دۇيسەنبى, 27 مامىر 2019
1218 4 پىكىر 22 ءساۋىر, 2019 ساعات 10:11

قازاق قىمىزى مەن شۇباتى الەمدى جاۋلايدى

ءىى جاھان سوعىسىندا ورىس-نەمىس مايداندا تۇتقىنعا ءتۇسىپ، جازاسىن قازاق جەرىندە وتەگەن نەمىستىڭ اسكەري تۇتقىندارى ءوز ەلىنە ورالعان سوڭ، بيە بايلاعان. سولار قىمىزدى اۋەلى ەۋروپاعا، كەيىن الەمگە تانىمال ەتتى. ءارى قۇرعاق قىمىز شىعاراتىن قۇرىلىعى ويلاپ تاپتى. ول قۇرىلعىنى قازاق ارگرايلەرى دە كادەگە جاراتا باستادى.

قازىر  اقش، ءباا، ەو، قىتاي، رەسەي، ومان، باحرەين، ساۋد اراۆياسى سياقتى الەمدىك ەڭ ءىرى نارىقتاردان قازاق قىمىزىنا قىزىعۋشىلىق تۋىنداپ وتىر. وسى باعىتتا 2015 جىلى ىرگەسى قالانعان  قاراعاندى وبلىسىنداعى وساكاروۆ اۋدانىداعى دالنىي اۋىلدىق وكرۋگىندە ورنالاسقان «ەۋرازيا ينۆەست لتد» كومپانياسىنىڭ زاۋىتىنان بىلتىرعى جىلى  Saumal برەندىمەن 30 توننا قىمىز ەكسپورتقا شىعارىلدى.

ەۋروپادا قۇرعاق بيە ءسۇتىن وندىرۋمەن جانە قىمىز ساتۋمەن 30 اسا كومپانيا اينالىسادى. قازاق كاسىپكەرلەرى وسى جىلدىڭ قاڭتارىندا بەرليندە وتكەن «جاسىل اپتا» ءداستۇرلى كورمەسىنە قاتىسىپ، نەمىس ارىپتەستەرىمەن ارىپتەستىك كەلىسىمدەرگە قول جەتكىزدى. بادەن-ۆيۋرتەمبەرگ جەرىندەگى Kurgestut Hoher Odenwald فەرماسىنىڭ يەسى  گانس تسولمان قۇرعاق قىمىز وندىرەتىن قۇرىلعىلاردىڭ قازاق جەرىنە جەتكىزىلۋىن ءوز مويىنا الدى.

«ەۋرازيا ينۆەست لتد»  ناۋرىزدا اقش نارىعىنا شىعۋعا مۇمكىندىك الدى. ەكى امەريكالىق كومپانيا قازاقي ونىمگە ىقلاس تانىتتى. اقش ساۋدا تالابىنا ساي كەلەتىن «ساۋمەت» ءونىمى ەندى وسى ەلدىڭ دۇكەندەرىنەن ءوز ورنىن الاتىن بولادى. Saumal ماركاسى بولسا، وسى ەلدە  الەمدەگى ەڭ ءىرى Amazon ينتەرنەت-دۇكەنى ارقىلى جارتى جىلدان بەرى ساۋداعا ءتۇسىپ كەلەدى.

بۇل ارادا باسا ايتاتىن جاي قازاق بيەسىنەن الىنعان قۇرعاق ءسۇت ەۋروپا بيەلەرىنە قاراعاندا بيودارۋمەندەرگە باي. ونىڭ ۇستىنە ەۋروپالىق جىلقىلار تەبىندەمەيدى. ەندى قازاق كاسىپكەرلەرى الەمگە قىمىزعا قاراعاندا تانىمالدىعى زور، شۇباتتى دا ەكسپورتقا شىعارۋدى قولعا العالى جاتىر.

ءابىل-سەرىك الياكپار

Abai.kz

4 پىكىر