مەن ءسوز ەتكەلى وتىرعان «NUR OTAN» –  قازىرگى تاڭدا ءبىربولىم جۇرت، ونىڭ ىشىندە اقىندار قاۋىمى جەردەن الىپ-جەرگە سالىپ سىناپ جاتقان كادىمگى «NUR OTAN» پارتياسى.

بەكقوجا جىلقىبەك – اقىن. قىتايداعى ىلە قازاق اۆتونوميالى وبلىسىنىڭ توعىزتاراۋ اۋدانىندا دۇنيەگە كەلىپ، سەكسەنشىنشى جىلداردىڭ باسىندا شىڭجاڭ ۋنيۆەرسيتەتىن تامامداعان، ەڭبەك جولىن قۇلجا قالاسىنداعى ىلە پەدينيستيتۋتىندا ۇستازدىقتان باستاعان تانىمال ازامات. قازاقستان تاۋەلسىزدىگىن جاريالاعان ساتتە اتاجۇرتىنا العاشقى كوشتىڭ لەگىمەن «ورالمان» بولىپ ورالعان وتانشىل جىگىت.

بەكەڭ قازىر نۇر-سۇلتان قالاسىندا تۇرادى. عىلىم كانديداتى. ۇزاق جىلداردان بەرى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ۇستازدىق قىزمەت اتقارادى. وتباسىلى، ەكى ۇلدىڭ اكەسى. سۇيىكتى جارى مەنىڭ بىرگە وقىعان كۋرستاسىم جاڭىل سماعۇلقىزى. ارعى بەتتە مەكتەپتە ۇستاز، اۋداندىق مادەنيەت مەكەمەسىندە جاۋاپتى قىزمەت اتقارعان جاڭىل – بۇل كۇندە مىقتى جەكە كاسىپكەر...

بەكقوجا جىلقىبەكۇلىن مەن سوناۋ بالا كەزىمنەن بىلەم. سەبەبى، ونىڭ ەسىمى – شىڭجاڭ قازاق ادەبيەتىنە وتكەن عاسىردىڭ سەكسەنىنشى جىلدارىنىڭ باسىندا كەلىپ قوسىلعان ءبىر توپ تالانتتى جاس اقىنداردىڭ الدىڭعى قاتارىندا اتالىپ، ەلگە ەرتە تانىلدى. ءبىر قۇلجانىڭ ماڭايىندا جۇرسەك تە مەنەن بەس-التى جاس ۇلكەن اقىن اعامەن كەزدەسىپ، تانىسۋدىڭ ءساتى كەشىرەك – ەكى مىڭىنشى جىلدان كەيىن ءتۇستى. بەكقوجا جىلقىبەكۇلى ەكەۋمىز ءبىر كورگەننەن ءبىرمىزدى-ءبىرىمىز ۇناتىپ، ءازىل-قالجىڭىمىز جاراسىپ، تەز ءتىل تابىسىپ، ارالاسىپ كەتتىك. ودان بەرگى ۋاقىتتا بەكەڭنىڭ مەنىڭ جاڭىل كۋرستاسىممەن ۇيلەنۋى – ارامىزدى ودان ارى جاقىنداتىپ، كورىسپەسەك تۇرا المايتىن كۇيگە جەتكىزدى.

جالپى، بەكقوجا اعام كوپ وقىعان، كوپ بىلەتىن، ازىلگە شەبەر، وزىندىك ۇستانىمى بار اقىن.

سوڭعى ۋاقىتتا زامان تالابىنا تەز بەيىمدەلىپ، الەۋمەتتىك جەلىلەردىڭ جەلىن وڭىنان دا، سولىنان دا سوقتىرىپ جۇرگەن ءجۇر اعامىز. مەن ونىڭ بۇل بەلسەندىلىگىنە  قاتتى قۋانام. اينالامىزدا بولىپ جاتقان الۋان ءتۇرلى وقيعالارعا ءوز ءۇنىن قوسىپ، ساۋاتتى پىكىر بىلدىرسە ەكەن دەپ، تىلەپ جۇرەم.

بەكقوجا جىلقىبەك سونداي پىكىرىنىڭ ءبىرىن ءوزىنىڭ «Facebook» الەۋمەتتىك جەلىسىندەگى پاراقشاسىنا 29 ماۋسىم كۇنى، ساعات 18:28-دە قالدىرىپتى.

«جولداعى وتاربانىڭ ىشىندە قۇرت ساتىپ، تەنتىرەپ جۇرگەن اپانىڭ ايانىشتى حالى وسى. قايداسىڭ نۇر وتان دەسەم اۋىت باۋىرىم تاعى دا ماعان رەنجيتىن شىعار!» - دەيدى بەكقوجا اعام سول جازباسىندا.

ءيا، ءبىلىپ وتىرمىن، سودان ءبىر كۇن بۇرىن بەكقوجا مەن جاڭىلدىڭ ۇيىندە بولىپ، ۇزاق اڭگىمەلەسىپ قايتقام. اكەسى جىلقىبەك اقساقالدى الىپ، الماتىداعى وتەتىن ءوزىنىڭ ەسەنعۇل رۋىنان ەلگە ورالعان ازاماتتارىنىڭ باس قوسۋىنا كەتىپ بارا جاتقانىن ايتقان. مىنا جازبانى، شاماسى، سول رۋلىق باس قوسۋعا بارا جاتقان جولىندا، پويىزدىڭ ىشىندە وتىرىپ جازسا كەرەك.

نۇر-سۇلتان قالاسىندا ءورت اپاتى سالدارىنان كوز جۇمعان بەس ءسابيدىڭ ولىمىنەن بەرى جۇرت الەۋمەتتىك ماسەلەگە بايلانىستى اشىق الاڭعا شىعىپ، كوتەرىڭكى داۋىسپەن ءوز پىكىرلەرىن ايتا باستادى. بۇل قيمىل ءبىر عانا ەلوردادا ەمەس، قازاقستاننىڭ بارلىق قالاسىندا جالعاسۋدا. بيلىككە اششى سىندار ايتىلۋدا. سول سىننان بيلىك پارتياسى - «NUR OTAN» دا قاعىس قالىپ جاتقان جوق.

قىسقاسى، سىناعىسى كەلگەن، حالىقتىڭ ءسوزىن ايتقىسى كەلگەن ءار بەلسەندى بۇل كۇندە ءبىزدىڭ پارتيانى ءبىر سىباپ وتەتىن بولدى. وعان دا ەتىمىز ۇيرەنىپ بارادى.

