بەيسەنبى, 17 قازان 2019
819 1 پىكىر 3 ماۋسىم, 2019 ساعات 18:01

الماتىدا 50 شاقتى كوپبالالى جانۇيا «باقىتتى وتباسى» ارقىلى باسپانالى بولدى

جالپى، باعدارلاما باستالعالى 97 جانۇيا ءۇيلى بولعان. «باقىتتى وتباسى» باعدارلاماسى اياسىندا وسىمەن 97 جانۇيا قولجەتىمدى باسپاناعا قول جەتكىزىپتى. ءالى 200-دەن استام ءوتىنىش يەسىنىڭ قۇجاتتارى بانكتە قاراستىرىلىپ جاتىر، دەپ حابارلايدى Almaty.tv تىلشىسى.    

13 جىلدىڭ ءجۇزى قۇرقىلتايدىڭ ۇياسىنداي پاتەر جالداپ كەلگەن وسپانوۆتاردىڭ وتباسى ءۇشىن بۇگىن – ەرەكشە كۇن. ءۇيدىڭ ۇلكەندەرى تۇرماق، بالالارعا دەيىن كەڭ پاتەردە تۇراتىندارىنا ءدان ريزا. كوپبالالى جانۇيا بۇل باسپانانى «باقىتتى وتباسى» باعدارلاماسى ارقىلى قول جەتكىزگەن.

العاشقى جارناسىنا 500 مىڭ تەڭگە تولەگەن. قالعان 1 ميلليون تەڭگە قالالىق اكىمدىكتەن سەرتيفيكات رەتىندە بەرىلگەن. جىلدىق پايىزدىق مولشەرلەمەسى نەبارى 2 پايىز. وتباسى العاشقى 8 جىل – 80 مىڭ تەڭگەدەن، قالعان 7 جىل  – 55 مىڭ تەڭگە توڭىرەگىندە تولەيتىن بولادى.  ايتا كەتەيىك، پاتەرلەردىڭ قابىرعالارىن  ارلەۋ  جۇمىستارىن ءۇي يەلەرى ءوز قالاۋلارى بويىنشا جاسايدى ەكەن.

«ءتورتىنشىمدى بوسانعانشا 13 جىل پاتەردە تۇردىق. بىلايشا ايتقاندا، باسقا بىرەۋگە اقشامىزدى بەرىپ وتىردىق قوي. بۇل جەردە ءبىز وزىمىزگە تولەيمىز، وزىمىزدە قالادى. پاتەر جالداپ كەلگەندە 50-60 مىڭ تەڭگەدەن تولەپ كەلدىك. قالا بەردى، كوممۋنالدى تولەم تاعى بار. ءبارىبىر ءوز ءۇيىڭ بولعانعا نە جەتسىن؟!»، – دەدى ماريا سىزدىقوۆا.

بەس بالانىڭ اناسى سماعۇلوۆا نازىم دا الىپ شاھاردا 9 جىلدان بەرى باسپانا جالداپ كەلگەن. «باقىتتى وتباسى» باعدارلاماسىنىڭ شاراپاتىن ويلاماعان جەردەن كورسە كەرەك. قۇجاتتارىن قاجەتتى جەرلەرگە وتكىزگەن سوڭ، ءبىر ايدان كەيىن بانكتىڭ ماقۇلداعانىن ەستىگەندە، سەنەر-سەنبەسىمىزدى بىلمەدىك دەيدى ول. «ءوز ءۇيىم-ولەڭ توسەگىم» قاشان بولار ەكەن دەپ ارمانداپ كەلگەن بۇل وتباسى دا بۇگىننەن باستاپ ىشكى قۇرىلىس جۇمىستارىنا بىلەك سىبانا كىرىسىپ كەتىپتى.

