قر پرەزيدەنتى قاسىم-جومارت توقاەۆ قوستاناي وبلىسىندا اۋىل شارۋاشىلىعى ماماندارىمەن وتكەن كەزدەسۋدە جەردىڭ شەتەلدىكتەرگە ساتىلمايتىنىن ايتتى. 

«جەر شەتەلدىكتەرگە ساتىلمايدى. بۇل مەنىڭ پرەزيدەنت رەتىندەگى بەرىك ۇستانىمىم!»، - دەدى مەملەكەت باسشىسى. بۇل تۋرالى ەل پرەزيدەنتىنىڭ ءباسپاسوز حاتشىسى بەرىك ءۋالي Facebook پاراقشاسىندا جازدى.

ءبارمىز بىلەتىندەي، 2016 جىلى ەلىمىزدە ۇلكەن جەر داۋى ورىن الدى. كوپشىلىك جەردىڭ شەتەلدىكتەرگە ساتىلماۋىن، جالعا بەرىلمەۋىن اشىق تالاپ ەتتى. Cول جىلدىڭ 24 ساۋىرىندە اتىراۋ قالاسىندا باستالعان نارازىلىق اكتسيالارى ەلىمىزدىڭ وزگە وڭىرلەرىندە دە جالعاسىپ، مامىر ايىنىڭ باسىندا ەل پرەزيدەنتى نۇرسۇلتان نازارباەۆ جەر كودەكسىندەگى رەزونانس تۋدىرعان زاڭ باپتارىنا موراتوري جاريالاعان ەدى.

ال جەر رەفورماسىن حالىقپەن بىرگە تالقىلاۋ ءۇشىن ۇكىمەت جانىنان قۇرىلعان ارنايى كوميسسيا اتالعان ءموراتوريدىڭ مەرزىمىن 2021 جىلدىڭ سوڭىندا دەيىن ۇزارتۋدى ۇسىندى. وسى ۇسىنىسقا ساي پرەزيدەنت نازارباەۆ 19 تامىزدا شەتەلدىكتەرگە جەردى جالعا بەرۋ تۋرالى زاڭعا 2021 جىلعا دەيىن موراتوري جاريالادى.

جەردى شەتەلدىكتەرگە جالعا بەرۋ تۋرالى زاڭعا موراتوري جاريالانعانىمەن، كوپشىلىكتىڭ كوڭىلىنەن كۇدىك كەتپەگەن بولاتىن. بەس جىلدىق موراتوري مەرزىمى اياقتالعان سوڭ قانداي شەشىم شىعادى دەگەن الاڭداۋشىلىق اركىمنىڭ ويىندا ءجۇردى. ەندى سول ۋايىمنىڭ بۇلتىن قاسىم-جومارت توقاەۆ ءسال دە بولسا سەيىلتكەندەي بولدى. پرەزيدەنت رەتىندەگى بەرىك ۇستانىمى جەردى شەتەلدىكتەرگە ساتپاۋ ەكەنىن اشىق ايقتان توقاەۆ حالىقتىڭ قالاۋى نە ەكەنىن ءدوپ باسقان سەكىلدى.

مەملەكەت باسىشىسىنىڭ مۇنداي پىكىر ايتۋى جەر ماسەلەسىنىڭ وڭ باعىتتا شەشىلەتىنىن بىلدىرسە كەرەك. ەگەر ماۋسىم ايىندا وتەتىن پرەزيدەنتتىك سايلاۋدا جەڭىسكە جەتسە، قاسىم-جومارت توقاەۆ وسى ۇستانىمىنا ساي جەر ماسەلەسىن تۇبەگەيلى شەشەدى دەگەن سەنىمدەمىز.

Abai.kz