مىنە، سول توپتىڭ قاتارى ءبىزدىڭ بەكقوجا جىلقىبەكۇلىمەن تولىعىپتى. اپامىزدىڭ قۇرت ساتقان كۇيگە تۇسۋىنە، ۇلاعاتتى ۇستازدىڭ، تالانتتى اقىننىڭ كوزىمەن قاراعاندا، «NUR OTAN» پارتياسى ايىپتى سەكىلدى.

بەكقوجا جىلقىبەكۇلىنا، كەسىپ ايتايىن، ونىڭ بۇل سىنىنۆا اۋىت باۋىرى ەشقاشان رەنجىمەيدى دە، وكپەلەمەيدى دە! قايتا، ونىڭ بۇل جازباسى ويىمدى ۇشتاپ، وتكەن كۇندەردى قايتا ءبىر ەسكە الۋعا، ءوزىم قىزمەت اتقاراتىن «NUR OTAN» پارتياسى تۋرالى تاعى ءبىر ويلانا تۇسۋگە تۇرتكى بولدى. ءسويتىپ، وسى ماقالانى جازۋعا وتىردىم.

مەن بۇل جولى ۇلت كوشباسشىسى نۇرسۇلتان نازارباەۆتىڭ كوشى-قون ساياساتى، شەتتەگى قانداستارىمىزدىڭ ەلگە ورالۋىنا جول اشقان قامقورلىعى تۋرالى قايتالاپ، ەلدىڭ ۋاقىتىن المايمىن.

تەك، «NUR OTAN»، بەكقوجا جىلقىبەك جانە قۇرت ساتقان اپانىڭ «ايانىشتى حالى» جايلى عانا از كەم توقتالام، بولدى.

وسىلايشا، بەكقوجا اقىن مەنىڭ «NUR OTAN»-نىمدى سوزبەن دە تۇيرەپ، ولەڭمەن دە پىسپەكتەي باستادى.

ال، سول «NUR OTAN» پارتياسىنىڭ قىزىڭىن كورگەن ءبىر اۋلەت بولسا، ول – وسى بەكقوجا باستاعان جىلقىبەكتىڭ تۇقىمى!

جىلقىبەكتىڭ اۋلەتىنىڭ اۋزىنان اق ماي اعىزعان – مەن قىزمەت ەتەتىن «NUR OTAN» پارتياسى!!

ون جىل تىرپ ەپەي جاتقان بەكقوجانىڭ باۋىرلارىن كاسىپكەرلىكتىڭ داڭعىراعان داڭعىل جولىنا قولدارىنان جەتەلەپ اكەلىپ سالىپ كەپ جىبەرگەن – تاعى سول بيلىك پارتياسى!!!

مەن ەلورداعا 2012 جىلى كوشىپ كەلدىم. «ارقاعا اتباسىن بۇر!» دەپ، ايدىن اعا ورازانبايۇلى كوپ قولقا سالدى. تۇمانباي اعا ومىردەن وزعان سوڭ، الماتىداعى جۇمىسىمنىڭ دا بەرەكەسى كەتىپ، دالادا قالدىم. ونىڭ ۇستىنە، ول – كوشى-قون ساياساتىنىڭ شاتقاياقتاي باستاعان مەزگىلى ەدى. ءبىر جاعى بيلىكتىڭ ۇشار باسىنا جاقىنىراق جەرگە كەلىپ، سول قازاق كوشىنىڭ زاڭنامالىق نەگىزىن بەكەمدەي تۇسۋگە بەل بۋدىم. ءبىر سوزبەن ايتقاندا، ايدارىمنان جەل ەسىپ، نۇر-سۇلتاننىڭ ءبىر جاعىن جاپىرىپ كەتە جازداپ جۇرگەن كەزىم ەدى – ول! كەلە سالىپ، الاسۇرىىپ بيلىككە جول اشاتىن كانالدار ىزدەي باستادىم. ءبىرىنشى بولىپ، «NUR OTAN» پارتياسىنىڭ ەسىگىن قاعىپ، اسقار قۇمارباي دەگەن جىگىتپەن تانىسقانىم ەسىمدە. اسەكەڭ مەنى سىرتىمنان بىلەتىن بولىپ شىقتى. قۋانا قارسى الىپ، رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى جۇماجان جۇكەنوۆ اعامىزعا الىپ بارىپ جولىقتىردى.

اسەكەڭ مەن جۇمەكەڭ پارتيانىڭ قىزمەت تارتىبىمەن تانىستىردى. ەڭ كەرەمەتى، قول جەتە بەرمەيتىن دەپۋتاتتار مەن مينيسترلەردىڭ ءبىرازى وسى بولمەگە كەلىپ، ازاماتتارمەن قابىلداۋ وتكىزەدى ەكەن.

– مىسالى، ەكى كۇننەن كەيىن اۋىل شارۋاشىلىعى ءمينيسترى اسىلجان مامىتبەكوۆ قابىلداۋ وتكىزەدى. كىرەم دەسەڭىز، ەسىگىمىز اشىق، قابىلداۋعا جازايىق ءسىزدى، اۋىت مىرزا – دەدى جۇماجان قامكەنۇلى.

مەنىڭ ەسىمە بىردەن بەكقوجا جىلقىبەك سارت ەتە ءتۇستى. قابىلداۋعا وسى جىگىت كىرەدى دەپ، اتى-ءجونىن، تەلەفون نومەرىن جازدىرىپ كەتتىم. سەبەبى، سول كۇنى بەكقوجانىڭ ۇيىنە قونىپ شىققام. بەكەڭ ارعى بەتتەگى اكە-شەشەسىن، ءبىر توپ ءىنىسىن اقمولا وبلىسىنىڭ شورتاندى اۋدانىنا كوشىرىپ العانىنا ون جىلدان اسقانىن، بىراق نە جەر، نە مال جوق، قينالىپ وتىرعانىن ايتقان ماعان. مىنە، سونىڭ توپ ەتىپ ورايى كەلىپ تۇر. «ءومىرى ەۋرازيا ۇلتتىق ۋنيۆەرسيتەتىنىڭ اۋلاسىنان الىسقا بارىپ كورمەگەن بەكەم «مينيستر» دەگەننىڭ قانداي بولاتىنىن ءوز كوزىمەن ءبىر كورەتىن بولدى-اۋ!» - دەپ، قاتتى قۋانىپ كەتتىم. شىعا سالىپ، اعاما تەلەفون سوعام، جابىق. ۇيىنە زباندايمىن، كوتەرمەيدى. تاكسيلەتىپ بارسام، قولتەلەفونىن ءسوندىرىپ، ءۇيدىڭ تەلەفونىن جەلىدەن اجىراتىپ، تەرەزەلەردىڭ پەردەسىن بۇركەپ جاۋىپ تاستاپ، ۇيقىنى سوعىپ جاتىر بەكەم. سويتسەك، جانى التىننان اياۋلى اعامىز ءار كۇنى تاڭەرتەڭ ەرتە تۇرىپ، ءبىر ولەڭ جازىپ تاستاپ، تۇستە وسىلاي ەكى ساعات ۇيقتايدى ەكەن. دۇنيە توڭگەرىلىپ كەتسە دە، بۇل ادەتىنەن ءومىرى جازبايدى ەكەن ارداقتى اعاي...