«حالىققا قىزمەت كورسەتۋ ورتالىعىنا بارىپ، قۇجاتتارىڭىزدى وتكىزىپ كورىڭىزدەر دەگەن سوڭ، سولاي ەتتىك. ءبىر ايدان كەيىن سايت ارقىلى جاۋاپ كەلدى. مىنە، بۇگىن ەكى بولمەلى پاتەرگە قول جەتكىزىپ وتىرمىز. وتە باقىتتىمىز. ارينە، قۋانىشىمىز قوينىمىزعا سىيمايدى. ايتار العىسىمىز دا زور. قۋانىشىمىز قوينىمىزعا سىيماي جاتىر»، – دەيدى پاتەرلى بولعان نازىم سماعۇلوۆا.

ءتورت بالانىڭ اناسى جۇماقانوۆا باعلان دا وتباسىنا تيەسىلى 63 شارشى مەتر پاتەرگە يە بولدى. يپوتەكاعا الىنسا دا، تاپقان اقشامىزدى ءوز باسپانامىزعا قۇياتىنىمىز قۋانتادى دەيدى 15 جىل بويى جالدامالى ۇيگە 50 مىڭ تەڭگەدەن  تولەپ كەلگەن كەلىنشەك. ال، العاشقى جارنانىڭ 1 ميلليون تەڭگەسىن اكىمدىك تاراپىنان قاراستىرىلعانى ءتىپتى، ۇلكەن دەمەۋ بولدى دەيدى ول.

«ءبىز كوپبالالى وتباسى رەتىندە تۇرعىن ءۇي قۇرىلىس جيناق بانكىندە جىلدىق 2 پايىزبەن الىپ وتىرمىز. باستاپقى جارناسىن 10 پايىزىن تولىق تولەي الماعاندىقتان، مەملەكەت 1 ميلليون تەڭگە قاراستى. 500 مىڭدى ءوزىمىز قۇيدىق. بۇل باعدارلاما بىزگە جاقسى مۇمكىندىك سىيلادى»، – دەيدى باعلان جۇماقانوۆا.

ناۋرىز ايىنان باستاپ اشىلعان «باقىتتى وتباسى» قالالىق باعدارلاماسىنىڭ شاراپاتىن كورگەندەردىڭ قاتارى مول. سونىڭ ىشىندە ءدال وسى تۇرعىن ۇيگە قول جەتكىزگەندەردىڭ سانى باس-اياعى 97 جانۇيا. بۇگىندە 232 ءوتىنىش يەسىنىڭ قۇجاتتارى بانكتە قاراستىرىلىپ جاتىر. تولەم قابىلەتتىلىگىنەن سۇرىنبەي وتكەندەر، كەلەسى ايدىڭ باسىندا قونىس تويىن تويلاماق.

«الماتى قالاسى بويىنشا بۇگىندە 23 مىڭعا جۋىق ادام كەزەكتە تۇر. ونىڭ ىشىندە 1 700 كوپبالالى انا بار. «باقىتتى وتباسى» باعدارلاماسى باستالعالى بەرى 1 500 ادام قۇجاتتارىن تاپسىرىپ، سونىڭ 600-ءى ىرىكتەلىنىپ الىندى»، – دەيدى الماتى قالاسى تۇرعىن ءۇي ساياساتى باسقارماسى باسشىسىنىڭ ورىنباسارى ايبەك سايدىلداەۆ.

الماتى قالاسى تۇرعىن ءۇي ساياساتى باسقارماسى ماماندارىنىڭ ايتۋىنشا، باسپاناعا قول جەتكىزىپ جاتقان جانۇيالاردىڭ كوبىسى ءۇي كەزەگىنە  1-2 جىل بۇرىن عانا تۇرعاندار. ەگەر ولار، ءوز كەزەگىن كۇتكەندە ءالى 5-6 جىلداي ۋاقىت كەتەر ەدى دەيدى. ال، «باقىتتى وتباسى» باعدارلاماسى اشىلعالى بەرى ءبىر جىلدىڭ ىشىندە باسپانالى بولۋعا مول مۇمكىندىك بەرىلگەن. اتالعان باعدارلامانىڭ تاعى ءبىر وڭتايلى تۇسى – جانۇيا قالاعان پاتەرىن تاڭداي الادى.

Abai.kz

1 پىكىر