ءوندىرىس تيىمدىلىگىن شىعىنسىز ارتتىرۋدىڭ جولى بارما؟ بۇل ماسەلەنىڭ شەشىمى «قازمۇنايگاز» ۇلتتىق كومپانياسىندا تابىلعان سياقتى. بىرنەشە جىل بۇرىن كومپانياعا قاراستى مۇناي وڭدەۋ زاۋىتتارىندا «Lean 6 Sigma» باعدارلاماسى ەنگىزىلگەن بولاتىن. سونىڭ ارقاسىندا پاۆلودار مۇناي-حيميا زاۋىتىنىڭ وزىندە عانا 43,6 ملن تەڭگەدەن استام قاراجات ۇنەمدەلدى.

ترانسفورماتسيالىق جوبانىڭ مۇناي وڭدەۋ كاسىپورىندارىندا ويداعىداي ىسكە اسىرىلۋىنا كوزى جەتكەن باس كومپانيا Lean 6 Sigma-نى باسقا سەگمەنتتەردەگى كاسىپورىندارىنا تاراتۋدى ۇيعارادى. ءسويتىپ، قمگ جاڭا تسيفرلىق ترانسفورماتسيا باعدارلاماسى «مۇناي جانە گاز ءوندىرۋ» بيزنەس-باعىتىنداعى ەنشىلەس ۇيىمدارعا Lean 6 Sigma-نى ەنگىزۋ جوباسىمەن تولىقتىرىلدى. بۇل شەشىم كەزدەيسوق ەمەس. قمگ تيىمدىلىگىن ارتتىرۋدىڭ نەگىزگى الەۋەتى ءدال وسى سەكتورمەن تىعىز بايلانىستى.

Lean 6 Sigma تۇجىرىمداماسى ساپانى باسقارۋدىڭ ەكى ءادىسىن بىرىكتىرۋ ناتيجەسىندە پايدا بولدى. ءبىرىنشىسى – شىعىنداردى ازايتۋ مەن پروتسەستەردى ۇدەتۋ قاعيدالارىن قامتيتىن جاپوندىق «Lean manufacturing» («ۇنەمدى ءوندىرىس») ءادىسى. ال، ەكىنشىسى ءونىم ساپاسىن ارتتىرۋ مەن كليەنت سۇرانىسىن وتەۋگە باعىتتالعان امەريكاندىق «Six Sigma» («التى سيگما») ءتاسىلى. باعدارلاما كومپانيانىڭ شىعىندارىن ازايتۋ ءۇشىن جوبالىق ءتاسىلدى جۇيەلى تۇردە قالىپتاستىراتىن ەڭ ۇتىمدى ادىستەمە بولىپ تابىلادى.

«Lean 6 Sigma» تۇجىرىمداماسى كاسىپورىن تيىمدىلىگىن ارتتىرۋ مەن قىزمەتىن وڭتايلاندىرۋ ماقساتىندا جوبالارعا باستاماشىلىق ەتەتىن قاراپايىم قىزمەتكەرلەردى ىنتىلاندىرۋعا نەگىزدەلگەن. ول ءۇشىن قىزمەتكەرلەر ارنايى DMAIC ادىستەمەسى بويىنشا وقىتىلادى. وقۋ بەس كەزەڭنەن تۇرادى. العاشقى ەكەۋى – انىقتاۋ (Define) جانە ولشەۋ (Measure). بۇل كەزەڭدە جوبانىڭ بيزنەس-كەيسى دايىندالادى. ياعني، ناقتى ماقسات قويىلىپ، وعان جەتۋدىڭ ۋاقىت شەگى بەلگىلەنەدى، كاسىپورىننىڭ اقاۋلارى مەن تۇيىتكىلدى ماسەلەلەرى انىقتالادى. ودان كەيىنگى ءۇش كەزەڭ ساراپتاما (Analyze), جەتىلدىرۋ (Improve) جانە باقىلاۋ (Control) دەپ اتالادى. بۇل كەزدە اقاۋدىڭ پايدا بولۋىنىڭ نەگىزگى سەبەپتەرى انىقتالادى جانە ساراپقا سالىنادى. ولاردى ازايتۋ ارقىلى ءوندىرىس مەيىلىنشە جەتىلدىرىلىپ، ونىڭ بۇدان ارعى بارىسى باقىلاۋعا الىنادى.

