ءماجىلىس سپيكەرى نۇرلان نىعماتۋليننىڭ توراعالىعىمەن پارلامەنت پالاتالارىنىڭ بىرلەسكەن وتىرىسى ءوتتى. بىرلەسكەن وتىرىس سوڭىندا التىنشى سايلانعان قازاقستان رەسپۋبليكاسى پارلامەنتى ءتورتىنشى سەسسياسى اياقتالىپ، پارالامەنتتىڭ دەمالىسقا كەتەتىنى جاريالاندى.

بىرلەسكەن وتىرىستا ءماجىلىس توراعاسى التىنشى سايلانعان پارلامەنتتىڭ ءتورتىنشى سەسسياسى وتە ماڭىزدى جانە تاريحي كەزەڭدە وتكەنىن ايتىپ، جىلدى قورىتىندىلادى.

«بۇگىن ءبىز التىنشى سايلانعان قر پارلامەنتىنىڭ ءتورتىنشى سەسسياسىن اياقتاپ وتىرمىز. بۇل ءداستۇر بويىنشا اتقارىلعان جۇمىستارعا ەسەپ بەرىپ، الداعى ماقساتتارعا نازار اۋداراتىن ماڭىزدى كەزەڭ. ارينە، قاي قوعامدا بولسا دا، قاي ۋاقىتتا بولسا دا زاڭنىڭ ورنى ارقاشان دا ەرەكشە. سەبەبى، زاڭ بار جەردە ادىلدىك، بوستاندىق جانە تىنىشتىق بار. وسى جولدا پارلامەنت ەلىمىز ءۇشىن، حالقىمىز ءۇشىن كوپتەگەن قاجەتتى زاڭداردى قابىلدادى. وندا ەلباسى نۇرسۇلتان ءابىشۇلى نازارباەۆتىڭ ءتورتىنشى سەسسيانىڭ اشىلۋىندا بەرگەن تاپسىرمالارى مەن قازاقستان حالقىنا جولداۋى باسشىلىققا الىندى»، - دەپ توقتالدى قر پارلامەنتى ءماجىلىسىنىڭ توراعاسى نۇرلان نىعماتۋلين.

وسى ورايدا ول وتكەن سەسسيا ماڭىزدى تاريحي وقيعالارعا تولى بولعانىن اتاپ ءوتتى. بىرلەسكەن وتىرىس بارىسىندا ن. نىعماتۋلين ءداستۇر بويىنشا اتقارىلعان جۇمىستارعا ەسەپ بەردى.

«سەسسيا بارىسىندا قوس پالاتانىڭ 5 بىرلەسكەن وتىرىسى، ءماجىلىستىڭ  41 جانە سەناتتىڭ 26 جالپى وتىرىسى ءوتتى. وندا 319 ماڭىزدى ماسەلە قارالدى. جالپى، ءتورتىنشى سەسسيا باستالعان كەزدەن 83 زاڭ جوباسى قابىلداندى. ونىڭ ىشىندە 82 قۇجاتقا مەملەكەت باسشىسى قول قويىپ، ولار ءوز كۇشىنە ەندى»، - دەدى ءماجىلىس توراعاسى.

وتكەن سەسسيادا پارلامەنتتە 20 ۇكىمەت ساعاتى، ءۇش پارلامەنتتىك تىڭداۋ، 24 «دوڭگەلەك ۇستەل» وتىرىسى، كوميتەتتەردىڭ 29 كوشپەلى وتىرىسى، سونداي-اق ءتورت حالىقارالىق كونفەرەنتسيا ۇيىمداستىرىلدى. ولار وتە ماڭىزدى ەلىمىزدىڭ ەكونوميكالىق جانە الەۋمەتتىك ماسەلەلەرىنە ارنالدى.

«پارلامەنت جۇمىسىندا دەپۋتاتتىق ساۋالداردىڭ ءرولى دە وتە زور. ول ەڭ الدىمەن ءاربىر ازاماتتىڭ، حالقىمىزدىڭ نازارىندا جۇرگەن سۇراقتاردى شەشۋگە باعىتتالادى. وسىعان بايلانىستى پارلامەنتتىڭ قوس پالاتاسىنىڭ دەپۋتاتتارى وتكەن سەسسيادا 319 دەپۋتاتتىق ساۋال جولدادى. سونىڭ ىشىندە ءماجىلىس دەپۋتاتتارى 211, سەنات دەپۋتاتتارى 108 ساۋال جولدادى»، - دەدى نۇرلان نىعماتۋلين.

ەسكە سالا كەتەيىك، پارلامەنتتىڭ ءتورتىنشى سەسسياسى 2019 جىلعى 5 شىلدەگە دەيىن ۇزارتىلدى.

اتاپ ايتقاندا، ماڭىزدى شارالاردى ىسكە اسىرۋ ءۇشىن 2019-2021 جىلدارعا ارنالعان رەسپۋبليكالىق بيۋدجەت تۋرالى زاڭعا وزگەرىستەردى ەنگىزۋ قاجەت بولدى. وسىعان بايلانىستى بيۋدجەتكە ەنگىزىلەتىن وزگەرىستەردى قاراستىرۋ ءۇشىن پارلامەنت سەسسياسىنىڭ جۇمىس مەرزىمى ۇزارتىلدى.

وسى اپتادا قازاقستان پارلامەنتى «2019-2021 جىلدارعا ارنالعان رەسپۋبليكالىق بيۋدجەت تۋرالى» قر زاڭىنا وزگەرىستەر مەن تولىقتىرۋار ەنگىزۋ تۋرالى» زاڭىن قابىلدادى.

Abai.kz