ەلوردانىڭ ەسىل اۋدانىنىڭ №2 سوتى ۆيتسە-مينيستر ەلميرا سۋحانبەرديەۆانىڭ ءىسى بويىنشا شەشىم شىعاردى

ايتا كەتەيىك، تەرگەۋ كەزىندە سۋحانبەرديەۆا مەن شەۆەرنياەۆا كىنانى تولىعىمەن مويىنداپ، ءوز ەركىمەن پروتسەسسۋالدى كەلىسىمگە كەلدى. پروكۋرور ۆيتسە-مينيسترگە 2500 ايلىق ەسەپتىك كورسەتكىش كولەمىندە (6 312 500 تەڭگە), ال ەلەنا شەۆەرنياەۆاعا 500 اەك كولەمىندە (1 262 500 تەڭگە) ايىپپۇل سالۋدى ۇسىندى. بۇدان بولەك، جەكەمەنشىك مەكتەپ ديرەكتورىنىڭ كابينەتىنەن تاركىلەنگەن 11 475 300 تەڭگەنى مەملەكەت مەنشىگىنە الىپ قويۋدى سۇراعان.

بۇگىن سۋديا باقىتجان ەسەنوۆ سوتتىڭ شەشىمىن جاريالادى. وعان سايكەس، پروكۋروردىڭ بارلىق تالاپتارىن قاناعاتتاندىردى. ەكەۋىنە دە مەملەكەتتىك قىزمەتتە جۇمىس ىستەۋگە تىيىم سالىندى.

سۋحانبەرديەۆا مەن شەۆەرنياەۆا قىلمىستى قالاي جاسادى؟

كەشە اتالعان ءىس بويىنشا العاشقى سوت وتىرىسى وتكەن بولاتىن. سول جەردە مەملەكەتتىك ايىپتاۋشى تەرگەۋ ماتەريالدارىن جاريالدى.

پروكۋرور نۇرلان بەكماعامبەتوۆتىڭ ايتۋىنشا، ۆيتسە-مينيستر ەلميرا سۋحانبەرديەۆا №3 مەكتەپ گيمنازياسىنىڭ بۇرىنعى ديرەكتورى ەلەنا شەۆەرنياەۆامەن بىرگە زاڭعا قايشى ارەكەت جاساعان. ولار ءدال سول مەكتەپتىڭ عيماراتىندا "تسەنترالنايا" اتتى جەكەمەنشىك ەكونوميكالىق مەكتەپتى اشقان. سونىڭ سالدارىنان مەملەكەتتىك مەكتەپتە ورىن ازايىپ، باسقا بالالار وقۋعا قابىلدانبادى.

"2016 جىلى شىلدە ايىندا سول كەزدەگى استانا قالالىق ءبىلىم باسقارماسىنىڭ باسشىسى سەنعازيەۆ شەۆەرنياەۆانى شاقىرىپ، جەكەمەنشىك مەكتەپتى باسقا جەرگە كوشىرىپ، بوساعان ورىندى №3 مەكتەپ گيمنازياسى ءۇشىن پايدالانۋدى ۇسىنعان. شەۆەرنياەۆا ونى بىردەن سۋحانبەرديەۆاعا جەتكىزگەن", - دەدى بەكماعامبەتوۆ.

سودان سۋحانبەرديەۆا ءوزىنىڭ قىزمەتتىك وكىلەتتىگىن پايدالانىپ، سەنعازيەۆپەن سويلەسىپ، جەكەمەنشىك مەكتەپكە تيىسپەسىن دەگەن. سەنعازيەۆ ۆيتسە-مينيستردەن اياق تارتىپ، اتالعان ماسەلەنى ارى قاراي كوتەرمەگەن.

