مۇعالىمدەر جانە سايلاۋ

باياعىدا، 2011 جىلعى سايلاۋدا بولعان قىزىق ەدى.

ول كەزدە مەكتەپكە جاڭا بارعان جىلىم، 25-تەگى جالىنداپ تۇرعان شاق. سايلاۋدان ءبىر كۇن بۇرىن ديرەكتور كونفەرەنتسيا زالىندا جينالىس جاساپ، ءاربىر مۇعالىمدى سايلاۋ كۇنگى جاۋاپتى مىندەتتەرگە قويىپ جاتتى. مەنىڭ مىندەتىم - سايلاۋ كۇنى كونتسەرت جۇرگىزۋ بولدى، سايلاۋعا داۋىس بەرۋگە كەلگەندەرگە مەرەكەلىك كوڭىل-كۇي سىيلاۋ. ءيا، ول كەزدە تامادا بوپ جۇرگەن كەز، بىردەن كەلىستىم، ونەرلى وقۋشىلاردى جيناپ، باعدارلاما جاساپ، وتكىزە بەرەم دەپ ۋادە ەتتىم.

قىزىق جينالىس سوڭىنا تامان بولدى، بار ادام مىندەتىن ءبولىپ العان سوڭ ءبىراز ارىپتەستەرگە مىندەت بولىنبەي قالعان، كەزەك سولارعا كەلدى. "ەرتەڭ سىزدەر ساعات 9-عا دەيىن وزدەرىڭىزدىڭ سايلاۋ ۋچاسكەلەرىڭىزدە داۋىس بەرىپ، 9:10 كەزىندە مەكتەپتىڭ الدىڭعى قاقپاسىنان كىرىپ داۋىس بەرەسىزدەر. ەكى ساعاتتان كەيىن كيىمدەرىڭىزدى الماستىرىپ، ارتقى قاقپادان كىرىپ داۋىس بەرەسىزدەر، سولاي بەس رەت قايتالانادى" دەدى. "ال، ىشتەگىلەر ارا-اراسىندا مۇمكىندىگىنشە كىرىپ داۋىس بەرەسىزدەر" دەپ جاتىر. مەن وتىرمىن - "شوك", ال جۇرت قالاي كىرىپ، قالاي داۋىس بەرۋ تۋرالى اڭگىمەگە كىرىپ كەتكەن.

شىداماي كەتتىم:
- ح.ح. قىزى، كەشىرىڭىز، اركىم ءبىر-اق رەت، ءوزى ءۇشىن داۋىس بەرۋگە قۇقىلى. نە ءۇشىن ەكى-ءۇش رەتتەن؟ - دەپ قارعىپ تۇرىپ ەدىم،
- ءبارىمىزدىڭ پارىزىمىز، جۇرت سايلاۋعا كەلمەي قالادى، باسقا قالالارعا كەتكەندەر ءۇشىن، - دەپ تۇسىندىرە باستادى ديرەكتورىم.
- كەشىرىڭىز، بارلىق ادامعا داۋىس بەرۋگە مۇمكىندىك جاسالعان، ال بەرمەسە دە زورلىق جوق، ءوز تاڭداۋى. بىراق، ءبىز ەرتەڭ ەلدىڭ زاڭىنان اتتاپ، ارعى كۇنى وقۋشىعا قالاي ء"تارتىپ بۇزبا" دەپ ايتامىز؟ ءبىز بۇگىن قىلمىس جاساپ، ەرتەڭ وقۋشىعا قالاي تاربيە بەرەمىز؟ - دەپ اشۋعا بۋلىعىپ كەتتىم.
ديرەكتور:
- اياتجان، ارتىنان اسىقپاي سويلەسەيىك، مەن جينالىسقا بارۋىم كەرەك، - دەپ شىعىپ كەتتى.
جيىن ءدال سول جەردە تارادى، ءبارى ءۇنسىز، ۇلكەن ارىپتەستەرىم:
- قىزىقسىڭ، ديرەكتورعا قارسى شىعىپ نەڭ بار؟ - دەدى. "مەنەن باسقاسى نەگە ۇندەمەيدى؟" دەپ مەن اڭ-تاڭمىن، ءبىر-ەكى ءوزىم قاتارلى جاستارعا ۇرسىپ الدىم دا، ۇيگە كەلدىم. كەلىنشەگىم باسقا مەكتەپتە ىستەيتىن ەدى، ول مەكتەپتەگى جينالىستا مەن سەكىلدى تەنتەكتەر بولماعان، ءبارى "اقىلمەن" شەشىلگەن. مەن كۇيىپ-ءپىسىپ، اشۋلانىپ جاتتىم (جاسپىن عوي).

تاڭەرتەڭ مەكتەپكە ەرتە بارىپ، كونتسەرت جۇرگىزىپ تۇرعام، ساعات ون كەزىندە ديرەكتوردىڭ وقۋ ءىسى جونىندەگى ورىنباسارى قاسىما كەلىپ:
- اياتجان اعاي، "ەندى وقۋشىلار ءوزى وتكىزە بەرەدى كونتسەرتتى، ءسىز بارىپ دەمالا بەرسىن. ادەمى ۇيىمداستىرىپتى، راحمەت" دەدى ديرەكتور، - دەدى.
- راحمەت، - دەپ قوشتاستىم. نەگىزى ول مەنى ۇيگە دامالدىرۋ ەمەس، "مەكتەپتە بىردەڭە بۇلدىرە مە؟" دەگەن الاڭداۋدان شىققان جاناشىرلىق ەدى. امال جوق، "دەمال" دەگەسىن ۇيگە كەپ دەمالدىم. بىراق، ەرتەسى ءوز ارىپتەستەرىمە باسقاشا قاراي باستادىم، ءبىر-ەكى اي سول كوڭىل-كۇيدەن الىستاي الماي، كادىمگىدەي اۋىرىپ ءجۇردىم.

ودان بەرى دە ءبىراز سايلاۋ كورىپ تاستادىق، بىراق، ودان كەيىنگى ديرەكتورىم دەموكرات ەدى، ەشكىمدى مازالامادى.

ءيا، الدا سايلاۋ، ءومىر اعايدىڭ سوزىمەن ايتساق "قۇل - ماعان ارىپتەس ەمەس", سايلاۋدىڭ ادال، تازا ءوتۋى ءبىزدىڭ ارىپتەستەرگە دە بايلانىستى. سايلاۋ تۋرالى زاڭدى ءبىر وقىپ، اركىم ءوزى ءۇشىن جانە ءبىر-اق رەت، ءوزىنىڭ قالاۋى بويىنشا عانا، ءوزى تاڭداعان كانديداتقا داۋىس بەرەتىنىن ەسكەرتكىم كەلەدى.

بۇگىن زاڭ بۇزىپ، ەرتەڭ الدىمىزداعى وقۋشىعا تاربيە ساعاتىن وتكىزىپ تۇرار ەكىجۇزدىلىك - ۇستازعا ءتان قاسيەت ەمەس.
ءبىر ءتۇرلى ادام بولىپ ەلەستەپ وتىرمىن با؟
قاتتى ايتسام كەشىرىڭىزدەر، ءبىز قۇقىقتىق، دەموكراتيالىق مەملەكەتپىز، ارينە اتازاڭ سولاي دەيدى، مەن ەمەس.

اياتجان احمەتجانۇلىنىڭ facebook پاراقشاسىنان

Abai.kz