كەشە الماتىنىڭ جاڭا تاعايىندالعان اكىمى باقىتجان ءابدىرۇلى ساعىنتاەۆ قىزمەتىنە كىرىستى. ول الماتىنىڭ تۇركىسىب اۋدانىن ارالاپتى. سويتسە، سول اۋداننىڭ تۇرعىنى ءادىلجان رازيەۆ دەيتىن ازامات سەيفۋللين داڭعىلىندا جەزوكشەلەردىڭ قاپتاپ كەتكەنىن ايتىپ، شاعىمدانعان. جاڭا اكىم، جاۋاپتى قىزمەتكەرلەرگە تاپسىرما بەرىپ، اتالعان ماسەلەنى دەرەۋ شەشۋدى بۇيىردى.

بۇل كەشەگى كۇننىڭ جاڭالىقتار حرونيكاسىنداعى باستى تاقىرىپتاردىڭ ءبىرى بولدى.

الايدا، سول كۇنى-اق، الەۋمەتتىك جەلىگە تۇركىسىب اۋدانىنىڭ اكىمى پاۆەل كۋلاگينگە (اقمولا وبلىسىن باسقارعان سەرگەي كۋلاگيننىڭ ۇلى) ءتۇر-سىقپىتى كەلىڭكىرەيتىن ازاماتتىڭ تۇنگى كلۋبتا انايى ارەكەتتەر جاساپ جۇرگەنى بەينەلەنگەن ۆيدەو تارادى.

ۆيدەونى جەلىگە جۇكتەگەن جانار ماناقوۆا ەسىمدى الەۋمەتتىك جەلى قولدانۋشىسى ۆيدەونىڭ وڭ جاق بۇرىشىنا كۋلاگيننىڭ سۋرەتىن قويىپ، “بۇلاي اكىمدەر عانا دەمالادى” دەپ جازعان ەكەن.

الگى داۋلى ۆيدەودا كۋلاگينگە ۇقساس ەر ادامنىڭ تۇنگى كلۋبتا قىزدارمەن كوڭىل كوتەرىپ، بيلەپ جۇرگەنىن بايقايسىز.

پاۆەل سەرگەيۇلى كۋلاگين قازىر الماتىنىڭ تۇركىسىب اۋدانىنىڭ اكىمى. كەشەگى باقىتجان ءابدىرۇلىنا شاعىمدانعان ازامات باسقا-باسقا ەمەس، ءدال وسى كۋلاگين باسقاراتىن اۋداننىڭ تۇرعىنى ەكەن.

پاۆەلدىڭ اكەسى سەرگەي كۋلاگين قوستاناي مەن اقمولا وبلىسىنىڭ اكىمى، ارتىنشا اۋىلشارۋاشىلىعى ءمينيسترى سياقتى لاۋازىمدى قىزمەتتەردى ۇزاق جىل اتقارعان ادام. ەكس-اكىمنىڭ ۇلى نەبارى 26 جاسىندا استانانىڭ الماتى اۋدانىنا باسشى بولىپ تاعايىندالعان. كەيىنىرەك «ا» كورپۋسىندا ىرىكتەۋدەن وتپەگەندىكتەن، قىزمەتىنەن ايىرىلدى. ءسويتىپ، 2016 جىلى قازاقستان رەسپۋبليكاسى پرەزيدەنتى اكىمشىلىگىنىڭ مەملەكەتتىك ينسپەكتورى قىزمەتىن اتقارادى. ءبىر جىلدان سوڭ الماتىعا بەت بۇرعان كۋلاگين مىرزا 2017 جىلدىڭ تامىز ايىندا تۇركسىب اۋدانىنىڭ اكىمى بولىپ تاعايىندالدى. ال، 2018 جىلى وتىز ەكى جاسىندا وتباسىن قۇردى.

ايتا كەتەيىك، الماتىنىڭ “تۇنگى كوبەلەكتەرىنە” مەكەن بولعان سەيفۋللين داڭعىلىنىڭ تومەنگى بولىگى تىكەلەي تۇركىسىب اۋدانىنا قارايدى. قالانىڭ تومەنگى بولىگى بولعاندىقتان، ونداعى تازالىقتىڭ دا جايى كوڭىل كونشىتپەيدى. ال، جەڭىل ءجۇرىستى قىزدار ەمىن-ەركىن جۇرگەن سوڭ، ول اۋماقتا قىمىستىق ىستەردىڭ دە كوپ بولاتىنى بەلگىلى. ال، كۋلاگين مىرزا كەلگەن ەكى جىلدىڭ ىشىندە بۇل ماسەلەلەر تولىق شەشىلدى دەپ جانە ايتا المايمىز.

كەشە جاپ-جاڭا اكىم تاپسىرما بەردى دەدىك قوي. بۇگىن جاڭاعى سەيفۋللين داڭعىلىنان 130 ادام، ونىڭ ىشىندە اقشاعا اقىسىز قىزمەت كورسەتەتىن 53 ايەل، پاتەردى جالعا بەرەتىن 13 ادام، جەزوكشەلەردى تاسىمالدايتىن 5 جۇرگىزۋشى جانە باسقالارى ۇستالدى دەگەن اقپار شىقتى. 58 قۇقىق بۇزۋشى اكىمشىلىك جاۋاپكەرشىلىككە تارتىلىپ، جەزوكشەلەر قىزمەت ەتەتىن "پريتون" يەسى انىقتالىپ، وعان 315 مىڭ 625 تەڭگە ايىپپۇل سالىنىپتى.

جالپى، ساعىنتاەۆ مىرزانىڭ الىپ شاھارداعى جەڭىل جۇرىستىلەردىڭ قىزمەتىنە شەكتەۋ قويۋى بەكەر ەمەس. سەبەبى، اتىراۋداعى تولقۋدىڭ ءبىر ۇشى وسى جەڭىل ءجۇرىستى قىزدار ماسەلەسىنە بارىپ تىرەلگەنىن كوردىك.

جوعارىداعى ۆيدەونىڭ راس-وتىرىگىن انىقتاۋ قۇزىرلى ورگاننىڭ مىندەتى. مۇنى جۇمىسىن "جەزوكشە" قۋىپ باستاعان ساعىنتاەۆ تەز ارادا انىقتاتىپ، ەگەر دە اناۋ انايى بيلەپ جۇرگەن ادام شىنىندا كۋلاگين بولسا، وعان لايىقتى جازاسى بەرىلۋى كەرەك. نەگە؟ ويتكەنى، بىرىنشىدەن بۇل بيگە قاراپ، "جەزوكشەلەردىڭ "كرىشاسى" كۋلاگين ەمەس پە ەكەن؟" دەگەن ساۋال ەرىكسىز كومەيگە كەپتەلەدى ەكەن... ەكىنشىدەن، تۇركىسىبتىڭ اكىمى مىنانداي بولسا، ونداعى جەڭىل ءجۇرىستى قىزداردى تيۋ استە مۇمكىن ەمەس. ۇشىنشىدەن، مۇنداي اكىم "بالالارىمىزبەن بىرگە ۆوكزال ماڭىنان وتۋدەن قالدىق" دەگەن تۇرعىندارىنىڭ جانايقايىنا قۇلاق تۇرمەيتىنى تاعى انىق.

نۇربيكە بەكسۇلتانقىزى

Abai.kz