- كەشە (22 شىلدە - رەد.) الماتىدا بريفينگ، يا ءباسپاسوز ءماسليحاتىن وتپەك بولعاندا ەكى جاق ءوزارا جانجالداسىپ قالدى. ەكى تاراپدىڭ ءبىرى جاراقاتتانعانىن ايتىپ، ەكىنشىسى بۇزاقىلىق جاسالعانى جايلى [پوليتسياعا] ارىزداندى. ءار تاراپ پوليتسياعا، دارىگەرلەرگە كومەككە جۇگىنگەن. قازىر ەكى ارىز تىركەلگەن، ءمان-جايدى انىقتايمىز" دەدى 23 شىلدەدە نۇر-سۇلتاندا ۇكىمەت وتىرىسىنان شىققان سوڭ جۋرناليستەر سۇراعىنا جاۋاپ بەرگەن مينيستر تۇرعىمباەۆ.
ىشكى ىستەر ءمينيسترى جانجالداسقان ەكى تاراپتىڭ كىم ەكەنىن اشىپ ايتپادى.
شىلدەنىڭ 22-ءسى كۇنى 20 شاقتى ايەل الماتىداعى ادام قۇقىعىن قورعاۋ بيۋروسىندا جوسپارلانعان ءباسپاسوز جيىنى الدىندا شاراعا كەلگەن جۋرناليستەرگە شابۋىل جاسادى. شابۋىلعا ۇشىراعاندار اراسىندا ازاتتىق ءتىلشىسى نۇرگۇل تاپاەۆا مەن وپەراتور توقمولدا قۇسايىنوۆ بار. عيماراتتىڭ ءتورتىنشى قاباتىنا كوتەرىلىپ بارا جاتقان جۋرناليستەرگە بىرنەشە ايەل تارپا باس سالىپ، كامەرالارىن سىندىردى. بەلگىسىز ايەلدەر قازتاگ اقپارات اگەنتتىگى مەن "الماتى" تەلەارناسى تىلشىلەرىنە دە شابۋىلداعان.
ادام قۇقىعىن قورعاۋ بيۋروسىندا "مەملەكەت انالار جانە بالالارمەن كۇرەسىپ وتىر" دەگەن تاقىرىپتا ءباسپاسوز ءماسليحاتى ءوتۋى ءتيىس ەدى. جيىندى ۇيىمداستىرۋشىلار ەلدە تىيىم سالىنعان "قازاقستاننىڭ دەموكراتيالىق تاڭداۋى" قوزعالىسىنا (قازاقستان بيلىگى سىناۋشى، قازىر شەتەلدە تۇراتىن قۋعىنداعى بۇرىنعى بانكير مۇحتار ءابليازوۆ قۇرعان) قاتىسى بار دەگەن كۇدىكپەن قاماۋعا الىنعان الماتىلىق كوپ بالالى انا وكسانا شەۆچۋك پەن جالعىزباستى انالار گۇلزيپا جاۋكەروۆا مەن جازيرا دەمەۋوۆانىڭ ۇستىنەن قوزعالعان ءىستىڭ مان-جايىن ايتپاقشى بولعان.
وسى كۇن الماتى قالاسى پوليتسيا دەپارتامەنتى ازاتتىق جانە باسقا باسىلىمداردىڭ تىلشىلەرىنە شابۋىل وقيعاسىنا قاتىستى قىلمىستىق كودەكستىڭ ء"وز بەتىنشە بيلىك ەتۋ" بابى (389-باپ) بويىنشا سوتقا دەيىنگى تەرگەۋ باستالعانىن حابارلادى.
پوليتسيا دەپارتامەنتى ءباسپاسوز قىزمەتىنىڭ دەرەگىنشە، پوليتسياعا ءباسپاسوز جيىنىن ۇيىمداستىرۋشىلار مەن جۋرناليستەر، بارلىعى بەس ادام، شاعىم تۇسىرگەن. بۇدان بولەۋ، تاعى ءۇش ادام "جۋرناليستەر مەن ءباسپاسوز قىزمەتىن ۇيىمداستىرۋشىلار تاراپىنان زارداپ شەكتىم" دەپ پوليتسياعا ارىزدانعان. تەرگەۋدى اۋەزوۆ اۋداندىق پوليتسيا باسقارماسى جۇرگىزەدى.
ازاتتىق تىلشىلەرىنىڭ كاسىبي قىزمەتىنە كەدەرگى كەلتىرۋ وقيعالارى بۇعان دەيىن دە بىرنەشە رەت بولعان. بيىل ناۋرىزدىڭ 22-ءى كۇنى نۇر-سۇلتانداعى (سول كەزدەگى – استانا) بيلىككە قارسى نارازىلىق شاراسىنان حابار تاراتپاق بولعان ازاتتىق جۋرناليستەرىنە ءبىر توپ جاس كەدەرگى كەلتىرىپ، كامەرانى قاعازبەن كولەگەيلەگەن.
مامىردىڭ 1-ءى مەن 9-ى، ماۋسىمنىڭ 9-ى كۇندەرى بيلىككە جانە قازاقستاندا كەزەكتەن تىس وتكەن پرەزيدەنت سايلاۋىنا قارسى نارازىلىق كەزىندە پوليتسيا ادامداردى جاپپاي ۇستاعان ساتتەن حابار تاراتپاق بولعان ازاتتىق تىلشىلەرىنە ماسكا كيىپ، قولشاتىر ۇستاعان بەلگىسىز بىرەۋلەر تاعى دا كەدەرگى كەلتىرگەن. سول ماڭدا جۇرگەن پوليتسيا وكىلدەرى جۋرناليستەرگە كەدەرگىنى كورە تۇرا ەشقانداي شارا قولدانباعان. ازاتتىق بۇل وقيعالارعا قاتىستى باس پروكۋراتۋراعا شاعىم تۇسىرگەن. ازىرگە بۇل شاعىمعا جاۋاپ كەلگەن جوق.
Abai.kz
