دۇيسەنبى, 27 مامىر 2019
ساياسات 4415 19 پىكىر 15 مامىر, 2019 ساعات 16:37

«قۇمار ويناپ قۇتىلدىم، اتقا ءمىنىپ توقاەۆقا تۇتىلدىم...»

الەۋمەتتىك جەلىدە اتىراۋ وبلىسى پوليتسيا دەپارتامەنتىنىڭ باسشىسى ايان دۇيسەمباەۆقا ات مىنگىزىپ جاتقان ۆيدەو تارالىپ، كوپشىلىك اراسىندا تالقىعا تۇسكەن بولاتىن. بۇل بەينەجازبا پرەزيدەنت قاسىم-جومارت توقاەۆتىڭ دا نازارىن اۋدارىپتى.

مەملەكەت باسشىسى Twitter جەلىسىندەگى جەكە پاراقشاسىندا ءىسشى ىستەر قىزمەتكەرىنىڭ وسى ەرسى ارەكەتىنە قاتىستى قىزمەتتىك تەكسەرۋ جۇرگىزۋدى تاپسىرعانى جايلى جازدى.

«ءىىم ە.تۇرعىمباەۆقا اتىراۋ وبلىستىق پوليتسيا دەپارتامەنتى باستىعىنىڭ ەرسى ارەكەتىنە قاتىستى قىزمەتتىك تەكسەرۋ جۇرگىزۋدى تاپسىردىم. قاتاڭ شارا قولدانىلاتىن بولادى»، - دەپ جازادى توقاەۆ.

بۇل بەينەجازباعا بايلانىستى، قر ىشكى ىستەر مينيسترلىگى كەشە تۇسىنىكتەمە بەرگەن بولاتىن.

«اتىراۋ وبلىسى پوليتسيا دەپارتامەنتىنىڭ باسشىسى ايان دۇيسەمباەۆقا قاتىستى الەۋمەتتىك جەلىدە جاريالانعان ۆيدەوماتەريال بويىنشا ىشكى ىستەر مينيسترلىگى وقيعا ورنىنا وكىل اتتاندىرىپ قىزمەتتىك تەكسەرىستى قولعا الدى. قىزمەتتىك تەكسەرىس ناتيجەسى بويىنشا زاڭدا بەلگىلەنگەن ءتارتىپ نەگىزىندە شەشىم قابىلدانادى»، - دەپ مالىمدەدى مينيسترلىكتىڭ ءباسپاسوز قىزمەتى.

مۇنايلى ولكەنىڭ قاۋىپسىزدىگىن قورعاپ، تىنىشتىعىن ساقتاۋعا مىندەتتى ايان دۇيسەمباەۆ مىرزانىڭ باسى داۋعا ءبىرىنشى رەت قالىپ وتىرعان جوق. بىلتىر دا الەۋمەتتىك جەلىدە تاراعان ءبىر ۆيدەو ماتەريال ايان ءسابيتۇلىن ءبىراز ابىگەرگە سالعان.

2018 جىلى تامىز ايىندا الەۋمەتتىك جەلىدە اتىراۋ وبلىستىق ءىىد باسشىسى ايان دۇيسەمباەۆتىڭ كازينودا جۇرگەنى تۇسىرىلگەن بەينەجازبا تارادى. كەيبىر اقپاراتتاردا جوعارى لاۋازىمدى پوليتسەيدىڭ سول كەزدە 1,2 ملن دوللار كولىمىندە اقشا ۇتىلعانى ايتىلدى. كوپشىلىك مۇنشا كوپ قارجىنىڭ قاراپايىم مەملەكەتتىك قىزمەتكەردە قايدان جۇرگەنىن قىزۋ تالقىلاعان.

الايدا، ءىىم وكىلدەرى ۆيدەونى تەكسەرىپ، ونىڭ 2014 جىلى مينسك قالاسىندا تۇسىرىلگەنىن مالىمدەدى. ايان دۇيسەمباەۆ 2014 جىلى اتىراۋ وبلىستىق ءىىد باسشىسىنىڭ ءبىرىنشى ورىنباسارى قىزمەتىن اتقارعان. ال وبلىستىق ءىىد باسشىسى قىزمەتىنە 2016 جىلى تامىز ايىنان باستاپ كىرىسكەن.

«سول كەزدە اتىراۋ وبلىستىق ءىىد باسشىسىنىڭ ءبىرىنشى ورىنباسارى قىزمەتىندە بولعان دۇيسەمباەۆ دوسىمەن بىرگە مينسكىدە بولعان. ونىڭ دوسى ويىن مەكەمەسىنە ءوزىنىڭ تانىسىن ەرتىپ كەلگەن. ال دوسىنىڭ ايەلى ونىڭ بۇل ارەكەتىنە قارسى بولعان. ونى توقتاتۋ ءۇشىن ايەلى دۇيسەمباەۆتان كازينوعا كەلۋىن سۇراعان. دۇيسەمباەۆ ءوزى ويناماعان. وعان 2014 جىلدىڭ قازان ايىندا جۇرگىزىلگەن تەكسەرىس دالەل بولا الادى»، - دەپ مالىمدەگەن ەدى قر ءىىم رەسمي وكىلى الماس سادۋباەۆ.

