پرەزيدەنتتىك سايلاۋ دوداسى شىرقاۋ شەگىنە جەتىپ، ۇگىت-ناسيحات كورىگى قىزدى قازىر. كوپشىلىك سەرگەك، داۋىس بەرسەم دەگەن قۇلشىنىس كۇشتى. بىراق ساياسي كۇشتەر كوپتى ەرتە الا ما، وعان دايار ما؟ ءاي، قايدام، ازىرگە جاعا جىرتىسىپ، ءبىرى بىرىنە پالەنى ءۇيىپ-توگۋدەن اساتىن ءتۇرى كورىنبەيدى. قازاق تاعدىرى، ۇلتتىق مۇددە قايدا؟ امال نە، ولار ەسكەرۋسىز، كولەڭكەدە قالۋدا.  دال قازىرگى مەزەتتە بىلمەستىكتەن ايىعۋ، باعىتتى ايقىنداپ الۋ اسا ماڭىزدى. اشىق حاتتى كوپكە سول ءۇشىن جولداپ وتىرمىز.

الدىمىزدا ەكى-اق باعىت بار، اعايىن. ءبىرىنشىسى – قازاق تاعدىرىنا سۋىق، ۇلتشىل ۇرپاق تاربيەلەۋگە مۇمكىندىك بەرمەيتىن قاساڭ باعىت، تار جول. ءورىستىلدى، رەفورماشىل بيلىك قولايى كەلسە، قازاقتى «قازاقستاندىق» قىلۋعا دايار تۇر. ونىڭ «ءۇش تىلدىلىك» (ۇرپاق سورى), «ۋربانيزاتسيا» (اۋىلعا سوققى) سياقتى ستراتەگيالىق جوسپارىنان جانىڭ تۇرشىگەدى. قۇر داڭعازاعا دا تويدىق.

ەكىنشىسى – ۇلت تاعدىرى، ۇلتتىق مۇددە كوزدەلگەن، كوكەيگە قونىمدى،  ءھار جانعا ۇعىمدى باعىت. بۇل باعىت ۇكىلەپ قوسقان وكىل – ءامىرجان قوسانوۆ. ونىڭ سايلاۋالدى پلاتفورماسىنىڭ «قازاق ءتىلىنىڭ كونستيتۋتسيالىق مارتەبەسىن قوعام ءومىرىنىڭ بارلىق سالاسىندا ورنىقتىرىپ، ونى قازاقستان حالقىن بىرىكتىرۋشى فاكتور رەتىندەگى ءرولىن كۇشەيتۋ» دەگەن، تەك جالعىز تارماعى ىسكە اسۋىنىڭ ءوزى عانا الاش كەلەشەگىنىڭ كەپىلى. قازاق حالقى قۋانسا، سول كەزدە  قۋانباق، «وي-حوي، پالەنشە ورىنعا شىقتىق!» دەگەن جالاڭ ۇرانعا ەمەس.

مىنەكي، الدا وسى ەكى باعىت تۇرعانىن ايتۋ بىزگە سەرت، ونى شىندىق دەپ قابىل الۋ كوپشىلىك – سىزدەرگە سەرت. قوس باعىتتان تاڭداۋ جاساۋ، ارينە، اركىمنىڭ ءوز ەركى.

وپپوزيتسيا وكىلى قوسانوۆتى بيلىك دوداعا قوستى. نەگە؟ سەنىمنەن جۇرداي بيلىككە ونىڭ  «ۇلت تاعدىرى – ۇلتتىق مۇددە» دەگەن باعىتى اداسقاندىق، انە، حالىق ونى قولدامادى دەپ جار سالۋ اۋاداي قاجەت. ەندى ساياساتىن زاڭدى تۇردە، ەشكىمدى تىپىر ەتكىزبەي جالعاستىرۋعا شەكسىز مۇمكىندىك تۋادى. ەندى ساياساتىمىز «سارابدال» دەۋگە دە، قارسى جاقتى باسىپ جانشۋعا دا قۇقىلى. بۇل ساياسات قۇربانى – قايمانا قازاق بولدى، بولا دا بەرمەكشى.

قۇرمەتتى سايلاۋشىلار مەن ساياسي توپ وكىلدەرى! تابيعاتتا بار، قوعامنىڭ دامۋىن قامتاماسىز ەتەتىن جالعىز كۇش-قۋات – ۇلتتىق مۇددە. بۇل اكسيوما. ايتپەسە جەر بەتىندەگىنىڭ كۇللىسى ۇلتتىق مەملەكەت قۇرار ما ەدى. قازاقستان حالقى الدىنداعى جاۋاپكەرشىلىكتى سەزىنىپ، وي-سانانى، رۋحتى تۇنشىقتىرعان جاساندى، قيالي جولدان باس تارتايىق. جان سارايىمىز سۇرانىسى – تابيعي جولىمىزعا تۇسەيىك! قۇزدىڭ جيەگىندە تۇرعان ۇلت تاعدىرى ءۇشىن كۇرەسەيىك، «ءاي-قاپ!» دەپ قاپى قالۋدى شاپشاڭ ۋاقىت كوتەرە الماسى انىق.

اسان وماروۆ،  عالىم-جۋرناليست

مۇتىكەن وشىباەۆ، ەڭبەك ارداگەرى، قارت ۇستاز

Abai.kz