قازاقستاندا ەكى ايدان سوڭ وتەتىن پرەزيدەنت سايلاۋىنا قاتىستى ءتۇرلى بولجامدار، الۋان پىكىرلەر ايتىلۋدا. باسىم كوپشىلىگى، قازىرگى ساياسي جۇيەنىڭ تۇبەگەيلى وزگەرۋى ءۇشىن سايلاۋعا جاستار تۇسكەنىن قالايدى. ماسەلەن، كۇنى كەشە «ارداگەرلەر وداعى» دەگەن ۇيىم پرەزيدەنت سايلاۋىنا ەكونوميست مۇحتار تايجاننىڭ كانديداتۋراسىن ۇسىندى.

ءبىز بۇل ۇسىنىسقا قاتىستى مۇحتار تايجانعا حابارلاسىپ، بايلانىس ورناتا المادىق. الايدا، مۇحتار بولاتحانۇلى ءوز پىكىرىن «facebook» جەلىسىندەگى جەكە پاراقشاسىندا جازدى:

مۇحتار تايجان:

مەنى پرەزيدەنت كانديداتتىعىنا ۇسىنۋ تۋرالى.

بىرىنشىدەن، رەسپۋبليكالىق  «ارداگەرلەر وداعى» قوعامدىق قاۋىمداستىعىنا ماعان ارتقان  سەنىمى ءۇشىن شىنايى ريزاشىلىعىمدى بىلدىرەمىن.

ەكىنشىدەن، مەن سايلاۋعا تۇسەر ەدىم، ەگەر، ماعان زاڭ مۇمكىندىك بەرسە. بىراق، وكىنىشكە قاراي، مەنىڭ مەملەكەتتىك قىزمەتتە 5 جىلدىق تاجىريبەم جوق. وسى سەبەپتەن مەن كانديدات رەتىندە تىركەلە المايمىن. جوعارىمەن ەشقانداي كەلىسىم شارتىم جوق. مەنىڭشە، ءبىزدىڭ وسى زاڭىمىزدى وزگەرتۋ كەرەك. بىراق، بۇل زاڭ بۇگىندە قولدانىستا. سوندىقتان، بۇعان ۋاقىت جوعالتپاي، تالاپقا ساي كانديداتتى تاڭداي بىلۋگە ءتيىسپىز.

ۇشىنشىدەن، مەن سىزدەردىڭ جوعارى سەنىمىڭىزگە، اسىرەسە اسكەري وفيتسەرلەرگە ۇلكەن  سەنىم ارتامىن جانە وسى كۇننەن باستاپ جەرگىلىكتى سوعىس ارداگەرلەرىنىڭ قۇقىقتارىن قورعاۋ ءۇشىن سىزدەرمەن بىرگە بولامىن. جانە، سىزدەرمەن بىرلەسە وتىرىپ، ارداگەرلەرگە رەسمي مارتەبە بەرۋگە، جان-جاقتى مەملەكەتتىك كومەك پەن قولداۋدى كۇشەيتۋگە اتسالىسامىن.

ارينە، ارداگەرلەر وتاننىڭ نازارىن اۋدارادى! مەن الدا بىرلەسكەن جۇمىستىڭ ناقتى ناتيجەلەرىن كورەتىنىمىزگە سەنەمىن!

ايتا كەتەيىك، بۇل سايلاۋعا قوعام بەلسەندىسى مارعۇلان سەيسەمدايدى دا ۇسىنعاندار كوپ. بىراق، ول دا سايلاۋعا قاتىسپايتىن جەتى سەبەبىن كورسەتىپ، جازدى.

مارعۇلان سەيسەمباي:

بىرىنشىدەن، ءبىزدىڭ قوعاممەن ساياساتتىڭ ەگجەي-تەگجەيلەرىن بىلە وتىرىپ مەن ساياساتتان ءارى جۇرگەندى ءجون كورەمىن.

ەكىنشىدەن، سايلاۋ زاڭى بويىنشا ەركىن، تاۋەلسىز ۇمىتكەر سايلاۋعا قاتىسا المايدى. تەك پارتيالار ارقىلى عانا. ال بىزدە قانشا پارتيا بار جانە ولاردىڭ ارتىندا كىم تۇرعانىن بىلەسىزدەر.

ۇشىنشىدەن، سايلاۋ زاڭىنىڭ تالابى بويىنشا، مەندە مەملەكەت ورگاندارىندا ىستەگەن 5 جىلدىق تاجىريبەم جوق. مەنىڭ پىكىرىمشە بۇل بيلىككە بوتەن ادام كىرمەسىن دەپ ىستەلگەن نارسە.

تورتىنشىدەن، ۇمىتكەر كەيىنگى 15 جىلدى قازاقستاندا تۇرۋى قاجەت. ءسىز بىلەتىندەي، مەنى ەلدە قۋدالاعاندىقتان، مەن ءبىر جىلداي شەت ەلدە تۇرۋعا ءماجبۇر بولدىم.

بەسىنشىدەن. جوعارى ايتىلعان سەبەپتەردەن تىس، تاۋەلسىز ادامعا ۇمىتكەر بولۋعا مۇمكىندىك بەرمەيتىن، باسقا دا كوپتەگەن كوزگە كورىنبەيتىن كەدەرگىلەر بار.

التىنشىدان، مەن سايلاۋدىڭ اشىق، تازا جانە ءادىل بولاتىنىنا كۇمانىم بار. مەنىڭ پىكىرىم بويىنشا بۇل سايلاۋدىڭ ناتيجەسى بەلگىلى، ونى وزدەرىڭىز دە بىلەسىزدەر. سايلاۋ اشىق بولۋى ءۇشىن، وعان، وركەنيەتتى ەلدەردەگىدەي كەز-كەلگەن تاۋەلسىز ۇمىتكەردىڭ قاتىسا الاتىن جاعدايى بولۋ كەرەك. ۇمىتكەرلەردىڭ سايلاۋعا دايىندالىپ ۇلگەرەتىن ۋاقىتى بولۋ كەرەك، بارلىق ۇمىتكەرلەر باق قۇرالدارى مەن داۋىس بەرۋ ۇدەرىسىن قاداعالاۋعا بىردەي اسەرى بولۋ كەرەك، xالىق اسىقپاي، ويلانىپ تاڭداۋعا جاعداي بولۋ كەرەك.

جەتىنشىدەن، بۇل ەڭ ماڭىزدىسى، مەنىڭ ويىمشا، كەلەشەكتە بارلىق ەل ءبىر ادامعا قاراپ قالماۋى كەرەك. سوندىقتان مەن قازاقستاننىڭ پارلامەنتتىك رەسپۋبليكا بولعانىن دۇرىس دەپ ەسەپتەيمىن.

ءتۇيىن.

قازاقستانداعى سايلاۋ تۋرالى زاڭ حالىق سەنگەن ادامداردىڭ كانديدات بولۋىنا كەدەرگى كەلتىرىپ تۇر. ەسەسىنە، بۇل زاڭ بيلىك وكىلدەرىنە وتە ءتيىمدى. سوندىقتان، كەيبىر ساراپشىلار الداعى سايلاۋدا بيلىككە ءتيىمدى ادام پرەزيدەنت بولاتىنىن ايتادى. الايدا، حالىقتىڭ پىكىرى قازىرگى ساياسي جۇيە تۇبەگەيلى وزگەرۋ كەرەك دەگەنگە  سايادى. قالاي دەسەكتە، بۇل ساياسي دودا – ەل تاعدىرى شەشىلەر ماڭىزدى ءسات.

نۇربيكە بەكسۇلتانقىزى

Abai.kz