وقۋدان وتكەن جانە جوبالاردى ىسكە اسىرعان قىزمەتكەرلەرگە شىعىس جەكپە-جەگى جۇيەسىنە ۇقساس «بەلبەۋلەر» بەرىلەدى. «جاسىل بەلبەۋ» – بۇل كۇردەلىلىگى بويىنشا وڭاي جانە ورتاشا جوبا جەتەكشىلەرىنىڭ دەڭگەيى. ولار اۋقىمدى مالىمەتتەردى تالداپ، جۇيەلەي بىلۋگە ءتيىستى، اقپاراتتى دۇرىس رەتتەپ، تۇسىنىكتى قىلىپ ۇسىنۋلارى قاجەت. «قارا بەلبەۋ» – كەز كەلگەن كۇردەلى جوبالاردىڭ ۇيلەستىرۋشىلەرى، «جاسىل بەلبەۋ» يەلەرىنىڭ ۇستازدارى. «قارا بەلبەۋ شەبەرلەرى» – بۇل جوعارى تەحنيكالىق جانە ۇيىمداستىرۋشىلىق قابىلەتتەرى بار جانە باعدارلامانىڭ تەحنيكالىق باسقارۋىن قامتاماسىز ەتەتىن قىزمەتكەرلەر.

باتىس ەلدەرىندە Lean 6 Sigma ادىستەمەسىن پايدالانۋ تاجىريبەسى قىسقا مەرزىم ىشىندە ءوز كۇشىمەن جوعارى ناتيجەگە جەتۋگە بولاتىنىن راستادى. ايتالىق، دايىن ءونىم مەن كورسەتىلەتىن قىزمەت ساپاسى 20-40%-عا جاقسارىپ، وزىندىك قۇنى 30-60%-عا تومەندەدى. ورىندالعان جۇمىس كولەمىن قوسىمشا شىعىنسىز 20%-عا، ورىنداۋ جىلدامدىعىن 70%-عا دەيىن، ال جالپى كاسىپورىن جۇمىسىنىڭ تيىمدىلىگىن - 10-30%-عا ارتتىرۋعا مۇمكىندىك تۋعىزدى.

مۇنداي جوبالاردى ىسكە اسىرۋ وزگەرىستەردى باسقارۋ ىسىمەن دە (change-management) تىعىز بايلانىستى. ويتكەنى، قىزمەتكەردىڭ ويلاۋ جۇيەسىن وزگەرتۋگە سەپتىگىن تيگىزەدى. ال ادامدار ءوز كەزەگىندە بيزنەس-ۇدەرىستەردى، ءتىپتى تەحنولوگيالاردى وزگەرتەدى. مىسالى، پاۆلودار مۇناي-حيميا زاۋىتىندا 2016-2018 جىلدار ارالىعىندا باعدارلاما بويىنشا 27 ادام وقىتىلدى. كەيىننەن وندىرىسكە ەنگىزىلىپ، كاسىپورىن قارجىسىن ۇنەمدەۋگە مۇمكىندىك بەرگەن 20 جوبانى ۇسىنعان ناق وسى قىزمەتكەرلەر ەدى.

جۋىردا ۇلتتىق كومپانيانىڭ نەگىزگى ءوندىرىس اكتيۆتەرى شوعىرلانعان ماڭعىستاۋ ءوڭىرىنىڭ ورتالىعى اقتاۋ قالاسىندا «Lean 6 Sigma نەگىزدەرى جانە جۇيەنىڭ ەنگىزىلۋى مەن جۇمىس ىستەۋى بارىسىندا ءبىرىنشى باسشىلاردىڭ ءرولى تاقىرىبىندا ترەنينگ وتكىزىلدى. جيىنعا قمگ جانە ونىڭ مۇناي-گاز وندىرەتىن ەنشىلەس ۇيىمدارىنىڭ باسشىلارى قاتىستى. شارانى قمگ ترانسفورماتسيا جانە تسيفرلاندىرۋ بلوگى ۇيىمداستىردى.

قاتىسۋشىلار اراسىندا باعدارلاما قىزۋ تالقىعا ءتۇستى. قمگ باسقا بيزنەس-باعىتتارى، اتاپ ايتقاندا، مۇناي سەرۆيسى مەكەمەلەرىنىڭ باسشىلارى Lean 6 Sigma جوباسىن تاياۋ ارادا ەنگىزۋگە ىنتا ءبىلدىردى.

قمگ ترانسفورماتسيا جانە تسيفرلاندىرۋ توبى ادامي كاپيتالعا ەرەكشە دەن قويعان. ويتكەنى، وزگەرىستەردىڭ نەگىزگى قوزعاۋشى كۇشى بولىپ قاشاندا قىزمەتكەر قالا بەرەدى. ال، Lean 6 Sigma باعدارلاماسى بيزنەس-ۇدەرىستەردى وزگەرتۋگە جانە تسيفرلىق تەحنولوگيالاردى ەنگىزۋگە قىزمەتكەردىڭ دايىندىعى مەن قىزىعۋشىلىعىن ارتتىرۋعا مۇمكىندىك بەرەدى.

Abai.kz