ميليتسيا قىزمەتكەرلەرى شاقىرتۋدى اتامباەۆتىڭ كوي-تاش اۋىلىنداعى ۇيىنە جەتكىزگەن. قاعازدا بۇرىنعى پرەزيدەنتتىڭ ءىىم تەرگەۋ قىزمەتىنە كۋا رەتىندە تۇسىنىك بەرۋى ءۇشىن شاقىرىلاتىنى جازىلعان.
العاشقى شاقىرتۋ اتامباەۆقا 8 شىلدەدە جەتكەن. بىراق "قۇقىق قورعاۋ ورگاندارىنا سەنبەيتىنىن، زاڭ ماسەلەلەرى بويىنشا ادۆوكاتى سەرگەي سلەسارەۆقا جۇگىنۋگە كەڭەس بەرەتىنىن" ايتقان ەكس-پرەزيدەنت تەرگەۋگە بارماعان.
اتامباەۆتىڭ ناقتى قانداي ءىس بويىنشا شاقىرىلىپ جاتقانى رەسمي ايتىلمايدى، بىراق ادۆوكات سلەسارەۆ ءىس قىلمىستىق توپ مۇشەسى ازيز باتۋكاەۆتىڭ "زاڭسىز بوساتىلۋىنا قاتىستى بولۋى مۇمكىن" دەپ توپشىلايدى. زاڭگەر اتامباەۆتىڭ ەكس-پرەزيدەنت مارتەبەسى بار ەكەنىن، قىرعىزستان پارلامەنتىنىڭ تيىسپەۋشىلىك ستاتۋسىن الىپ تاستاۋ تۋرالى شەشىمىنىڭ زاڭدى كۇشى جوعىن ايتىپ، ىشكى ىستەر مينيسترلىگىنە حات جولداعان. سلەسارەۆ "ەكس-پرەزيدەنتتىڭ تەرگەۋگە شاقىرىلۋى زاڭسىز" دەيدى.
25 ماۋسىمدا باس پروكۋرور وتكۋربەك دجامشيتوۆ پارلامەنتتە، 2013 جىلى اتامباەۆ باتۋكاەۆتى بوساتۋ تۋرالى تاپسىرمانى ءوزى بەرگەنىن مالىمدەدى.
27 ماۋسىمدا قىرعىزستان پارلامەنتى المازبەك اتامباەۆتى ەكس-پرەزيدەنت جانە تيىسپەۋشىلىك ستاتۋستارىنان ايىردى. وعان دەپۋتاتتاردىڭ تاققان ايىبى مەن، سول ايىپتى پروكۋراتۋرانىڭ قولداۋى سەبەپ بولدى.
اتامباەۆتىڭ ءوزى جانە ونىڭ جاقتاستارى مۇنىڭ بارلىعىن "قارالاۋ" مەن قازىرگى بيلىكتىڭ "ساياسي باسەكەلەسىنەن قۇتىلۋدىڭ امالى" دەپ باعالايدى. اتامباەۆتىڭ ونداعان جاقتاسى 22 ماۋسىمنان بەرى ونىڭ كوي-تاشتاعى ءۇيىنىڭ ماڭىنان لاگەر قۇرىپ، شتاب اشقان.
ال 3 شىلدەدە بىشكەكتە المازبەك اتامباەۆتىڭ جاقتاسى نارازىلىق شاراسىن وتكىزىپ، قازىرگى بيلىكتىڭ وتستاۆكاعا كەتۋىن تالاپ ەتتى. بۇل شاراعا اتامباەۆتىڭ ءوزى دە قاتىسقان.
Abai.kz
