىن جەتكىزدى.

– حالىقارالىق ۇيىمداردىڭ باسشىلارى قازاقستاننىڭ حالىقارالىق مىندەتتەمەلەردى جۇزەگە اسىرا بەرەتىنىنە سەنىم بىلدىرۋدە. الەمدىك قوعامداستىق ءسىزدىڭ جاھاندىق باستامالارىڭىزدى جانە قاۋىپسىزدىكتى قامتاماسىز ەتۋگە قوسقان ۇلەسىڭىزدى، سونىڭ ىشىندە يادرولىق قارۋسىزدانۋ مەن يادرولىق قارۋدى تاراتپاۋ ىسىنە سىڭىرگەن ەڭبەگىڭىزدى جوعارى باعالاۋدا، – دەدى ب.اتامقۇلوۆ.

قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ ءباسپاسوز قىزمەتى

Abai.kz