بۇل تۋرالى «Nur Otan» پارتياسى توراعاسىنىڭ ءبىرىنشى ورىنباسارى اپات بولعان ايماققا ارنايى كەلىپ، زارداپ شەككەن ازاماتتارمەن كەزدەسۋىندە ايتتى.

ساپار بارىسىندا ول قاۋىپسىز جەرگە كوشىرىلگەن تۇرعىندارمەن كەزدەسىپ، اپاتقا بايلانىستى قۇرىلعان وبلىستىق جەدەل شتابتىڭ جۇمىسىمەن تانىستى. سونداي-اق گۋمانيتارلىق كومەك بويىنشا وزگە وڭىرلەردەن كەلگەن زاتتاردى قارسى الۋ جۇمىستارىنا قاتىسىپ، زارداپ شەككەن اتا-انالارمەن جانە بالالارمەن جۇمىس ىستەپ جاتقان پسيحولوگ ماماندارمەن كەزدەستى.

ورداباسى اۋدانى تورەارىق اۋىلىنداعى تاۋكە حان مەكتەبىنە ارىس تۇرعىندارىنىڭ ءبىر توبى ۋاقىتشا ورنالاستىرىلعان. ولارمەن كەزدەسكەن پارتيا توراعاسىنىڭ ءبىرىنشى ورىنباسارى اپاتتىڭ ايتىپ كەلمەيتىنىن نازارعا الىپ، جاعدايدىڭ باقىلاۋدا ەكەنىن جانە قالانى قايتا قالپىنا كەلتىرۋ جۇمىستارى جۇيەلى تۇردە جۇرگىزىلەتىنىن تىلگە تيەك ەتتى.

– قازىر بارشا قازاقستاندىقتار سىزدەرمەن بىرگە. بۇل توتەنشە جاعداي قازاقستاندىقتاردى ودان ءارى بىرىكتىرىپ، ۇيىستىرا تۇسكەنىن كورىپ وتىرمىز. وسى جەردە ءوز ەركىمەن كەلىپ، قولداۋ كورسەتىپ جۇرگەن بەلسەندى ازاماتتار دا وتە كوپ. بۇل ءبىزدىڭ بەكەم بىرلىگىمىزدىڭ جارقىن كورىنىسى. ءبىزدىڭ كۇشىمىز – بىرلىكتە. سوندىقتان بۇل سىننان دا مويىماي، ەڭسەمىزدى تىك ۇستاپ شىعاتىنىمىزعا كامىل سەنەمىن، – دەدى ماۋلەن اشىمباەۆ.

سونىمەن قاتار ول اپاتتىڭ زارداپتارىن جويۋ ىسىنە «Nur Otan» پارتياسىنىڭ بەلسەندى قاتىسىپ جاتقانىن ايتتى. ونىڭ ايتۋىنشا، قازىردىڭ وزىندە پارتيانىڭ مۇرىندىق بولۋىمەن ەلىمىزدىڭ 9 وبلىسىنان 340 توننادان استام گۋمانيتارلىق كومەك كەلگەن.

– پارتيا تاراپىنان بۇل جۇمىستار ءارى قاراي دا جالعاسادى. ەندى ءبىز قۇرىلىس ماتەريالدارىن كوبىرەك جىبەرۋدى قاراستىرامىز. قازىر جاعداي تۇراقتى. ەڭ باستىسى ادامداردىڭ قاۋىپسىزدىگىن قامتاماسىز ەتۋ. سوعان بايلانىستى قازىر ايماقتا بارلىق ءتيىستى ورگانداردىڭ قارقىندى جۇمىس ىستەپ وتىرعانىن كورىپ وتىرمىز. بەلسەندى ازاماتتار تاراپىنان دا قارجىلاي قولداۋ ءتۇسىپ جاتىر. پارتيا جينالعان قاراجاتتىڭ جۇمسالۋىن اشىق ءارى ءادىل جۇرگىزىلۋىن باقىلاۋدا ۇستايدى، – دەدى ماۋلەن اشىمباەۆ.

سونداي-اق ول توتەنشە جاعدايعا بايلانىستى قۇرىلعان جەدەل شتابتىڭ جۇمىسىمەن تانىستى. ودان بولەك، زارداپ شەككەن بالالارمەن جۇمىس ىستەپ جاتقان پارتيا جانىنداعى بالالار قۇقىعىن قورعاۋ جونىندەگى رەسپۋبليكالىق كەڭەستىڭ پسيحولوگ ماماندارىمەن كەزدەستى.

Abai.kz