سەيسەنبى, 27 شىلدە 2021
1993 4 پىكىر 25 ماۋسىم, 2019 ساعات 16:41

م.اشىمباەۆ: سىن-ساعاتتا بىرلىكتىڭ بيىگىنەن كورىنگەن حالىقتىڭ ارەكەتى كوڭىل قۋانتادى

«Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ارىستاعى اپاتتان زارداپ شەككەن ازاماتتارعا پارتيا تاراپىنان جۇيەلى كومەك كورسەتىلىپ جاتقانىن ايتتى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جازدى.

«ايتىپ كەلمەگەن اپات ارىستاعى اعايىنعا عانا ەمەس، بۇكىل الاشقا اۋىر سوققى بولىپ ءتيدى. ءاپ-ساتتە ابىگەر كۇيگە تۇستىك. بىراق بايبالامعا بارماي، وسى كەلەڭسىزدىكتى وزدەرىنىڭ جەكە ماقساتتارىنا پايدالانعىسى كەلەتىندەرگە جول بەرمەۋىمىز كەرەك. ول ءۇشىن ارينە، قانداي جاعداي بولسا دا ەلدىك پەن بىرلىكتى تۋ ەتىپ ارەكەت ەتەتىن ادەتىمىزگە سالىپ، جۇدىرىقتاي جۇمىلۋىمىز قاجەت. ويتكەنى «جۇمىلا كوتەرگەن جۇك جەڭىل». قازىردىڭ وزىندە ەلىمىزدىڭ بارلىق وڭىرىنەن ارىسقا قاراي كومەك كەرۋەنىنىڭ لەك-لەگىمەن اعىلىپ جاتقانىن كورىپ وتىرمىز. سىن-ساعاتتا بىرتۇتاستىقتىڭ بيىگىنەن كورىنە بىلگەن حالىقتىڭ بۇل ارەكەتى كوڭىل قۋانتادى»، – دەلىنگەن جازبادا.

سونداي-اق «Nur Otan» پارتياسى توراعاسىنىڭ ءبىرىنشى ورىنباسارى وسى يگى ىستە «Nur Otan» پارتياسىنىڭ دا بەلسەندىلىك تانىتىپ جاتقانىن جازادى.

«العاشقىلاردىڭ ءبىرى بولىپ كەشە پارتيامىزدىڭ قاراعاندى وبلىستىق فيليالى ازىق-تۇلىك، كيىم-كەشەك جانە باسقا دا كەرەك-جاراقتاردان تۇراتىن 10 توننا گۋمانيتارلىق كومەك جىبەردى. پارتيانىڭ مۇرىندىق بولۋىمەن قىزىلوردا، اقتوبە، پاۆلودار، قوستاناي جانە سولتۇستىك قازاقستان وبلىستارىنان دا اۆتوكەرۋەندەر جولعا شىقتى. سونىمەن قاتار پارتيامىزدىڭ اقمولا وبلىستىق فيليالى ششۋچينسك-بۋراباي دەمالىس ورىندارىندا ارىستىق 100 بالانىڭ دەمالىسىن قامتاماسىز ەتەدى. پاۆلودار وبلىسى دا جازعى ماۋسىمدا 300 بالانىڭ دەمالىسىنا جاعداي جاساۋعا دايىن. وسىعان بايلانىستى بالالاردىڭ ءتىزىمىن جاساقتاۋ جۇمىستارى دا باستالىپ كەتتى»، – دەيدى ماۋلەن اشىمباەۆ.

سونىمەن قاتار ول پارتيا جانىنداعى بالالار قۇقىعىن قورعاۋ جونىندەگى رەسپۋبليكالىق كەڭەستىڭ وكىلدەرى، سونىڭ ىشىندە بىلىكتى پسيحولوگ ماماندار اپات بولعان وڭىرگە ارنايى بارىپ، زارداپ شەككەن اتا-انالار مەن بالالارعا جان-جاقتى كومەك كورسەتىپ جاتقانىن جانە ايماقتاعى ەرىكتىلەردىڭ باسىن قوسىپ ارەكەت ەتكەن جاسوتاندىقتاردىڭ بەلسەندىلىگىن اتاپ وتكەن.

ودان بولەك، «Nur Otan» پارتياسىنىڭ مۇشەلەرى، كاسىپكەر ازاماتتار دا بۇل جاعدايعا بەيجاي قاراماي، كومەك قولىن سوزىپ جاتىر. اتاپ ايتقاندا، اقتوبە وبلىستىق ءماسليحاتىنىڭ دەپۋتاتى، «Nur Otan» پارتياسى ساياسي كەڭەسىنىڭ مۇشەسى ت.ەسەنعۇلوۆ توتەنشە جاعدايدان زارداپ شەككەن ازاماتتارعا كومەك كورسەتۋ ماقساتىندا 50 ميلليون تەڭگە قاراجات بولگەن. پارتيا ساياسي كەڭەسىنىڭ تاعى ءبىر مۇشەسى، اتىراۋلىق كاسىپكەر 1 ميلليون تەڭگە كولەمىندە قارجىلاي قولداۋ كورسەتسە، شىمكەنت قالالىق ءماسليحاتىنىڭ دەپۋتاتى، «Nur Otan» پارتياسى فراكتسياسىنىڭ مۇشەسى شىڭعىس قوزباقوۆ 2 ميلليون تەڭگە اۋدارعان.

اپاتتىڭ سالدارىنان تەمىر جولداعى قوزعالىستار شەكتەلىپ، كەيبىر جولاۋشى پويىزدارىنىڭ كىدىرۋگە ءماجبۇر بولعانى بەلگىلى. سوعان بايلانىستى پارتيانىڭ قىزىلوردا وبلىستىق فيليالىنىڭ ۇيىمداستىرۋىمەن كىدىرگەن 5 پويىزداعى 1200 جولاۋشىعا اۋىز سۋ مەن ىستىق تاماق تەگىن تاراتىلدى. سونداي-اق 15 جولاۋشىعا قاجەتتى مەديتسينالىق كومەك كورسەتىلدى.

Abai.kz

4 پىكىر