بۇل ىسكە كەيىن ايان دۇيسەمباەۆتىڭ ءوزى دە تۇسىنىكتەمە بەرىپ، الەۋمەتتىك جەلىدە تاراعان اقپاراتتاردى جوققا شىعاردى. كازينوعا بارعانىن راستاعانىمەن، ۇتىس تىككەن دوسى ەكەنىن ءارى ۇتىلعان سوما كوپشىلىك اراسىندا تاراعان ساننان ($1 200 000 ) از ەكەنىن ايتتى.

«ءيا، بۇل ۆيدەودا مەن جانە دوسىم ماحمۇد مەراليەۆ تۇسىرىلگەن. ۆيدەو 2014 جىلى جازىلعان، ول كەزدە مەن زاڭدى تۇردە العان ەڭبەك دەمالىسىندا بولعان ەدىم. سول كەزدە ەكى دوسىممەن بىرگە وتباسىلارىمىزبەن تۇركياعا دەمالۋعا باردىق. شامامەن ءبىر اپتادان سوڭ ءبىز مەراليەۆتىڭ ۇسىنىسىمەن بەلارۋس ەلىنە بارىپ قايتۋدى شەشتىك. ونىڭ تانىسى حابارلاسىپ، ءبىزدى قوناققا شاقىردى. ول سونداعى كازينو يەلەرىنىڭ ءبىرى ەكەن. سودان قوناقۇيدە وتىرعانىمدا ماعان ماحمۇدتىڭ ايەلى حابارلاسىپ، ونى ۇيگە الىپ قايتۋىمدى سۇرادى. مەن كازينوعا جەتكەنشە مەراليەۆ ەكى رەت ۇتىس تىگىپ ۇلگەرىپتى. ول ماس بولاتىن، سوندىقتان وعان جالعاستى ويناۋعا رۇقسات بەرگەن جوق.

مۇنداي سوماداعى اقشانى مەملەكەتتىك شەكارادان ەشبىر كەدەرگىسىز الىپ ءوتۋ دەگەندى قالاي ەلەستەتەسىزدەر؟ ونىمەن قوسا، كازينونىڭ ەشقانداي دا يەسى ويىنشىلارعا وسىنشاما اقشانى قارىزعا بەرمەيدى. سوندىقتان مۇنداي كوپ سوما ساندىراق ءسوز. مەراليەۆتىڭ 100 مىڭ جايلى ايتىپ جاتقانىن ەستىدىم. وسىعان دەيىن ءىىم وكىلدەرى 2014 جىلى جۇرگىزىلگەن تەكسەرىستىڭ اقشانىڭ كازينوعا مەراليەۆتىڭ ەسەپشوتتارىنان جانە كارتاسىنان اۋدارىلعانىن مالىمدەگەن بولاتىن»، - دەگەن ەدى دۇيسەمباەۆ.

بۇل داۋ وسىمەن شەشىلگەن. باس كەيىپكەر ءوزى تۇسىنىكتەمە بەرىپ اقتالدى. ءىىم اقتادى. ءسويتىپ، الەۋمەتتىك جەلىدە ءبىر ايعا جۋىق شۋ بولعان وقيعاعا نۇكتە قويىلدى. ەڭبەك دەمالىسىندا جۇرگەن مەملەكەتتىك قىزمەتكەردىڭ كازينوعا بارۋىنا بولمايدى دەگەن زاڭ جوق. الايدا، حالىق ۇتىستا بولعان سومانىڭ كوپتىگىنە جانە ۆيدەوداعى بەيادەپ سوزدەرگە شۇيلىككەن. بىراق بۇل ءىس ءبىز ءسوز ەتىپ وتىرعان پوليتسيا باسشىسىنا ەش زيانىن تيگىزگەن جوق. قايتا ءتاپ-ءتاۋىر تانىمالدىعىن ارتتىردى.

ارينە، ءتورت جىل بۇرىن تۇسىرىلگەن ۆيدەونىڭ بۇگە-شىگەسىنە دەيىن انىقتاپ، حالىقتىڭ كۇمانىن سەيىلتۋگە ەشكىم قۇلىق تانىتقان جوق. ۆيدەو كەيىپكەرىنىڭ اقتالعان ءسوزى مەن ءىىم وكىلىنىڭ مالىمدەمەسى بۇل ءىستىڭ قورىتىندىسى بولدى. سودان دا بولار، كوپ كوڭىلىندە ءسال كۇمان قالعانى راس.

ال مىنا ءىستىڭ سوڭى سول كەزدەگىدەي سيىرقۇيمىشاقتالىپ بارىپ ۇمىتىلىپ كەتپەيتىن سەكىلدى. سەبەبى، مەملەكەت باسشىسىنىڭ ءوزى باسا نازار اۋدارىپ وتىر. ءىىم ە.تۇرعىمباەۆقا تىكەلەي تاپسىرما بەرىپ، قاتاڭ تەكسەرۋدى تاپسىردى. دەمەك، ايان دۇيسەمباەۆ بۇل جولى ءبىراز ابىگەرگە تۇسەتىن بولار.

قۋانىش قاپپاس

Abai.kz

19 پىكىر