تۇركىستان وبلىستىق اكىمدىگىنىڭ ەسەبىنشە، جارىلىستان كەيىن كەم دەگەندە 31 ادام اۋرۋحاناعا جەتكىزىلگەن.

بريفينگىدە قورعانىس ءمينيسترى نۇرلان ەرمەكباەۆ جارىلىس ءالى جالعاسىپ جاتقانىن، قاۋىپ سەيىلمەگەنىن حابارلادى. ءمينيستردىڭ سوزىنشە، اسكەري قويماداعى جارىلىس بىرنەشە كۇنگە سوزىلۋى مۇمكىن.

"رادياتسيالىق سناريادتار بولمادى. رادياتسيا قاۋپى جوق" دەدى ەرمەكباەۆ.

بريفينگىدە توتەنشە جاعداي كوميتەتىنىڭ وكىلدەرى تۇرعىنداردان ۇيلەرىنە بارماۋدى سۇرادى. كوميتەتتىڭ حابارلاۋىنشا، قويما ماڭى ءالى ورتەنىپ جاتىر.

ومىرزاق شوكەەۆتىڭ سوزىنشە، "1616 ادام بيلىك ۇسىنعان كولىكتەرمەن ەۆاكۋاتسيالانعان. ال ونداعان مىڭ تۇرعىن وزدەرى ءارتۇرلى جولمەن قالانى تاستاپ كەتكەن".

Reuters جانە AP حالىقارالىق اقپارات اگەنتتىكتەرى ارىس قالاسىنان ونداعان مىڭ ادام قالادان كەتكەنىن حابارلادى.

24 ماۋسىم تاڭەرتەڭ ارىستاعى اسكەري قويمادا جارىلىس بولدى. ىشكى ىستەر مينيسترلىگىنىڭ حابارلاۋىنشا، ارىستاعى قازاقستان قارۋلى كۇشتەرى بولىمدەرىنىڭ بىرىندە ءورت شىعىپ، سالدارىنان اسكەري وق-ءدارى جارىلعان. قازاقستان ۇكىمەتى العاشىندا "جارىلىستان زارداپ شەككەندەر جوق" دەپ حابارلاعان.

كەيىن ارىس قالاسىنداعى اسكەري قويماداعى جارىلىستان زارداپ شەككەنونداعان ادام شىمكەنتتەگى №1 قالالىق اۋرۋحاناعا جەتكىزىلگەنى حابارلاندى. اۋرۋحانا باس دارىگەرى ابىلاي دونباي ءحالى اۋىر ءۇش ادام جان ساقتاۋ بولىمىنە جاتقىزىلعانىن ايتتى. بۇدان بولەك، وتىرار اۋدانىنداعى ورتالىق اۋرۋحاناسىندا ارىستاعى جارىلىستان جاپا شەككەن 34 ادامعا مەديتسينالىق كومەك كورسەتىلگەن.

قازاقستان بيلىگى 800 سارباز مەن وبلىستىق پوليتسيا دەپارتامەنتىنەن جۇزدەگەن پوليتسەي ارىس قالاسىنا جىبەرىلگەنىن مالىمدەدى. اسكەريلەر مەن پوليتسەيلەر ارىس تۇرعىندارىنىڭ ءۇيىن كۇزەتىپ، قالانىڭ قاۋىپسىزدىگىن قامتاماسىز ەتەدى. ​

ءىىم ارىستاعى جارىلىسقا بايلانىستى قىلمىستىق كودەكستىڭ "قارۋ جانە قاۋىپتى زاتتاردى ساقتاۋ ەرەجەسىن بۇزۋ" بابى (462-باپ، 1-تارماق) بويىنشا ءىس قوزعادى.

ارىستا بۇعان دەيىن دە بىرنەشە رەت جارىلىس بولعان. ون جىل بۇرىن، 2009 جىلى ناۋرىزدا ارىستاعى قويمادا جارىلعىش زاتتار جارىلىپ، ساقتاۋلى تۇرعان قارۋ-جاراق اتىلعان. وقيعا كەزىندە ءتورت ادام قازا تاۋىپ، جيىرماعا تارتا ادام جاپا شەككەن ەدى. رەسمي بيلىك جارىلىسقا قويماداعى قارۋدىڭ دۇرىس ساقتالماۋى مەن جارىلعىش زاتپەن دۇرىس جۇمىس ىستەمەۋ سەبەپ بولدى دەپ مالىمدەگەن.

2014 جىلى ارىس قالاسىنداعى "قازاقجارىلىسونەركاسىبى" اكتسيونەرلىك قوعامى اۋماعىندا جارىلىس بولىپ، ەكى ادام قازا تاپقان.

2015 جىلى قاراشادا قالاداعى پوليگون اۋماعىندا جارىلىس بولىپ، ءبىر ادام مەرت بولدى. رەسمي اقپارات بويىنشا، جارىلىس اسكەري وق-دارىلەر مەن ءوندىرىس قالدىقتارىن جويۋ كەزىندە بولعان.

43 مىڭعا جۋىق ادام تۇراتىن ارىس قالاسى شىمكەنتتەن 97 شاقىرىم جەردە جاتىر.

Abai.kz