"كوك تۋدىڭ جەلبىرەگەنى" ءانىنىڭ ءسوزى قالاي جازىلدى؟
رامىزدەر دەگەندە، ءجيى كوزگە شالىناتىنى، ارينە، ەلدىڭ بايراعى ەمەس پە. وسىندايدا «كوك تۋدىڭ جەلبىرەگەنى» ءانى ەرىكسىز ويعا ورالادى. ايگىلى ءاننىڭ اۆتورى، اقىن الماس احمەتبەك باسپاسوزگە بەرگەن سۇحباتىندا كوك تۋىمىزدىڭ كوڭىل تولقىتاتىن ەرەكشە قاسيەتى بارىن ايتادى.
– 1993 جىلى ازاتتىقتىڭ ون ءتورتىنشى ايىندا العاش رەت تۋعان ەلىمنىڭ توپىراعىنا تابانىم تيگەندە، «قورعاس» بەكەتىنەن جەلبىرەگەن تۋىمىزدى كوردىم. تۋدىڭ قۇدىرەتى جۇرەگىمدى شارپىپ وتكەندەي بولدى. ادامداردىڭ اسقاق سەزىمىن اسپاننان اعىل-تەگىل شاشىپ، مەملەكەتتىلىگى بار ەل ەكەنىن مەڭزەپ تۇرعان تالاي جۇرتتىڭ جەلبىرەپ تۇرعان جالاۋىن كورىپ ءجۇرمىز، بىراق سول ساتتە كوز الدىمدا تۇرعان تۋ مەن ءۇشىن باسقا ەدى. اقىندا اياقاستى كەلەتىن الاقۇيىن سەزىم، شالقىپ كەلەتىن شابىت دەگەن بولادى. تاپ سول ساتتە تۋ ماعان عانا ارناپ ءتىل قاتىپ تۇرعانداي كورىندى. سونداي كوڭىل كۇيدىڭ اسەرىمەن جازىلعان ولەڭنىڭ العاشقى شۋماعى:
– كوك تۋدىڭ جەلبىرەگەنى
باقىتتىڭ ەلجىرەگەنى،
قيىردا قالعان قازاقتىڭ
اتا جۇرتىنا جەتە الماي
كوزىنىڭ مولدىرەگەنى، – دەپ ءورىلدى.
كەيىن ساحنادان وقىعان كەزىمدە جارق ەتىپ، جاي ءتۇسىرىپ وتەتىندەي وتتى ولەڭ بولعانىن سەزىنىپ ءجۇردىم. كەيىن ەلىمىزدەگى تانىمال سازگەرلەر بۇل ولەڭگە اندەر جازا باستادى.
ءسابيت تاستانبەكتىڭ facebook پاراقشاسىنان
Abai.kz
