نۇر-سۇلتان قالاسىنا قازاقستاننىڭ تۋى تارىزدەس كوپىر-عيماراتى سالىنادى. “كۇن مۇناراسى”  («Tower of the Sun»)  دەپ اتالاتىن بۇل نىسان ەسىل وزەنىنىڭ بويىندا ورنالاسپاق. ازىرگە بۇل جوباعا قانشا قارجى كەتەتىنى بەلگىسىز.

جاڭا عيماراتتىڭ ديزاينى قازاقستاندىق BI Group كومپانياسى ءۇشىن “Fundamental Architects” روتتەردام مەن “Omega Render” 3D ۆيزۋاليزاتسيا ستۋدياسىندا ازىرلەنگەن.

نىساننىڭ جالپى اۋماعى 75 مىڭ كۆادرات مەتردى قۇرايدى. ول ەسىل وزەنىن بويلاي اقوردا سارايىنىڭ جانىنا سالىنادى.

ال، اتالعان جوبا تۋرالى “Omega Render” ستۋدياسى Instagram پاراقشاسىندا:

عيماراتتىڭ بيىكتىگى 121 مەتر بولادى. مۇندا تۇرعىن ۇيلەر، وفيستەر، قوناق ۇيلەر مەن بيزنەس ورتالىقتار بولادى، - دەپ جازعان.

بۇل نىساننىڭ ورتاسىنداعى ۇلكەن شەڭبەر قازاقستاننىڭ تۋىنداعى كۇنگە ۇقسايدى. سول كۇننىڭ اشىلۋى ارقىلى اق وردانىڭ كورىنىسىن كورۋگە بولادى-مىس. اتالعان جوبانىڭ ساۋلەتشىسى روتتەردام ستۋدياسىنىڭ بىلىكتى مامانى ۆلاديمير كونوۆالوۆ. مەنەدجەرى - “Omega Render” ستۋدياسىنان ارتەم كۋپريانەنكو.

سونىمەن قاتار، «استانا قالاسىنىڭ رەسمي ارحيتەكتۋرالىق قوعامداستىعىنىڭ” Dezeen باسىلىمى: “كۇن مۇناراسىنىڭ”  توبەسىنەن نۇر-سۇلتانعا قارايتىن قوعامدىق تەرراسالار اشىلادى. ساۋلەتشىلەر عيماراتتىڭ ەنەرگيانى تۇتىنۋ مولشەرىن بارىنشا از پايدالاناتىنداي ەتىپ جاساماق. گيدروەنەرگيانى ءوندىرۋ ءۇشىن ەسىل وزەنىن تارىلتىپ، ونىڭ اعىنىن ۇلعايتۋ كەرەك”، - دەپ جازادى.

ودان بولەك، بيىكتىگى 42 قاباتتى ەكى مۇنارا سالىنۋى مۇمكىن.

بۇل جوبانىڭ اۆتورى -  BENOY LTD كومپانياسىنىڭ لوندون ساۋلەت بيۋروسى. اتالعان مۇنارا نۇر-سۇلتانداعى ترياتلون پاركى مەن “جەتىسۋ” ساياباعىنا ورناتىلماق.

جالپى، ەسىلدىڭ بويىنداعى ەركە قالانىڭ سۇلۋلىعى ءۇشىن مەملەكەت از شىعىندالىپ جاتقان جوق. بىلتىر عانا 20-عا تولعان تويىنا 19 ميللياردقا جۋىق اقشانى ويلانباي شاشتى. شەت ەلدىڭ ەڭ ۇزدىك ءانشى-ارتىستەرىن شاقىرىپ تاعى ىسىراپقا جول بەردى. بۇعان ءار ءوڭىردىڭ جاساعان تارتۋ-تارالعىسىن قوسىڭىز. استاناعا سىيلانعان سول ءىرى كوپىر، ساياباق، تاريحي مونۋمەنتتەردىڭ بارلىعىن نۇرسۇلتان نازارباەۆ ءوزى قابىلداپ الدى.

ماسەلەن، استانا ساياباعىنا دانيال احمەتوۆ باستاعان شىعىس قازاقستان وبلىسى قۇنى 1 ميلليارد تەڭگە بولاتىن مۋزىكالىق فونتان ورناتىپ بەردى. ول سۋبۇرقاق ءتۇرلى تۇسكە بويالىپ، ءان سالاتىن كورىنەدى.

قاراعاندى وبلىسى “قازاق ەلىنە مىڭ العىس” دەپ اتالاتىن تاريحي مونۋمەنت تارتۋ ەتكەن. ال، الماتىلىقتار الما تولى ساياباق سىيلادى. الماتى وبلىسى جەتىسۋدىڭ بارلىق تۋريستىك وبەكتىلەرى كورىنىپ تۇراتىن «جەتىسۋ» ساياباعىن سالىپ بەردى.

سول ءدۇبىرلى تويدا ەكس-پرەزيدەنتتى تاعى ءبىر قۋانتقان ەرەكشە سىيلىق - اتىراۋ وبلىسى تارتۋ ەتكەن قۇنى 6 ميلليارد تەڭگە بولاتىن “اتىراۋ كوپىرى” بولدى. ءپىشىنى بالىققا ۇقساس وتكەل ەسىلدىڭ وڭ جاعالاۋى  مەن سول جاعالاۋىن جالعايدى. ونىڭ ۇزىندىعى 313 مەتر. ونى ن.نازارباەۆ “باس قالانىڭ كوركىن ودان سايىن اجارلاندىرعان ساۋلەتى ەرەكشە وتكەل” دەپ قاتتى ريزا بولدى.

ال، وسى شاشىلعان ميللياردتاردان قاراپايىم حالىققا قانداي پايداسى بار؟ ءالى كۇنگە گاز تاپشىلىعىن تارتىپ وتىرعان استانا مەن ونىڭ ىرگەسىندەگى اۋىلدار 565 ميلليارد تەڭگە جۇمسالعان ەكسپو-نىڭ يگىلىگىن نەگە كورە المادى؟ ال، ۇكىمەتتىڭ، قۇرىلىسى باستالماي جاتىپ توقتاعان استانا LRT نىسانىنا قارجىنى ەل ىشىنەن ىزدەيمىز دەگەنىن قالاي تۇسىنۋگە بولادى؟

ءتۇيىن

قازىر نۇر-سۇلتاندا كوپ بالالى انالار ءۇشىن باسپانا مەن الەۋمەتتىك جاعدايدىڭ شەشىلگەنى ماڭىزدى. ەندەشە انالاردىڭ كوز جاسىن ەلەمەي "كۇن مۇناراسىن" سالماق بولىپ جاتقانىمىز قالاي؟ ارينە، باس قالامىزدىڭ كوركەيە تۇسۋىنە قارسى ەمەسپىز. سوندا دا، 4 ايدان بەرى بوس ۋادەگە تويعان انالار اشىنسا، ولاردىڭ ارىنىن "كۇن مۇناراسى" باسا المايتىنىن نەگە ۇقپايمىز؟. ءبىزدىڭ ويىمىزشا، سۋ جاڭا اكىم التاي كولگىنوۆ پەن الەۋمەت ءمينيسترى بەردىبەك ساپارباەۆ وسىنى بيلىككە ءبىر مارتە ەسكەرتۋى كەرەك. ىشەرگە اس، قونارعا جاي تاپپاعان اتا-انالاردىڭ كوز جاسىن قۇرعاتپاي جاتىپ "كۇن مۇناراسىنا" قۇمارتۋ جاقسىلىقتىڭ نىشانى ەمەس.

نۇربيكە بەكسۇلتانقىزى

Abai.kz