«اۋىل شارۋاشىلىعى ءمينيسترى اسىلجان مامىتبەكوۆ قابىلداۋىنا كىرەسىڭ، كەشەگى شارۋاڭدى ايتاسىڭ، مينيستر شەشپەسە، كىم شەشەدى؟!»-دەسەم، سەنبەيدى. اقىرى سەندى. جۇزىنە قان جۇگىرىپ، كوزىنەن ءۇمىت وتى ۇشقىنداي باستادى. قىزىق بولعاندا، تالانتتى اقىنىمىز، ەنۋ-دىڭ ۇلاعاتتى ۇستازى ءمينيستردىڭ اتىنا حات جازۋدىڭ ءتارتىبىن بىلمەيتىن بولىپ شىقتى عوي. اتاعىن اسپانداتىپ، قارا اسپاندى ءتوندىرىپ، ەكى نۇسقا ەتىپ جازىپ، ونى دا قولىنا ۇستاتتىق...

ءسويتىپ، بەكەم كاستومىن كيىپ، گالىستوگىن تاعىپ، كەنەسارى كوشەسى 25 ۇيدەگى «NUR OTAN» پارتياسىنىڭ رەسپۋبليكالىق قوعامدىق قابىلداۋ بولمەسىندە وتەتىن اسىلجان مامىتبەكوۆتىڭ قابىلداۋىنا قالتيىپ بارادى. اسقار ارناۋىتۇلى مەن جۇماجان قامكەنۇلى جىلى شىرايمەن كۇتىپ الىپ، ءمينيستردىڭ الدىنا كىرگىزەدى. اعام مەن جازىپ بەرگەن ءسوزدى ايتىپ، ءوتىنىش-حاتىن ءوز قولىمەن تاپسىرادى. «مىناۋ ءبىر بولايىن دەپ تۇرعان بالا ەكەن!» دەگەن بولۋى مۇمكىن، اسىلجان سارىبايۇلى ءمان-جايدى ۇققان سوڭ، سول جەردە وتىرىپ، بەكقوجانىڭ كوزىنشە اقمولا وبلىسىنا تەلەفون سوعىپ، تاپسىرما بەرەدى. «NUR OTAN» پارتياسى ءوتىنىشىن وبلىس اكىمىنە جونەلتەدى...

ارى قاراي...

ارى قاراي مەن ول ماسەلەنى ۇمىتىپ كەتكەم. ءتىپتى، بەكقوجادان «نە بولدى؟» دەپ، سۇراپ تا قويماعام عوي. كەلەسى جىلدىڭ كۇزىندە قورعالجىن اۋدانىنا جاڭا كشىپ كەلگەن ىنىمە «ورالمان» كۋالىگىن الايىن دەپ، اقمولا وبلىسىنا بارايىن. كوكشەتاۋ قالاسىنىڭ ەڭ كورىكتى جەرلەرىنە ىلىنگەن ۇلكەن بانەرگە كوزىم ءتۇسسىن. بانەردە سىيىر، قوي جەتەلەگەن، قوزى كوتەرگەن جىگىتتەردىڭ سۋرەتتەرى تۇر. ورتاسىندا ءبىزدىڭ قىزايدىڭ اق قالپاعىن باسا كيگەن ءبىر اقساقال بار. قاراسام، ءتۇسى تانىس ادامدار. جازۋىن وقىسام، «ماعاۋيا جىلقىبەك، سۇلتانيا جىلقىبەك، ... جىلقىبەك...» دەپ تۇر. كادىمگى بەكقوجانىڭ شورتاندىداعى اكەسى جىلقىبەك كاريا مەن ىنىلەرى.

سويتسەك، مينيستر اسىلجان مامىتبەكوۆ پەن «NUR OTAN» پارتياسىنىڭ ىقپالىمەن اقمولا وبلىسىنىڭ اكىمدىگى جىلقىبەك اۋلەتىنىڭ ءوتىنىشىن مىقتاپ قولعا العان. ءۇش ءىنىسىن ستەپەنديا تولەپ، كاسىپكەرلىكتى قالاي جۇرگىزۋ كەرەكتىگى جونىندەگى قىسقا مەرزىمدىك كۋرسىنان وقىتقان. اۋىل اكىمى اۋىلداعى بوس تۇرعان ۇلكەن بازىنى تەگىپ پايدالانۋعا بەرەدى. سوسىن اۋىل شارۋاشىلىعىن قارجىلاي قولداۋ قورىنىڭ «سىباعا» باعدارلاماسى بويىنشا 3 000 000 تەڭگە تومەن ءوسىمدى نەسيە ۇسىنادى. ول كەزدەگى تەڭگە قازىرگىدەن ەكى-ءۇش ەسە قۇندى ەكەنىن ەسكەرسە، بۇل از اقشا ەمەس. ال، قايتارعاندا ول اقشانىڭ تيىنعا اينالىپ قالعانىن قايتەرسىڭ. «ايى وڭىنان تۋدى»، «تالەيى كەلدى» دەگەن وسى شىعار؟!..

جىلقىبەك اقساقالدىڭ قالعان ۇلدارى، ايدىن ورازانبايۇلىنىڭ سوزىمەن ايتقاندا، بەكقوجا سەكىلدى «ءيتتىڭ كولەڭكەسىنە ۇيىقتايتىن» جالقاۋ ەمەس، شەتىنەن پىسىق، ەپتى بولىپ شىعادى. تەك قانا قولدارىن قارجى تاپشىلىعى بايلاپ تۇرعان كورىنەدى، نەسيە الىپ، ماسەلە شەشىلىسىمەن شارۋاسىن شالقىتىپ الا جونەلەدى. قۇجات ءبىتىرۋ قيىنداپ بارا جاتسا، بەكققوجا  وندا «NUR OTAN» پارتياسىنا بارام دەپ، قاتىستى مەكەمەلەردىڭ زارەسىن الادى. سەنىمدى اقتاعان سوڭ بولسا كەرەك، قور جاعىنان كەلەسى جىلى تاعى 6 000 000 تەڭگە بەرىلەدى...

اقمولا وبلىسى اكىمدىگى بۇل ءوزىنىڭ بۇل قىزمەتىن جۇرتقا ۇلگى ەتىپ كورسەتۋ ءۇشىن وبلىس ورتالىعىنا وسىلايشا جارناما ەتىپ ءىلىپ قويعان ەكەن.

