"التىن ادام" جادىگەرىن تاپقان ارحەولوگ بەكمۇحانبەت نۇرمۇحانبەتوۆتىڭ ەستەلىگىنەن:

1969 جىلى بيىكتىگى التى مەتردەن استام قورعانعا قازبا جۇمىسى جۇرگىزىلەتىن بولدى.(ول جىلى قازبا جۇمىسى تولىق بىتپەي، كەلەسى جىلى تاعى جالعاستىرعان ەدىك). قورعاننان تونالعان، سول ءداۋىردىڭ سالتىمەن جەرلەنگەن، جاسى الپىستان اسقان ەر ادامنىڭ سۇيەگى تابىلدى. توناۋشىلاردان قالعان - قۇتقاندى جيناپ الىپ، قايتۋعا دايىندالدىق. بىراق كوڭىلىم ءبىر جەرگە قايتا - قايتا تۇسە بەردى. جانىمداعى بۋلدوزەرشى ورىس جىگىتىنە "مىنا ءبىر جەردى قوپارىپ بەرشى" دەپ ءوتىندىم. الگى ورىس دەمدە قوپارىپ ەدى، ءبىر بورەنەنىڭ باسى سوپاڭ ەتە قالدى. ءبىزدىڭ كەتەتىنىمىزگە جۇرەگى جارىلا قۋانىپ تۇرعان پرورابقا "مەن مۇنىڭ استىندا نە جاتقانىن ءبىلۋىم كەرەك، قازبا جۇمىسىن جالعاستىرامىز" دەدىم. ءسويتىپ، جەردى ءبىراز قازعاننان كەيىن ۇلكەن كور شىقتى.

وسى ۋاقىتقا دەيىن 2000-نان استام قابىر اشىپپىن، بىراق مىنانداي تونالماعان، قاز-قالپىندا ساقتالعان قابىردى ءبىرىنشى رەت كوردىم. بۇل ءبىزدىڭ بۇگىنگى "التىن ادام" دەپ ايتىپ جۇرگەن ساق پاتشازاداسى ەدى.

وسى "التىن ادامدى" ەگيپەت استاناسى كايرداعى كورمەگە اپارعاندا، ونى تاماشالاعان مىسىرلىقتار، ارحەولوگيالىق تابىلىمدى تانىستىرىپ تۇرعان قازاقتىڭ اتاقتى عالىم-ارحەولوگى كەمەل اقىشەۆتىڭ قاسىنا كەلىپ: "ە-ە سىزدەردە دە فاراوندار بولعان ەكەن عوي", - دەپ قاتتى تاڭىرقاپتى.

وسىلايشا، التىنمەن زەرلەنگەن ساق بيلەۋشىسىنىڭ كيىمى - كونە زاماندا تەك فاراوندار عانا التىنمەن اپتالىپ جۇرگەن، ال قالعان حالىقتار جابايى بولعان دەگەن ويداعى ەگيپەتتىكتەردىڭ پىكىرىن وزگەرتۋگە ءماجبۇر بولعانداي.

اسەت اقمولدانىڭ facebook پاراقشاسىنان

Abai.kz