قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلباسى نۇرسۇلتان نازارباەۆتىڭ تاپسىرماسى بويىنشا جانە مەملەكەت باسشىسى قاسىم-جومارت توقاەۆتىڭ مەگاپوليسكە جاساعان ءىسساپارى بارىسىندا قويعان ناقتى مىندەتتەر اياسىندا ازىرلەنگەن شىمكەنت قالاسىن  دامىتۋدىڭ 2023 جىلعا دەيىنگى كەشەندى جوسپارىنىڭ جوباسى قارالدى. 

كەشەندى جوسپاردىڭ نەگىزگى باعىتتارى مەن ءىس-شارالارى تۋرالى شىمكەنت قالاسىنىڭ اكىمى ع. ءابدىراحىموۆ باياندادى. ۇلتتىق ەكونوميكا ءمينيسترى ر. دالەنوۆ كەشەندى جوسپاردى ىسكە اسىرۋدىڭ قالا جانە جالپى ەل ەكونوميكاسى ءۇشىن كۇتىلەتىن الەۋمەتتىك-ەكونوميكالىق اسەرى تۋرالى باياندادى.

كەشەندى جوسپاردا بارلىق ىسكە اسىرۋ كەزەڭىندە جالپى 1 ترلن تەڭگەدەن استام سوماعا 89 ءىس-شارانى جۇزەگە اسىرۋ جوسپارلانعان، ونىڭ ىشىندە 836 ملرد تەڭگە (65%) – جەكە ينۆەستيتسيالار ەسەبىنەن،  68 ملرد تەڭگە – ءمجا ارقىلى. بۇل قۇجاتتى ىسكە اسىرۋ قالا اۋماعىن ىقشام سالۋدى جانە وڭتايلاندىرۋدى، ينفراقۇرىلىمدى ءتيىمدى پايدالانۋدى قامتاماسىز ەتەدى، سونداي-اق تۇرعىندار ءۇشىن قولايلى جانە ىڭعايلى جاعدايلار تۋدىرادى.

«شىمكەنت - قازاقستاننىڭ ونەركاسىپتىك، ساۋدا-ساتتىق جانە مادەني ورتالىقتارىنىڭ ءبىرى»، - دەدى قر ۇكىمەتىنىڭ باسشىسى جانە قالانى ودان ءارى دامىتۋدى قامتاماسىز ەتۋ بويىنشا بىرقاتار ناقتى تاپسىرمالار بەردى.

كەشەندى جوسپاردى جۇزەگە اسىرۋ ينۆەستيتسيالاردىڭ كولەمىن بەس جىلدىڭ ىشىندە 1 ترلن تەڭگەگە دەيىن جەتكىزۋ ءۇشىن جاعدايلار تۋدىرۋعا مۇمكىندىك بەرەدى. ينۆەستيتسيالىق الەۋەتتى دامىتۋ ماقساتىندا جاڭا «جۇلدىز» جانە «شىمكەنت اگرو» يندۋستريالدىق ايماقتارىنىڭ قۇرىلىسىن قامتاماسىز ەتۋ، «وڭتۇستىك» اەا تەرريتورياسىن ۇلعايتۋدى قامتاماسىز ەتۋ تاپسىرىلدى.

 كولىك جانە ينجەنەرلىك ينفراقۇرىلىمدى دامىتۋ باعىتى بويىنشا 2020 جىلى اۋەجايدىڭ جاڭا جولاۋشىلار تەرمينالىنىڭ قۇرىلىسىن جانە تەمىرجول ۆوكزالىن جاڭعىرتۋ جۇمىستارىن اياقتاۋ جوسپارلانعان.  سونىمەن قاتار، تاشكەنت داڭعىلىن جالعاستىرۋ جانە ا2 اينالما اۆتوجولىنىڭ قۇرىلىسى قامتاماسىز ەتىلەدى. بۇل قالانىڭ كولىك الەۋەتىن ارتتىرۋعا مۇمكىندىك بەرەدى.

ءوز كەزەگىندە، قالانى ەنەرگيامەن قامتۋ جانە گازبەن قامتاماسىز ەتۋ ءۇشىن قر پرەمەر-ءمينيسترى اسقار مامين گاز تاراتۋ ستانتسياسىنىڭ (اگرس-3), سونداي-اق ERG كومپانياسىنىڭ جەكە ينۆەستيتسيالارى ەسەبىنەن قۋاتى 450 مەگاۆاتت بۋ-گاز قوندىرعىسىنىڭ قۇرىلىسىن اياقتاۋدى تاپسىردى.

«كەشەندى جوسپار تۇرعىن ءۇي قۇرىلىسىنىڭ كولەمى كەزەڭ-كەزەڭمەن بيىل 500 مىڭ شارشى مەتردەن جىلىنا 1 ملن-عا دەيىن ارتتىرىپ، تۇرعىن ۇيمەن قامتاماسىز ەتۋدى 1 تۇرعىنعا شاققاندا 30 شارشى مەتر دەڭگەيىنە دەيىن جەتكىزۋگە مۇمكىندىك بەرەدى»، - دەدى اسقار مامين. مىسالى، «شىمكەنت سيتي» جوباسىن جۇزەگە اسىرۋ الەۋمەتتىك ينفراقۇرىلىمى دايىن 1,5 ملن ش.م. تۇرعىن ءۇي سالۋعا مۇمكىندىك بەرەدى.

قر مينيسترلەر كابينەتىنىڭ باسشىسىنىڭ ايتۋىنشا، ول ءۇشىن تۇرعىن ءۇي قۇرىلىسىن دامىتۋدى جالعاستىرۋ قاجەت. وسى رەتتە، قالانىڭ ىقشام قۇرىلىسىنا جانە تۇرعىن ءۇي قۇرىلىسىنىڭ حالىقارالىق ستاندارتتارى بويىنشا جۇمىس ىستەيتىن ينۆەستورلاردىڭ تاجىريبەسىن پايدالانۋ باسا نازار اۋدارىلادى.

دامۋ پەرسپەكتيۆالارى تۋريستىك سالادا كەڭەيۋدە. «تسيتادەل» قالاشىعىن قايتا جوندەۋدى جانە حالىقارالىق دەڭگەيدەگى ويىن-ساۋىق ساياباعىنىڭ قۇرىلىسىن اياقتاۋ تۋريستەردىڭ قوسىمشا اعىنىن قامتاماسىز ەتەدى. سونىمەن قاتار، شىمكەنت قالاسىنىڭ تۇركىستان مەن تاشكەنتكە جاقىن ورنالاسۋى تۋريستىك ينفراقۇرىلىمىنىڭ دامۋىنا جانە جاڭا جۇمىس ورىندارىنىڭ اشىلۋىنا ناقتى سەرپىن مەن سينەرگەتيكالىق اسەر بەرەدى.

شىمكەنت قالاسى 2020 جىلى تمد مادەني استاناسى بولىپ جاريالاندى. وسى رەتتە مەملەكەتتىك ورگاندارعا الەۋمەتتىك جانە ينفراقۇرىلىمدىق نىسانداردىڭ ازىرلىگىن ۋاقىتىلى قامتاماسىز ەتۋ تاپسىرىلدى.

«كەشەندى جوسپاردى ىسكە اسىرۋدىڭ ارقاسىندا شىمكەنت قالاسىنىڭ جالپى وڭىرلىك ءونىمى 2018 جىلعى 2 ترلن تەڭگەدەن، 2023 جىلعا قاراي 3,5 ترلن تەڭگەگە دەيىن جەتكىزىلەدى»، - دەدى اسقار مامين.

Abai.kz