قازىر، جىلقىبەك اۋلەتى ول قارىزدى تۇگەل قايتارىپ، ءار وتباسى ءوز الدىنا جۇزگە تارتا ءىرىلى-ۇساقتى مال قۇراپ الىپتى. الدا تاعى قوماقتى نەسيە الامىز دەپ، قامدانىپ جاتقان كورىنەدى. ەندى «NUR OTAN» پارتياسىنىڭ ونشا كەرەگى جوق. ويتكەنى، جول اشىلدى، تاجىريبە توپتالدى. ەڭ باستىسى، سەنىم نىعايدى...

مىنە، تىعىرىققا تىرەلىپ وتىرعان جىلقىبەكتىڭ اۋلەتى «NUR OTAN» پارتياسىنىڭ ارقاسىندا ەلگە كەلگەن سوڭ قايتادان ءيىنى تولىپ جىلقى ءمىنىپ، سىيىر ساۋىپ، قوي باۋىزداپ دەگەندەي شالقىپ شىعا كەلدى.

بەكقوجا كوكەم ۇيىقتاپ ءجۇرىپ، «NUR OTAN» پارتياسىن ەسىنەن شىعارىپ نەمەسە باسقا بىردەمەمەن شاتاستىرىپ العان سەكىلدى. قۇرت ساتقان اپانىڭ «ايانىشتى حالىنە» قارامادىڭ دەپ بەكەم كىنالاپ وتىرعان «NUR OTAN» –باياعىداعى جىلقىبەك اۋلەتىنىڭ اۋزىنان اق ماي اعىزعان سول «نۇر وتان»!

مۇنى بەكقوجا جىلقىبەك ۇمىتپاۋى كەرەك!

باسىن اشىپ ايتايىن، مەن بەكقوجا جىلقىبەككە «اۋزىڭدى اققا جەتكىزگەن پارتيانى نەگە سىنايسىڭ؟!» نەمەسە «نەگە ماقتامايسىڭ!؟»-دەپ، مىندەسىنۋدەن، قىسىم جاساۋدان جانە جالىنۋدان مۇلدە اۋلاقپىن!

قازىر ءۇش ميليون تۇرماق، ءۇش تەڭگە نەسيە الىپ كورمەگەن گۇلىسحان دومالاي مەن سەرىك بوقان «NUR OTAN» پارتياسى دەگەندە ىشكەن اسىن جەرگە قويادى.

«نۇر وتان دەسەم اۋىت باۋىرىم تاعى دا ماعان رەنجيتىن شىعار!». -دەپتى بەكقوجا اقىن.

جوق، رەنجىمەيمىن!

بىراق، باسىمدى شايقاپ، كۇلگەنىم راس!

ارتىنان ازداپ كەيىگەنىمدى دە جاسىرمايمىن!

ودان بەرى دە ون جىلعا جۋىق ۋاقىت ءوتىپتى...

دانىشپان بەكقوجا جىلقىبەكتىڭ كۇنى بۇگىنگە دەيىن مەملەكەتتىڭ وسىنداي ءتيىسمدى ساياساتىنىڭ بار ەكەنىن ايتىپ، «NUR OTAN» پارتياسىنىڭ كەۋدەسىنە نان پىسقان مينيسترلەردى حالىقتىڭ الدىڭا اكەلىپ، ماسەلەسىن شەشكىزەتىن قۇدىرەتتى كۇشكە يە ەكەنىن جەتكىزىپ، ءسويتىپ ءبىر كەزدەگى ءوزى سەكىلدى كاسىپكەرلىككە جول تاپپاي وتىرعان ءبىر اۋىلداسىن نە ءبىر قانداسىن پارتيانىڭ رەسپۋبليكالىق قوعامدىق قابىلداۋ بولمەسىنە، ەڭ قۇرىعاندا، ءبىر رەت بولسا دا ەرتىپ كەلىپ، جول سىلتەي بىلمەگەندىگى ءۇشىن، شىنى كەرەك، كەيىدىم مەن!

قويشى، بەكقوجاعا كەيىپ، بەرەكە تاپپايسىڭ. ودان دا انا اپا تۋرالى ايتايىن. سونىمەن، ءبىر شاعىن كاسىپپەن اينالىسىپ جۇرگەن اپايىمىز كەشە جولشىباي، پويىزدا بەكقوجا اقىنعا كەزدەسىپتى. ول كىسى ۆاگونداردى ارالاپ ءجۇرىپ قۇرت ساتادى ەكەن. كادىمگى قولدىڭ قۇرتى. قازاقتىڭ ءسۇيىپ جەيتىن ءتول تاعامى. قۇرامى تولعان دارۋمەن. قازىرگى كۇننىڭ تىلىمەن ايتقاندا، وتاندىق ءونىم.

شىركىن، ءدامى ءتىل ۇيىرەتىن اپامنىڭ اق قۇرتى عوي – بۇل! «انامنىڭ ساۋساعىنىڭ تابى تۇسكەن، اعاتاي، جان قالتاڭدا قۇرتىڭ بار ما؟» دەپ، جاركەن جىراۋ زارلايتىن قاسەتتى قۇرت وسى ەمەس پە؟!

ءاي، بەكقوجا-اي، تاپپايتىن بالەڭ جوق قوي سەنىڭ! ءبىز دە قۇرت جەپ وسكەن بالاسىمىز عوي، وسى سوزدەردى جازىپ وتىرىپ، اۋزىما ءبۇبۇجان اپام تىعىپ بەرەتىن مالتا قۇرتتىڭ قىشقىل ءدامى كەلىپ، سىلەكەيىم شۇبىرىپ كەتتى عوي. وتكەن كۇندەرگە دەگەن ساعىنىشتىڭ سارى سامالى كەۋدەمەن جالىن بولىپ شىعۋدا...

«قۇرت» دەگەننەن ەسكە تۇسەدى، باياعىدا شىعىس قازاقستاعا تاعى سول قىتايدان كوشىپ كەلگەن ءبىر جاس وتباسى وسى جىلقىبەك اۋلەتى قۇساپ جۇمىس تاپپاي، ءبىراز قىسىلىپ قالادى. اقىرى ءبىر سىيىرلى بايعا كەزدەسىپ، مالشى بولىپ جۇمىسقا جالدانادى. قۇداي وڭداعاندا، سول سىيىردىڭ جۇزدەن استامى بۇزاۋلايدى ەكەن. پىسىق كەلىن سونى ساۋىپ، ايران ۇيتىپ، قاتىق ءسۇزىپ، قۇرت الادى عوي. كادىمگى ءوزىمىز كورىپ جۇرگەن بارماقتىڭ باسىنان ءسال ۇلكەنىرەك، دومالاق، مايلى قۇرت. ساناپ وتىرىپ، ءبىر ايدا   1 000 000 كەپتىرەدى. قۇرتى تۇپ-تۋرا ءبىر ميلليون بولعاندا وسكەمەن قالاسىنا اپارىپ، قالانىڭ ماگەزىندەرىن جالىقپاي ارالاپ ءجۇرىن، ءبىر تال قۇرتىن ءبىر تەڭگەدەن وتكىزەدى. ءتورت-بەس كۇندە ءبىر ميلليون تەڭگەنى قالتاعا باسىپ، اۋىلعا قايتادى. ول دا تەڭگەنىڭ قۇنى تۇسپەگەن جىلدار ەدى.

