وتكەن دەمالىس كۇنى تارازداعى اسكەري اۋە ايلاعىنداعى قازاقستاندىق اسكەري قىزمەتشىلەر موڭعولياعا اتتاندى. ونداعى ماقسات "ارميا" حالىقارالىق ويىندارى اياسىندا وتكىزىلەتىن «اسكەري بايگە» بايقاۋىنا قاتىسۋ.

اسكەري بايگە – حالىقارالىق ارميا ويىندارىنىڭ قۇرامىنا بيىل العاش رەت وتكىزىلگەلى جاتقان جاڭا بايقاۋ. بۇل ويىن تامىز ايىندا باستالماق. بىراق كوماندا جارىس وتەتىن جەردى بارلاپ، بەيىمدەلۋ ءۇشىن  ون كۇن بۇرىن شىقتى. ەرتە شىعۋدىڭ دا وزىندىك ءمانى بار، موڭعول اتتارىن شابىستا سىناپ كورۋ. سەبەبى جارىس شارتىنا سايكەس اتتاردى كونكۋرس وتكىزەتىن تاراپ بەرەدى.

قازاقستاننان «اسكەري بايگە» بايقاۋىنا قاتىساتىن كوماندا شەبەرلىكتەرىن شىڭداعان، مىقتى توپ. بيىل ەلىمىزدەن ارميا ويىندارىنا قاتىساتىنداردىڭ ىشىندە ءبىرىنشى بولىپ جولعا شىققان – وسى كوماندا.

قازاقستاندىق اسكەريلەر جارىسقا بەس اي بويى دايىندالدى. موڭعوليا قارۋلى كۇشتەرىنىڭ وكىلدەرى بيىل "ارميا" حالىقارالىق ويىندارىنىڭ باعدارلاماسىنا بايگەنى قوسۋ جونىندە ۇسىنىس جاساعاندا، قازاقستان قاتىسۋشى رەتىندە ءبىرىنشى بولىپ قولداۋ بىلدىرگەن ەدى. بۇلاي بولۋىنا بىرنەشە نەگىز بار. ەلىمىزدەگى تاۋلى-ەگەرلىك بولىمشە «وڭتۇستىك» وڭىرلىك قولباسشىلىعىنىڭ قۇرامىندا جيىرما جىلعا جۋىق قىزمەت ەتىپ كەلەدى. جانە قارۋلى كۇشتەرىمىزدەگى جالعىز بولىمشە.

بۇل بولىمشە «ەر قاناتى – ات» ەكەنىن جاقسى بىلەدى. ولار كوپ جىل بويى تۇلپاردى سەرىك ەتىپ، ءتۇرلى تاپسىرمالاردى ورىنداپ كەلەدى. سوندىقتان بولار ءدال وسى بولىمشەنىڭ اسكەري قىزمەتشىلەرى كوماندانىڭ نەگىزگى ساپىندا. ولار بەس اي بويى اسكەري ءبولىمنىڭ بازاسىندا جانە وعان تيەسىلى اتتارمەن پوليگوندا جاتتىقتى.

ات قۇلاعىندا وينايتىن جاۋىنگەرلەردەن قۇرالعان توپتى انىقتاۋ ءۇشىن ىرىكتەۋ جۇرگىزىلىپ، «اراۆت اسكەري بايگەسى» بايقاۋىنا بارىنشا لايىقتى دەپ تانىلعان شاباندوزدار قالدى.

قازاقستاندىق اسكەريلەردىڭ باستى قارسىلاستارى – سايىس وتەتىن جەردىڭ يەلەرى موڭعولدار، جانە قىرعىزدار مەن رەسەيلىكتەر. قالاي بولعاندا دا، ات دەسە دەلەبەسى قوزىپ تۇراتىن جىگىتتەر وسىنداي مىقتى قارسىلاستارمەن سايىسقا تۇسەدى. شىن جۇيرىكتى انىقتاۋ، البەتتە الداعى ۋاقىتتىڭ ەنشىسى. ال، ەل ابىرويىن اسقاقتاتار جىگىتتەرگە جارىستا جەڭىس تۇعىرى بۇيىرسىن دەپ تىلەيىك!

Abai.kz