پرەزيدەنت سايلاۋىنىڭ ەرەكشەلىگى مەن ساپالىق وزگەشەلىگى جونىندە بىرەر ءسوز...

سايلاۋ ناۋقانى كوپتەگەن جىلداردان كەيىن پليۋراليزم جانە پىكىرلەر سان-الۋاندىلىعى جاعدايىندا ءوتىپ جاتىر. سايلاۋ پروتسەسسىنە قوعامدىق وي-سانانىڭ بارلىق پاليتراسى قاتىسۋدا. ياعني، ەلىمىزدەگى بۇكىل ساياسي كوزقاراستار سايلاۋ پروتسەسىنىڭ ءبىرتۇتاس ورگانيزمى بولىپ تۇر. بۇل بۇرىن بولماعان قۇبىلىس جانە جاڭا قوعامدىق جاعداي.

ەلىمىزدىڭ ساياسي مەنەدجمەنتىنىڭ جاڭا ءادىس-تاسىلدەرىنىڭ ناتيجەسىندە بالاما كوزقاراس قالىپتاسقان، ساياسي سايىستى جانە ەلىمىزدىڭ بۇگىنگىسى مەن بولاشاعى جونىندەگى اشىق اڭگىمە پىكىر الماسۋى ءۇشىن بارلىق جاعداي جاسالىپ وتىر.

الەۋمەتتىك جەلىلەر سايلاۋ پروتسەسسى، ءار-ءتۇرلى ساياسي پلاتفورمالار جونىندە ازاماتتاردىڭ ءوز پوزيتسياسىن اشىق جەتكىزۋ الاڭىنا اينالىپ وتىر. ازاماتتار ەلىمىزدەگى ساياسي پروتسەسستەر جونىندە پىكىر سايىس جاساي وتىرىپ، ءوز تالاپ-تىلەگىن جەتكىزۋ ونەرىن جاڭادان يگەرىپ جاتىر

ساياسي پروتسەستى ساراپتاما جاساۋ، بەلگىلى ءبىر قوعامدىق ماسەلەگە ءار-الۋان پىكىر، باسقاشا كوزقاراس قوعامدىق بولمىستىڭ جاڭا ترەندى بولىپ وتىر.

سايلاۋ بارىسىندا «كەلىسپەيتىندەردىڭ» داۋىسى دا ايقىن شىعۋدا. بىراق، ولاردىڭ داۋىسىن باسىپ جاتقان ەشقانداي كۇش جوق. ولار الەۋمەتتىك جەلى، ءار-ءتۇرلى بەيرەسمي الاڭدار ارقىلى ءوزىنىڭ ويىن اشىق جەتكىزۋگە مۇمكىندىك الىپ وتىر.

ادامدار سايلاۋ ناۋقانىنىڭ ءمان-مازمۇنىنا جاۋاپتى جانە پاراساتتى كوزقاراسپەن قاراپ، ەلىمىزدىڭ دامۋ باعىتىن وزگەرتۋ ءۇشىن ءار-ءبىر داۋىستىڭ ماڭىزدى ەكەندىگىن، ياعني، ەرتەڭ مەملەكەتتىڭ بەت-الپەتى قانداي بولادى، ساياسي جۇيەنى قاي باعىتقا وزگەرتۋ قاجەت دەگەن سۇراقتارعا وسى سايلاۋ ناۋقانىنىڭ تىكەلەي اسەر ەتەتىندىگىن تۇسىنە باستاعانداي.

ازاماتتاردىڭ باسىم كوپشىلىگى داۋىس بەرۋ ارقىلى مەملەكەتتى باسقارۋ كونستيتۋتسيالىق قۇقىن پايدالانۋ ماقساتىندا، سايلاۋ پروتسەسسىنە بەلسەندى قاتىسۋدا.

سايلاۋ ناۋقانى قوعامدىق كوزقاراستىڭ مايەگىنە اينالىپ، ازاماتتار اسحانادا، بازاردا، تاكسيدە وسى ماسەلەنى جان-جاقتى تالقىلاي باستادى. ءدال وسىنداي قىزۋ تالقىلانعان ۇلتتىق دارەجەدەگى سايلاۋ كوپتەن بەرى بولماعان.

ول كەزدەرى قوعامدا بارلىق ماسەلە الدىن-الا شەشىلىپ قويعان، حالىقتىڭ داۋىسى ماڭىزدى ەمەس دەگەن پىكىر باسىم بولعان ەدى.

وسى ترەندتتەردىڭ بارشاسى قوعامنىڭ ءوپتيميزمىن تۋعىزىپ وتىر، ءبىزدىڭ دەموكراتيا جولىمەن كەلە جاتقانىمىزدى، ساياسي جۇيەنىڭ تابيعي ەۆوليۋتسيا جولىمەن دامىپ كەلە جاتقاندىعىن كورسەتسە كەرەك.

ەرلان سايروۆ،
ساياساتتانۋشى

Abai.kz