مىنە، قۇرت ساۋداسىنىڭ كەرەمەتى دەپ، وسىنى ايت!

دەمەك، قازاق ءۇشىن قۇرت – قاسيەتتى ۇعىم. ونى جاساعان، بازارعا شىعارىپ ساتقان قازاق – تەگىن قازاق ەمەس. ونىڭ بويىندا بابالارىمىزدىڭ ءور رۋحى مەن سارقىلماس بەرەكەسى بار! ونداي جانداردى مۇسەۋرەۋ، كەمسىتۋ جانە ساياسي ۇپاي جيۋعا پايدالانۋ – بارىپ تۇرعان ناداندىق!

جالپى، «ۆاگون ساۋداسى» – ءبارىمىز ۇنەمى كورىپ جۇرگەن قالىپتى جاعداي دەۋگە بولادى. نۇر-سۇلتاننان الماتىعا دەيىنگى جولدا ءمۇنداي كوتەرمە ساۋداگەرلەر ءورىپ جۇرەدى. كەيدە تاپپاي جۇرگەن زاتىمىزدى وسىندا كەزدەستىرىپ، ءوزىمىز دە ساۋدانىڭ كورىگىن قىزدىرىپ جىبەرەمىز. ايتباقشى، بەكقوجا سەكىلدى ءتىلىنىڭ ءبىزى بار الپىسباي بارانباەۆ دەگەن ساتيرك اقىننىڭ تاۋەلسىزدىكتەن بەرگى بۇكىل ءومىرى وسى وتاربانىڭ ۇستىندە ءوز كىتابىن ساتۋمەن ءوتىپ كەلە جاتقانىن قالامگەر قاۋىمى جاقسى بىلەدى. باق-تا دا جازىلدى...

نەگىزى، جاس بول، كارى بول، شاما كەلسە، حاراكەت ەتىپ، اقشا تابۋ – جامان ەمەس. اتا-انانى قۇرمەتتەۋ، ۇلكەندى سىيلاۋ – قانىمىزدا بار قاسيەت. ول ءوز الدىنا بولەك اڭگىمە. ءبىز ءومىر ءسۇرىپ وتىرعان كاپيتاليزم ءداۋىرىنىڭ باستى تالابى – قابلەتىنە قاراي جۇمىس ىستەپ، ەڭبەگىنە قاراي اقى الۋ. ءبىز - بەكقوجا جىلقىبەك ەكەۋمىز كەشەگى دەن سياوپين مەتەبىنىڭ تۇلەگىمىز. ءبىزدىڭ ەس ءبىلىپ، ەڭبەك ەتكەن شاعىمىز سول دەننىڭ ەل تىزگىنىن ۇستاعان، بۇكىل قىتايدى نارىقتىق ەكونوميكاعا كوشىرەن داۋىرىنە ءدوپ كەلدى.

كۇيرەۋگە بەت العان الىپ بارا جاتقان قىتايدى تىكەسىنەن تىك تۇرعىزعان دەننىڭ نارىقتىق ەكونوميكاعا كوشۋ ساياساتى. كۇندىز-ءتۇنى اۋىز جاپپاي ۇگىتتەگەن باق-تىڭ كۇشىمەن قىتاي ۇلتى بازارعا تەز بەيىمدەلىپ كەتتى. قۇلجا قالاسىنىڭ كەز-كەلگەن كوشەسىنىڭ بويىندا ءار قىرىق-ەلۋ مەتر جەردە جاز بويى قىتايدىڭ كارى كەمپىرلەرى مەن شالدارى ءبىر-ءبىر مۇزداتقىش ساندىقتى قويىپ الىپ، سۋسىندىق ساتادى. شاعىن عانا اينەك ۇستەل، ونى جاعالاتىپ قويعان كىشكەنە ورىندىقتار تۇرادى. بەكقوجا جىلقىبەك ەكەۋمىز سوعان وتىرا قالىپ، سالقىن سىرادان تارتىپ-تارتىپ جىبەرەتىنبىز ءالى ەسىمدە. تىسكە باسار تۇك جوق. سونداي ساتتە، اتتەڭ، ءبىر تال اششى قۇرت بولساشى دەپ قويۋشى ەك قوي، بەكە. ال، انا قىتاي كەمپىردىڭ ءتۇرىن كورسەڭ، ءتىسى ورسيعان، اياعى شيديگەن ارۋاق دەرسىڭ. سوعان قاراماستان، ول ساعان ساپالى قىزمەت كورسەتەدى. ءبىرىن ءىشىپ بولماي جاتىپ، ەكىنشىسىنىڭ اۋزىن اشىپ، الدىڭا قويىپ ۇلگىرەدى. جانە ول بايقۇستاردا ول كەزدە زەنەتاقى دەگەن اتىمەن جوق. قىتايدا ول شاقتا جاي حالىققا ەڭ تومەنگى جاردەماقى، زەينەتاقى تولەۋ ءتارتىبى جولعا قويىلماعان بولاتىن. بار بولعانى، وسىنداي شاعىن كاسىپكەرلىككە جول اشىپ بەرۋ مىقتى، جۇيەلى جولعا قويىلعان. ءبىرازدان كەيىن بەكەڭ اقىن «شىعىپ كەلەمىز سىراحانادان، كوزىمىزدى سىرا تالاعان. ءبىرىمىز التاي، تارباعاتايدان، ءبىرىمىز بۇراتالادان...» دەپ ولەڭ وقي باستايدى بەكقوجا اقىن. بىراق، نە ايتقانىمىز ءالى ەسىمدە، بەكقوجا جىلقىبەكتىڭ «مىنا كومپارتيا وڭباعان! قاراشى، سەكسەننەن اسقان كەمپىر-شالىنا كوشە بويىندا سۋسىن ساتقىزىپ قويىپتى!»-دەگەنىن ەشقاشان ەمەسپىن. ەسەسىنە، ولەڭدى ارت-ارتىنان وقىپ، سول قىتاي كەمپىردىڭ اقشا تاپقىشتىعىنا، وعان قىتاي كومپارتياسىنىڭ وسىنداي وراي جاراتىپ بەرگەنىنە قاتتى ءسۇيسىنىپ، ماقتاپ وتىراتىن بەكەم. ول از دەسەڭىز، تىنىش وتىرماي، «اتتەڭ، ءبىزدىڭ قازاق قۇرت مەن مايىن، قىمىزى مەن شۇباتىن وسىلاي بازارعا سالىپ، اقشا تابۋدى بىلمەيدى عوي!»-دەپ، اۋىلدىڭ قازاعىن جازعىرۋشى قوي ءبىز وڭباعاندار...

