بۇگىن سىرداريا اۋدانىنىڭ ورتالىعى تەرەڭوزەك كەنتىندە دەمەۋشىلەردىڭ قاراجاتى ەسەبىنەن مەملەكەتتىك رامىزدەر اللەياسى اشىلدى، -دەپ حابارلايدى اباي-اقپارات.

سالتاناتتى شاراعا قاتىسقان وبلىس اكىمىنىڭ ورىنباسارى رۋسلان رۇستەموۆ:

– كەز كەلگەن ەلدىڭ ەلدىگىن، مەملەكەتتىڭ مارتەبەسىن ايقىندايتىن باستى قۇندىلىقتارى بولادى. ول – ەلدىڭ شەكاراسى، استاناسى جانە مەملەكەتتىك رامىزدەرى. تۇڭعىش پرەزيدەنتىمىز نۇرسۇلتان ءابىشۇلى نازارباەۆتىڭ: «تاۋەلسىزدىك – التىن كۇمبەز دەيتىن بولساق، سول كۇمبەزدى تىرەپ تۇرعان ءتورت بەلگى رامىزدەرىمىز بار، ونىڭ ءبىرىنشىسى – ەلتاڭبا، ەكىنشىسى – ءانۇران، ءۇشىنشىسى – كوك بايراق، ءتورتىنشىسى – قازاق ءتىلى» دەگەن حالىق جۇرەگىنەن ورىن العان دانا ءسوزى بار. رامىزدەر حالىقتىڭ رۋحى مەن ايباتىن ءبىلدىرىپ قانا قويماي، سول مەملەكەتتىڭ الەمدىك وركەنيەت كوشىندەگى ورنى مەن دەڭگەيىن دە بەلگىلەيدى. بۇگىن، مىنە، اۋدان ورتالىعىنان كوك بايراعىمىزدى بيىككە كوتەرىپ، مەملەكەتتىك رامىزدەر الاڭى اشىلۋدا. الاڭنىڭ اشىلۋ سالتاناتىمەن بارشاڭىزدى قۇتتىقتايمىن،- دەدى ول.

بۇدان كەيىن مەملەكەتتىك گيمن ورىندالىپ، مەملەكەتتىك تۋ بيىككە كوتەرىلدى. سونداي-اق، شارادا پاتريوتتىق اندەر شىرقالدى.

ەستەرىڭىزگە سالا كەتەيىك، مەملەكەتتىك رامىزدەر اللەياسى بۇعان دەيىن ارال، قازالى، شيەلى اۋداندارىندا جانە وبلىس ورتالىعىندا سالىنعان ەدى. كوپ ۇزاماي مۇنداي ماڭىزدى نىساندار وبلىستىڭ وزگە اۋداندارىندا دا بوي كوتەرەدى.

Abai.kz