ۆيتسە-مينيستر مەكتەپتى باسقارۋعا قالاي ارالاستى؟

تەرگەۋ ماتەريالدارىنا سايكەس، 2019 جىلدىڭ باسىندا سۋحانبەرديەۆا سەنىمدى ادامدارى ارقىلى جەكەمەنشىك مەكتەپتىڭ جۇمىسىنا ارالاسا باستايدى. ال شەۆەرنياەۆا ۆيتسە-ءمينيستردىڭ قولداۋ جاسايتىنىن بىلە تۇرا، "تسەنترالنايا" مەكتەبىنىڭ ۇيىمداستىرۋ فورماسىن اۋىستىرىپ، جاۋاپكەرشىلىگى شەكتەۋلى سەرىكتەستىك رەتىندە قۇرۋدى ۇسىنادى. سۋحانبەرديەۆا اتالعان ۇسىنىسپەن كەلىسكەن. وسىلايشا، ەكەۋى جشس-نى بىرگە باسقارۋعا، تابىستى بولۋگە جانە يۆەستيتسيانى بىرلەسىپ سالۋعا ۋاعدالاسقان. سۋحانبەرديەۆا مەملەكەتتىك قىزمەتىن پايدالانىپ، جەكەمەنشىك مەكتەپكە قولداۋ جاساۋعا كەلىسىمىن دە بەرگەن.

"سۋحانبەرديەۆا مەن شەۆەرنياۆا جشس-نىڭ قۇرىلتايشىسى رەتىندە وزدەرىن ەمەس، تۋعان-تۋىستارىن راسىمدەۋگە ۋاعدالاسقان. ءسويتىپ، جەكەمەنشىك فيرمانىڭ قۇرامىنا سۋحانبەرديەۆانىڭ تۋعان اپاسى جانە شەۆەرنياەۆانىڭ اناسى ەندى. بۇدان بولەك، ەكەۋى جەكەمەنشىك مەكتەپتىڭ جاڭا عيماراتىن الۋ ءۇشىن  جشس ەسەپشوتىنا 154 ميلليون 523 مىڭ 400 تەڭگە سالعان", - دەپ اتاپ كورسەتتى پروكۋرور.

"جەتىم بالالار پلانشەت السا ەكەن دەپ ويلادىم"

بۇدان بولەك، ۆيتسە-مينيستر سۋحانبەرديەۆا ۇيالى تەلەفوندار مەن پلانشەتتەردى مينيسترلىككە قاراستى مەكەمەلەرگە الدىرتقانى ءۇشىن ايىپتالىپ وتىر.

پروكۋروردىڭ سوزىنە قاراعاندا، بيىل 1 ماۋسىم – بالالاردى قورعاۋدىڭ حالىقارالىق كۇنى اياسىندا پرەزيدەنتتىڭ كوپبالالى وتباسىدان شىققان بالالارمەن كەزدەسۋى بولعان. وعان دەيىن ءبىلىم ءمينيسترى ەرلىك جاساعان ەكى وقۋشىمەن جۇزدەسكەن. سۋحانبەرديەۆا وسى وقۋشىلارعا ايفون، ال قازاقستان پرەزيدەنتىمەن كەزدەسكەن 41 بالاعا پلانشەت بەرۋدى ۇسىندى. ءسويتىپ، اتالعان تەحنيكالىق قۇرالداردىڭ ءبارىن مينيسترلىكپەن جۇمىس ىستەيتىن مەكەمەلەرگە الدىرتقان. ماسەلەن، پلانشەتتەردى باسپا ورتالىقتارى ساتىپ الادى. سوتتا ۆيتسە-مينيستر سۋحانبەرديەۆا دا وسى ماسەلەگە قاتىستى ءوز ويىن ايتتى.

"مەن 41 كوپبالالى وتباسىدان شىققان جانە جەتىم بالا پلانشەت السا ەكەن دەپ ويلادىم. سول سەبەپتى وسىنداي ارەكەتكە باردىم. مەن كەلىسەمىن. ماعان ەشكىم قىسىم جاساعان جوق. پروتسەسسۋالدى كەلىسىمگە ءوز ەركىممەن كەلىستىم. جازامەن دە كەلىسەمىن", - دەدى ۆيتسە-مينيستر.

ال ايفون العان وقۋشىلاردىڭ بىرەۋى بالالاردى ورتكە ورانعان ۇيدەن، ال ەكىنشىسى كىشكەنتاي بالانى قۇدىقتان الىپ شىققان. ءسويتىپ، ادام ءومىرىن ساقتاپ قالدى. ۆيتسە-مينيستر سۋحانبەرديەۆانىڭ ءوزى ءبىر سەزدە ول بالالاردىڭ نەنى قالايتىنىن سۇراعان. سول كەزدە ولار ايفون الىپ بەرۋدى وتىنگەن.

دەرەككوز: sputniknews.kz

Abai.kz