بۇگىن عوي، قازاق كەمپىردىڭ دەنساۋلىققا پايدالى قۇرتىن ساتقانىنا جانى اشي قالعانى، وعان «NUR OTAN» پارتياسىن ايىپتى ەتىپ وتىرعانى.

ءوز كۇشىنە سۇيەنىپ ءومىر ءسۇرۋ قاعيداسى ءبىزدىڭ ميىمىزعا شەگە بولىپ قاتىپ قالعان. مەن «جۇمىس» دەگەن  ۇعىمعا ءبىزدىڭ قازاقستان حالقىنا قاراعاندا باسقاشا كوزبەن قارايمىن. پويىزدا قۇرت ساتىپ جۇرگەن اپامىزعا بەكقوجا اقىندىق، ۇستازدىق كوزىمەن قاراسا، مەن ءۇش كوزبەن – جۋرناليستىك، اقىندىق جانە پارتيالىق كوبەن ءۇڭىلدىم. ەشقانداي وعاشتىعى جوق. اپانىڭ ارەكەتى دۇپ-دۇرىس!

ءبىزدىڭ جۇرت «ۇكىمەت جۇمىس ورنىن اشپادى، جۇمىس تاۋىپ بەرمەدى...» دەپ، شۋلاپ جاتادى.

دۇرىس ەمەس!

ۇكىمەت جۇمىس ورنىن اشپاۋ كەرەك!

ۇكىمەت جۇمىس ورنىن اشقان جەرگە جەمقورلىق ۇيا سالادى، كوررۋپتسيا سالتانات قۇرادى. قايدا ۇكىمەت اشقان ««تۇلپار» ءاۆتوموبيلى زاۋىتى»، «بالقاش مىرىش زاۋىتى»، ««يۋتەكس» ماقتا وڭدەۋ كەشەنى»... دەگەن كاسىپورىندار مەن زاۋىتتار؟!

ەسەسىنە، ۇكىمەت جۇمىس ورنىن وتاندىق جەكە تۇلعاعا اشتىرۋى، اشۋعا مۇمكىندىك بەرۋى ءتيىس. ءبىزدىڭ ازاماتتار ءوز بەتىنشە جۇمىس جۇرگىزۋدەن گورى، وزگەنىڭ قول استىندا قۇل بولىپ ىستەگەندى جاقسى كورەتىن سەكىلدى. قازاق «ورتاق وگىزدەن وڭاشا بۇزاۋىم ارتىق!» دەپ، تەگىن ايتپاعان.

جاقىندا توققوجا دەگەن ەڭسەلى جىگىتتى قابىلدادىم. پارتياعا جۇمىس ىزدەپ كەلىپتى. ەكى يىنىنەن دەم الادى. بويى دا، ويى دا كەرەمەت! بىراق، جۇمىسسىز. ۇكىمەت پەن پارتيانى سىباپ، ءبىراز جەرگە اپارىپ تاستادى.

سول توققوجا ايتادى، قازاقستاندا جۇمىس جوق، ۇكىمەت جۇمىس بەرۋى كەرەك بىزگە دەپ...

مەن ايتام، قازاقستاندا جۇمىس وتە كوپ. جۇمىس بولماسا، وزبەكتەر قالاي داعار-داعار اقشا تابادى؟! قىرعىزدار بۋما-بۋما تەڭگە مەن دوللاردى قايدان تاۋىپ جاتىر دەپ...

ول ايتادى، ولار ارزانعا ىستەي بەرەدى دەپ...

مەن ايتام، ءىنىم-وۋ، سەن دە نەگە سول جۇمىستى ارزانعا ىستەمەيسىڭ دەپ...

ول ايتادى، اعا، ءسىز بىلمەيسىز، بىزدە ازىق-تۇلىك قىمبات، ارزانعا ىستەسەم، تابىسىم جەتپەيدى دەپ...

مەن ايتام، نە، سوندا وزبەكتەر تۇسكى تاماعىن تاشكەنتتەن بارىپ ءىشىپ كەلەمە، قىرعىزدار كەشكى اسىن بيشكەكتەن بارىپ جەپ كەلەمە دەپ...

اقىرى توققوجا جەڭىلدى. قولدى ءبىر سىلتەپ، شىعىپ كەتتى...

كوردىڭىز بە، جۇرتتىڭ جۇمىس دەگەن ۇعىم جونىندەگى تۇسىنىگى تاياز.

توققوجاعا قاراعاندا ماناعى بەكقوجاعا جولىققان قۇرت ساتۋشى اپانىڭ جۇمىس جونىندەگى تانىمى الدە قايدا تەرەڭ بە دەپ ويلايسىڭ. ال، سانا-سەزىمى، ءتىپتى، ەكى مەملەكەتتىڭ نارىقتىق قۇرلىمىن كورگەن، وقۋدىڭ ءتۇبىن تۇسىرگەن بەكقوجادان دا بيىك پە ەكەن دەپ قالدىم.

انە، ەشكىممەن شارۋاسى جوق، ەشكىمگە باعىنىشتى دا ەمەس. ءوز بەتىنشە كىرىس تاۋىپ ءجۇر. سۋرەتىنەن بولسا دا كورىنىپ تۇر،  ومىرگە، ەڭبەككە دەگەن قۇشتارلىعىن قانداي كەرەمەت! زەينەتاقسى بار بولۋى سەكىلدى  (ونى نۇر-سۇلتانعا قايتىپ كەلگەن سوڭ بەكەڭنەن سۇراپ بىلەتىن بولام). بولسا نە بولىپتى، بوي جازىپ، قوسىمشا تابىس تاپسا، قالتاسىن تەسىپ كەتە مە؟! بولماسا، ۇل مەن كەلىننىڭ قولىنا قاراپ، ءموليىپ وتىرعانشا، سىرتقا شىعىپ، ون تال قۇرتىن بەس ءجۇز تەڭگەگە وتكىزىپ، وتباسىنىڭ تيتتەي تەسىگىن جاماۋعا سەپ بولسا، ونىڭ نەسى جامان؟!!

