سارسەنبى, 17 شىلدە 2019
ادەبيەت 4818 40 پىكىر 15 ماۋسىم, 2019 ساعات 11:30

پرەزيدەنت توقاەۆ جازۋشىلار وداعىنا ەكى كولىك سىيلادى

بۇگىن، 15 ماۋسىم كۇنى قر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا قازاقستان جازۋشىلار وداعىنا قىزمەتتىك ساپارمەن كەلدى.

كەزدەسۋدە ايدا بالاەۆا ۇلتتىق رۋحاني الەۋەتتى ىلگەرىلەتۋ ىسىندە اقىن-جازۋشىلار قاۋىمى ماڭىزدى ءرول اتقاراتىنىن ايتا كەلىپ، شىعارماشىلىق تۇلعالاردىڭ ەل ءۇشىن اتقارعان جۇمىستارىن جوعارى باعالادى.

سونىمەن قاتار، پرەزيدەنت قاسىم-جومارت توقاەۆتىڭ ارنايى سالەمىن جەتكىزىپ، قازاقستان جازۋشىلار وداعىنىڭ قۇرىلعانىنا 85 جىل تولۋىنا وراي مەملەكەت باسشىسى سىيلاعان قوس كولىكتىڭ كىلتىن تابىستادى.

بيىل مامىر ايىندا قاسىم-جومارت توقاەۆ قازاقستان جازۋشىلار وداعىنىڭ توراعاسى ۇلىقبەك ەسداۋلەتتى قابىلداعان بولاتىن. ال بۇگىن جازۋشىلار وداعىنا ۇلكەن سىي جاساپ وتىر. وسىنىڭ ءبارى پرەزيدەنت توقاەۆتىڭ ەل رۋحانياتى مەن مادەنيەتىنە باسا ءمان بەرەتىنىن كورسەتەدى.

ءسوز رەتى كەلگەن سوڭ ايتا كەتەيىك، جازۋشىلار وداعى بىلتىرعى جىلى حالىقارالىق دەڭگەيدە بىرنەشە ءىس-شارا ۇيىمداستىردى. ەلوردامىزعا الدىمەن اقىندار كەلىپ، الەمدىك استانالارعا ارنالعان ءداستۇرلى پوەزيا فەستيۆالىن وتكىزدى. سودان كەيىن ىلە-شالا ازيا مەن ەۋروپانىڭ قالامگەرلەرى باس قوسقان حالىقارالىق فورۋم بولدى. الماتى مەن ەلوردامىزعا ءسويتىپ، ساياساتكەرلەر مەن ەكونوميستەر عانا ەمەس، اقىن-جازۋشىلار كەلە باستادى. وسىنىڭ ءبارىن جازۋشىلار وداعى قارا جاياۋ ءجۇرىپ جاساي الدى. ءيا، راس، ءبىر كەزدە اتاعى دۇرىلدەگەن وداق نارىقتىڭ قىسپاعىندا تىزەسى دىرىلدەگەن شاعىن ۇيىمعا اينالىپ قالىپ ەدى. وداق باسشىلارىنىڭ جاياۋ جۇرگەندەرىنىڭ ناقتى سەبەبى وسىدان كەپ شىعادى.

ايتپاقشى، وتكەن بەيسەنبىدە جازۋشىلار وداعىنا قاراعان شىعارماشىلىق ءۇيى قايتا جاساقتالىپ، شيپاجايعا اينالدى. شيپاجاي كوپشىلىككە جانە قالامگەرلەرگە قىزمەت كورسەتەدى.

Abai.kz

40 پىكىر