جاڭا تراسسا كوسمودرومنىڭ سولتۇستىك بولىگىندە جايعاسقان. وعان سايكەس، زىمىران قالدىقتارى قوستاناي وبلىسىنا تۇسەدى. بۇل ايماق رەسەي مەن قازاقستان اراسىنداعى كەلىسىمدە كورسەتىلمەگەن. بل جونىندە "ناستوياششەە ۆرەميا" تەلەكانالى حابارلايدى.

ماقۇلدانعان ءماتىن قۇقىقتىق اقپاراتتار سايتىندا جاريالاندى. كەلىسىم بەس جىلعا تۇزىلگەن.

قۇجاتقا سايكەس، "سويۋز-2" زىمىراندارى بايقوڭىردان 1 ساۋىردەن 30 ماۋسىمنان باسقا ۋاقىتتا جىل سايىن ۇشىرىلادى.

كەلىسىم سونىمەن بىرگە روسكوسموس پەن جالعا الۋشى "بايتەرەك" رەسەي-قازاق بىرلەسكەن كاسىپورنىنا تازالاۋ جۇمىستارىن جۇرگىزەر كەزدە جەرگىلىكتى بيلىككە الدىن الا ەسكەرتۋدى مىندەتتەيدى. مۇنان بولەك رەسەي تاراپىنا زىمىران قالدىقتارى تۇسكەننەن كەيىن ۋلانعان اۋماقتى تازالاۋ جۇكتەلگەن.

رەسەي جاڭا اۋماقتى جالعا العانى ءۇشىن قازاقستانعا جىل سايىن 460 مىڭ دوللار تولەيدى. ەگەر ۇشىرىلعان زىمىران سانى كەلىسىمنەن كوپ بولسا، وندا قوسىمشا ءاربىر زىمىران ۇشىرعانى ءۇشىن 50 مىڭ دوللار تولەيدى.

رەسەيدىڭ قازاقستانمەن "سويۋز-2" زىمىران قالدىقتارىن قۇلايتىن جاڭا جەردى جالعا الۋ ءۇشىن كەلىسىم جۇرگىزىپ جاتقانى 2018 جىلدىڭ باسىندا بەلگىلى بولعان.

ەكولوگتاردىڭ ايتۋىنشا، قازاقستان بيلىگى زىمىران قالدىقتارىنا قوستاناي وبلىسىنىڭ جانگەلدى اۋدانىن بەرگەن. بۇل اۋداننىڭ ماڭىندا "التىن دالا" تابيعي قورىعى ورنالاسقان. حالىق بۇل جەرگە زىمىران تۇسەتىن بولسا، كيىك قىرىلىپ قالادى دەپ دابىل قاعادى.

قازاقستان بيلىگى بولسا زىمىراننىڭ قۇلاۋى كيىكتەرگە زيان كەلتىرمەيدى دەپ ەسەپتەيدى.

Abai.kz