ماسەلە – ونىڭ قۇرت ساتىپ، «تەنتىرەپ» جۇرۋىندە ەمەس. ماسەلە – ونىڭ حارەكەتىندە بولىپ تۇر. حارەكەت بار جەردە بەرەكەت بار! قۇداي حارەكەتسىز قالىپ، بوس ءسوز ساپىرعاننان ساقتاسىن دە!! كىشكەنتاي عانا ءونىمىن كادەگە جاراتقان اپادان اينالىپ كەتپەيمىز بە؟!

داۋ جوق، بەكقوجا جىلقىبەك – مىقتى ۇستاز. جانە ءوز ماماندىعىن جان-تانىمەن ءسۇيتىن ءبىلىم يەسى. اتاجۇرتقا ورالعان سوڭ دا جوقشىلىق پەن بويداقتىقتىڭ ازابىن ءبىر كىسىدەي تارتقانىمەن، ءوزى تاڭداعان سۇيىكتى ماماندىقتان ءبىر ءسات اۋىتقىعان ەمەس. ونىڭ بۇل قايسارلىعى مەن ۇستانىمىنا مەن، شىنىمدى ايتايىن،  باسىمدى يەم.

ەسىڭىزدە بولسىن، ۇستازدىڭ ساباق بەرۋدەن وزگە، شاكىرتىن ىزگىلىككە تاربيەلەيتىن قاسيەتتى بورىشى تاعى بار. ونىڭ جولى ەكەۋ-اق. ءبىرى – جاقسىلىقتى ايتىپ، سوعان جەتەلەۋ; ەكىنشىسى – جاماندىقتى ايتىپ، ودان جيىركەندىرۋ. ءبىزدىڭ قازاقتىڭ تابيعاتى سولاي، ەڭ الدىمەن جاقسىلىق پەن ىزگىلىكتى، قايىرىمدىلىق پەن جومارتتىقتى كوبىرەك ايتادى. «جاقسى ءسوز – جارىم ىرىس»، «ىرىگەننىڭ اۋزىنان شىرىگەن ءسوز شىعادى» دەگەن ەكى ماقال سونىڭ ايعاعى بولسا كەرەك.

ءار جىلى ۇلاعاتتى ۇستاز بەكقوجا جىلقىبەكتىڭ الدىنان ءدارىس العالى كەمىندە جۇزگە جۋىق نەمەسە ودان دا كوپ شاكىرت كەلەدى، بىلەم. ەرتەڭ ەنۋ-دى بىتىرگەن سول جاستاردىڭ ءبارى مەملەكەتتىك قىزمەتكە ورنالاسپايتىنى بەلگىلى. ءتىپتى، كومپانيالارعا دا جۇمىسقا تۇرا الماي قالاتىندارى شىعۋى مۇمكىن.

ەگەر، ۇستازدارى سول شاكىرتتەرگە ماناعى قۇرت ساتقان اپانى ۇلگى ەتىپ كورسەتىپ، نارىققا تالابىنا بەيىمدەپ جانە ادال ەڭبەك ەتۋگە جول سىلتەپ، حاكىم ابايدىڭ «ەسەكتىڭ...» دەپ باستالاتىن اتاقتى ءسوزىن ميىنا قۇيىپ جىبەرسە، ولار ەرتەڭ «NUR OTAN» پارتياسى حالىقتىڭ جاۋى دەپ، ميتىنگىلەتپەيدى. قايتا، تۇك قينالماستان نارىق زاڭى بويىنشا اقشا تاباتىن جەكە كاسىپ اشىپ الادى. ارى قاراي جىلقىبەك اقساقالدىڭ اۋلەتى قۇساپ ۇكىمەتتەن شاعىن نەسيە الىپ، كاسىپتەنىپ كەتەدى.

وسى جەردە مەن شەتتەن ورالعان، اسىرەسە، قىتاي مەن ماڭعوليادان كەلگەن قانداستارىمىزدىڭ نارىققا وتە بەيىم ەكەنىن ماقتانىشپەن ايتا كەتكىم كەلەدى. ءبىزدىڭ «NUR OTAN» پارتياسىنا شەتتەن كەلگەن اعايىندار قۇجاتتىق ماسەلەلەرگە بايلانىستى كومەك سۇراپ كوپ كەلەدى. قازىرگى تاڭدا ول دا سايابىرلادى. ال، جۇمىس سۇراپ كەلەتىندەر جوقتىڭ قاسى دەۋگە بولدى.  كەرەك بولسا، ولار ۇكىمەت باسىنىڭ نە ىستەپ جاتىر؟، اكىمىڭ قايدا؟ شارۋاسى جوق! ودان گورى، بالەن جەردە پالەنباي قۇلىندى بيەسى مەن بۇزاۋلى سىيىرىن ارزان ساتادى ەكەن دەگەندى تەزىرەك ەستىپ تۇرادى. جاستارى شاش-تىرناق الۋدان باستاپ، اسپازدىق، داياشىلىق سەكىلدى جۇمىستاردى تۇگەل الىپ قويدى.

سوندىقتان، قازاق ۇكىمەتى ەڭ الدىمەن جۇرتقا جۇمىس كوزىن وزدەرى اشۋعا كەڭ جول اشقانى ءابزال. ودان دا ماڭىزدىسى، حالىقتىڭ «جۇمىس» دەگەن ۇعىم جونىندەگى كوزقاراسىن وزگەرتۋگە، ول ءۇشىن قۇرت ساتىپ، اقشا تاپقان انا اپالاردىڭ قاجىرلىلىعىن جاستارعا ۇلگى ەتىپ كورسەتۋگە ءتيىسپىز. كەشەگى جىلقىبەك اۋلەتىنىڭ سۋرەتى ىلىنگەن بانەرلەردە بۇگىن بەكقوجا جىلقىبەك ءتۇسىرىپ العان قۇرت ساتقان اپانىڭ بەينەسى تۇراتىن مەزگىل جەتتى. سوعىس باتىرلارىن ۇلگى ەتكەننەن گورى، بەيبىت كۇندە، نارىقتىق زاماندا ۇكىمەتكە يەك ارپاي، ءوزىن-ءوزى جۇمىسپەن قامتىپ كەلە جاتقان ەڭبەك ادامدارىن كوبىرەك دارىپتەۋ الدەقايدا ءتيىمدى.

ال، پارتياعا كەلسەك، كىنا «NUR OTANDA» ەمەس. كىنا – ونىڭ باسقارۋشى مەن قىزمەت ەتۋشىسىندە.

