جەكسەنبى, 5 اقپان 2023
3120 4 پىكىر 3 ماۋسىم, 2019 ساعات 11:58

الماتىدا ميتينگكە قاتىسقان بىرنەشە ايەل ۇيقاماققا الىندى

الماتى قالالىق تەرگەۋ سوتى 1 ماۋسىم كەشكە جالعىزباستى انا جازيرا دەمەۋوۆا جانە گۇلزيپا جاۋكەروۆاعا بۇلتارتپاس شاراسىن قولدانۋ بويىنشا شەشىم شىعاردى. سوت "ەلدە تىيىم سالىنعان ۇيىمنىڭ جۇمىسىنا قاتىستى" دەپ كۇدىككە ىلىنگەن ەكى ايەلدى ەكى ايعا ۇيقاماققا الدى.

سەنبى، 1 ماۋسىمدا تۇستەن كەيىن سوت ءدال وسىنداي كۇدىككە ىلىنگەن كوپ بالالى انا وكسانا شەۆچۋككە دە وسىنداي شەشىم شىعارعان ەدى. 48 جاستاعى جازيرا دەمەۋوۆا جانە 51 جاستاعى گۇلزيپا جاۋكەروۆانىڭ قۇقىعىن ادۆوكات گۇلنار جۋاسپاەۆا قورعادى. دەمەۋوۆانىڭ ءىسىن - سۋديا الما ابدىحالىقوۆا، ال جاۋكەروۆانىڭ ءىسىن سۋديا سىرىم جاقسىلىقوۆ قارادى.

ادۆوكات گۇلنار جۋاسپاەۆا سوتتان دەمەۋوۆانىڭ قامقورلىعىندا كامەلەتكە تولماعان بىرنەشە بالا ء(وز بالاسى جانە نەمەرەلەرى) بولعاندىقتان ۇيقاماقتان باسقا جازا قولدانۋدى سۇرادى. ەگەر بۇرىن دەمەۋوۆا ينتەرنەت ارقىلى ۇيدەن ىستەپ، قارجى تاپسا، ءتىنتۋ كەزىندە نوۋتبۋگىن الىپ العاندىقتان جالعىزباستى انا قيىندىق كورىپ وتىرعانىن ايتتى.

گۇلزيپا جاۋكەروۆانىڭ ەكى بالاسى بار. 18 جاستاعى ۇلكەنى كوللەدجدە وقيدى، كىشىسى - 9 جاستا. جۋاسپاەۆانىڭ ايتۋىنشا، دەنساۋلىعىنا بايلانىستى كىشىسىنە ەرەكشە كۇتىم كەرەك. جاۋكەروۆا سوتتا پاتەر جالداپ تۇراتىنىن، جالعا الۋ مەرزىمى 6 ماۋسىمدا اياقتالاتىنىن ايتتى. سوتتا ول وسىدان كەيىن لايىقتى پاتەر تابىلسا دا، ونى جالداۋعا شاماسى جەتپەيتىنىن جەتكىزدى.

جازيرا دەمەۋوۆا، گۇلزيپا جاۋكەروۆا جانە وكسانا شەۆچۋك - 1 مامىردا الماتىدا وتكەن رۇقسات ەتىلمەگەن نارازىلىق اكتسياسى كەزىندە ۇستالعان ونداعان ازاماتتىڭ ءبىرى. بۇل ءۇش ايەلدى 9 مامىردا وتكەن "ماڭگىلىك پولك" شەرۋى كەزىندە دە پوليتسيا ۇستاعان. مامىر ايىنىڭ ورتاسىندا ولاردىڭ قازاقستاندا سوت شەشىمىمەن تىيىم سالىنعان قوزعالىسقا قاتىسى بار دەگەن كۇدىككە ىلىنگەنى بەلگىلى بولدى.

Abai.kz

4 پىكىر