قازاقستان پرەزيدەنتى «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەكتى قابىلدادى.

مەملەكەت باسشىسى ۇكىمەتپەن، ماجىلىسپەن، ماسليحاتتارمەن ءوزارا ءىس-قيمىلداردى كۇشەيتۋ، باستاۋىش پارتيا ۇيىمدارىن نىعايتۋ قاجەتتىگىن ايتتى. قاسىم-جومارت توقاەۆ سايلاۋالدى ۋادەلەردىڭ ورىندالۋى ءۇشىن پارتيالىق جانە قوعامدىق باقىلاۋدى قامتاماسىز ەتۋگە نازار اۋداردى.

– پارتيانىڭ مىندەتى – سايلاۋالدى ۋادەلەردىڭ ورىندالۋى ءۇشىن قوعامدىق باقىلاۋدى كۇشەيتۋ. حالىقتىڭ بارلىق اماناتىنىڭ ورىندالۋىن قاتاڭ باقىلاۋعا الىپ، ولاردىڭ ناقتى ورىندالۋىن قامتاماسىز ەتۋ كەرەك. ەلىمىزدە جۇرگىزىلىپ جاتقان رەفورمالاردىڭ ءمانىن حالىققا ۋاقتىلى ءارى ءتيىمدى جەتكىزۋ ماڭىزدى، – دەدى قازاقستان پرەزيدەنتى.

كەزدەسۋ بارىسىندا قاسىم-جومارت توقاەۆ قوعامدىق سەنىم ۇلتتىق كەڭەسىندە جانە جاس مامانداردان پرەزيدەنتتىڭ كادرلىق رەزەرۆىن جاساقتاۋدا پارتيانىڭ جۇمىسىن جانداندىرۋ ءۇشىن بىرقاتار تاپسىرما بەردى.

Abai.kz