باس پارتيانى ءار كەزەڭدە باسقارعان تۇلعالار بولدى. مىسىلى، باقىتجان جۇماعۇلوۆ كوپ پارتيانىڭ باسىن قوسىپ، ۇلكەن پارتيا جاساۋعا كۇش سالدى. ارىپتەستەرىم دارحان قالەتاەۆتىڭ قاراپايىمدىلىعى مەن حالىققا جاقىندىعىن اڭىز ەتىپ ايتادى. مۇحتار قۇل-مۇحاممەد مينيسترلەردى ورتالىق اپپاراتقا شاقىرىپ الىپ، دەپۋتاتتارعا سۇراق قويعىزىپ، ەلباسى تاپسىرماسىنىڭ ورىندالۋ بارىسىنان اي سايىن ەسەپ الىپ وتىراتىن. باۋىرجان بايبەك تۇسىندا پارتيا ورتالىقتان باستاپ، اۋداندارعا دەيىن دەربەس ۇيلەرگە يە بولىپ، ءوز تۋىن تىكتەدى، ايبىنى اسقاقتادى...

مىنە، سول باۋىرجان قىدىرعاليۇلى اراعا بەس جىلعا جۋىق ۋاقىت سالىپ، ۇلكەن مەكتەپتەن ءوتىپ، «NUR OTAN» پارتياسىنا توراعانىڭ ءبىرىنشى ورىنباسارى بولىپ قايتا كەلدى. وتە قيىن، كۇردەلى كەزەڭدە – «بەكقوجالاردىڭ» بەت قاراتپاي تۇرعان شاعىندا ورالىپ وتىر. مەن ول جىگىتتىڭ جەڭىسكە جەتەتىنىنە سەنەم!

ءسوز سوڭىنا قاراي، مەن بەكقوجا جىلقىبەك اعاما، تاعدىرلاس اعايىندارىما ايتار ءۋاجىم – سىزدەر نارىقتىق ەكونوميكاعا ەرتە بەيىمدەلگەن ەلدەن كەلگەن ازامات رەتىندە اعارتۋ جۇمىسىن كوبىرەك جۇرگىزىڭىزدەر. وزدەرىڭىز قول جەتكىزگەن تابىسقا اينالاڭىزداعىلاردىڭ دا جەتۋىنە كومەكتەسىڭىزدەر. ايعاي-شۋى كوبەيىپ تۇرعان كۇردەلى كەزەڭدە ساياساتتان گورى جۇرتتى ءوز بەتىمەن جۇمىس ىستۋگە ۇگىتتەيىك. اقىلىمىز اسىپ بارا جاتسا، مامين مەن بايبەككە جاڭا باعدارلاما ۇسىنىڭىزدار.

تاعى ءبىر ءوتىنىش، الەۋمەتتىك جەلىلەردەگى پاراقشالارىڭىزداعى جازبالارىڭىزدىڭ ەملەسىنە مەن دايەكتىلىگىنە نازار اۋدارىڭىزدارشى. مادەنيەتتى جازۋعا داعدىلانايىقشى، تۋىستار!

ال، بەكقوجا كوكەم كاسىپكەرلىك جولىنداعى ءوز تاجىريبەسىنە سۇيەنىپ، اۋىل شارۋاشىلىعىن قارجىلاي قولداۋ قورىنىڭ «سىباعا» باعدارلاماسىنىڭ ارتىقشىلىعى مەن كەمشىلىگىن ساراپتاپ، عىلمي ماقالا جازسىن! ۇسىنىسىن ءبىزدىڭ پارتياعا اكەلسىن! ءبىز ونى مينيسترلىككە جولداپ، اتالعان باعدارلامانى ودان ارى كەمەلدەندىرە تۇسۋگە ىقپال ەتۋگە ارەكەت جاسايىق...

ەڭ باستىسى، ايعايعا باسىپ، ارتتاعى ەلدىڭ اتاجۇرتقا ورالۋىنا كەرى اسەر ەتپەيىك!

«قازاق كەمپىرلەر پويىزدا قۇرت ساتىپ جۇرەدى ەكەن!» دەسە، ءبىزدىڭ ارعى بەتتەگى قازاق، ءتاپ ءبىر وزدەرى جەتىسىپ وتىرعانداي، تىكسىنە قالۋى بەك مۇمكىن!

تاعى قايتالاپ ايتايىن، «NUR OTAN» پارتياسى – وتانىنا، ۇلتىنا قىزمەت ەتەم دەگەن ءاربىر سانالى ازامات ءۇشىن تەڭدەسسىز مۇمكىندىك الاڭى. مەن پارتيادا بەكقوجا ءۇمىت ارتىپ، سالماق سالاتىنداي سونشالىقتى ءبىر ىقپالدى تۇلعا ەمەسپىن. بار بولعانى، پارتيانىڭ شارۋاشىلىق بولىمىنەن ايلىق الاتىن قاتارداعى كوپ كەڭەسشىنىڭ ءبىرىمىن. سوعان قاراماستان، «NUR OTAN»-نىڭ قولدا بار مۇمكىندىگىن ءوز الىمشە پايدالانىپ، ۇلت كوشباسشىسى نۇرسۇلتان نازارباەۆتىڭ "كوشى-قون" دەپ اتالاتىن تۇڭعىش ءھام ۇلى ساياساتىن دارىپتەۋگە، ونىڭ كۇن تارتىبىندەگى ماسەلەلەرىن شەشۋگە جانە زاڭنامالىق نەگىزىن كەمەلدەندىرە تۇسۋگە بار كۇشىمدى جۇمسادىم.

ءبۇل – پارتياعا مۇشە بولۋداعى، جۇمىسقا تۇرۋداعى ەڭ باستى ارمانىم بولاتىن.

قازىر سول ارمانىمنىڭ الپىس پايىزعا جۋىعى ورىندالدى.

ءوتىنىش ايتىپ كەلگەن، قوڭىراۋ شالعان، حات جازعان اعايىننىڭ شەشىلمەگەن ماسەلەسى وتە از. زاڭ اياسىندا شەشۋ مۇمكىن بولماعان كەزدە، سول زاڭىڭىزدىڭ ءوزىن وزگەرتىپ، تولىقتىرىپ جىبەرۋگە دەيىن ىقپال ەتۋدە ءبىزدىڭ پارتيا...

كوشى-قون ساياساتى، ونىڭ سوڭعى ءتورت-بەس جىلدىڭ كولەمىندە كەمەلدەنگەن زاڭناماسى تۋرالى جۇرت بەتىنە تىكە قاراپ، ۇيالماي جاۋاپ بەرە الام مەن!

ءبىر سوزبەن ايتقاندا، قانداستارىمىزدىڭ الدىندا «NUR OTAN» پارتياسىنىڭ بەتى جارىق، بەكقوجا جىلقىبەكۇلى!!!

اۋىت مۇقيبەك

نۇر-سۇلتان قالاسى

Abai.kz