ەلىمىزدە تاۋەلسىزدىك العان كەزەڭنەن بەرى انا مەن بالا ماسەلەسى نازاردان تىس قالعان ەمەس. وعان دالەل ەلباسى نۇرسۇلتان نازارباەۆتىڭ جولداۋلارىندا كورسەتىلگەن تارماقتارعا سايكەس، جىل سايىن انا مەن بالاعا تولەنەتىن جاردەماقى كولەمى ۇلعايىپ كەلەدى. ال، وتكەن اپتادا پرەزيدەنت قاسىم-جومارت توقاەۆ كوپبالالى انالاردىڭ جانە مۇمكىندىگى شەكتەۋلى جانداردىڭ نەسيەسىن كەشىرۋ تۋرالى تاپسىرما بەردى.

پرەزيدەنت ءوز كەزەگىندە جاعدايى اۋىر، كۇنكورىس دەڭگەيى تومەن وتباسىلاردىڭ نەسيەلەرىن كەشىرىپ، جەڭىلدىك جاساۋ كەرەكتىگىن باسا ايتتى. جانە ول ءۇشىن ناقتى تاپسىرمالار دا بەردى.

اتالعان جارلىق اقوردا سايتىندا جاريالانعان بولاتىن.

وندا، ۇكىمەت ءبىر جولعى تارتىپپەن ەكىنشى دەڭگەيدەگى بانكتەر مەن ميكروقارجى ۇيىمدارىندا كەپىلزاتسىز تۇتىنشىلىق قارىزدار نەگىزىندە بەرەشەكتى تالاپتاردى وتەۋ جونىندە ناقتى شارالار قابىلداۋ قاجەتتىگى باسا ايتىلدى. ول تالاپتارعا سايكەس:

بىرىنشىدەن كوپ بالالى انالار مەن اسىراۋشىسىنان ايىرىلعان جاعدايدا تولەم الاتىن جانۇيالار، سونداي-اق مۇمكىندىگى شەكتەۋلى بالالارى بار وتباسىلار جاتادى.

سونىمەن قاتار، بالا جاسىنان مۇگەدەك بولعان بىراق، كامەلەتتىك جاستان اسقان بالالار، اتاۋلى الەۋمەتتىك كومەك الۋشىلار، كامەلەتكە تولعانعا دەيىن اتا-اناسىنان ايىرىلعان جيىرما توعىز جاسقا تولماعان جەتىم بالالار، اكە-شەشە قامقورلىعىنسىز قالعان بالالار اتالعان تالاپتارعا سايكەس بورىشكەر بولىپ تابىلادى.

ەكىنشىدەن، بۇل جەڭىلدىك يە بولاتىن ازاماتتاردىڭ بيىلعى جىلدىڭ 1-ماۋسىمىنداعى جاعداي بويىنشا، جالپى بەرەشەك قارىزى ءۇش ميلليون    (3 000 000) تەڭگەدەن اسپاۋى كەرەك.

ۇشىنشىدەن، وسى جىلدىڭ  1-ماۋسىمىنداعى جاعدايعا سايكەس، نەگىزگى بورىش پەن سول بورىش بويىنشا ەسەپتەلگەن سىياقىدان تۇراتىن، تولەنەتىن بەرەشەك اقشانىڭ مولشەرى ءبىر نەسيە الۋشىعا ءۇش ءجۇز مىڭ تەڭگەدەن (300 000) اسپايدى. بۇل قاۋلىدا كورسەتىلگەن مىندەتتەر. پرەزيدەنت ق.توقاەۆ وسى نەگىزدە ۇلتتىق بانك پەن ۇكىمەتكە ناقتى تاپسىرمالار بەردى. تاپسىرماعا سايكەس، 2019 جىلدىڭ 1-شىلدەسىندەگى جاعداي بويىنشا، ميكروقارجى ۇيىمدارى مەن بانكتەردە كەپىلسىز تۇتىنۋشىلىق قارىزدارى بار قازاقستان ازاماتتارىنا ەسەپتەلگەن وسىمدەر مەن ايىپپۇلداردى ەسەپتەن شىعارۋ جونىندەگى شارالار قابىلدانۋىن قاداعالاۋدى تاپسىردى.

ودان بولەك، پرەزيدەنت نۇر-سۇلتان، الماتى، شىمكەنت قالالارى مەن باسقا وبلىستاردىڭ باسشىلارىمەن بىرلەسە وتىرىپ، اتالعان جارلىقتى ىسكە اسىرۋ جونىندەگى باسقا جۇمىستاردى اتقارۋ شارالارى قابىلدانۋىن تاپسىردى.

سونىمەن قاتار، پرەزيدەنت ۇلتتىق بانكتىڭ قارجى ۇيىمدارىنداعى جاۋاپكەرشىلىگىن كۇشەيتۋ جونىندەگى بىرقاتار رەتتەۋشىلىك سيپاتتاعى شارالاردى قابىلاۋ تۋرالى دا تاپسىرما بەردى.

جانە، 90 كۇننەن استام ۋاقىت مەرزىمى وتكەن بەرەشەگى بار جەكە ازاماتتاردىڭ بارلىق كەپىلسىز تۇتىنۋشىلىق قارىزدارى بويىنشا نەسيە بەرۋگە جانە وعان قىزمەت كورسەتۋگە بايلانىستى تۇراقسىزدىق ايىبىن، كوميسسيالاردى جانە وزگە دە تولەمدەردى ەسەپتەۋگە تيىم سالىنادى.

ودان بولەك، پرەزيدەنت جارلىعىنا سايكەس،ەندى  تابىسى كۇنكورىس دەڭگەيىنەن تومەن ازاماتتارعا نەسيە بەرۋگە تيىم سالىنادى. سونىمەن قاتار، كەپىلسىز تۇتىنۋشىلىق زاەمداردى بەرۋ كەزىندەگى قوسىمشا رەتتەۋ شارالارى قاراستىرىلادى. اتالعان جارلىقتىڭ ورىندالۋىن پرەزيدەنت اكىمشىلىگى قاداعالايدى. ال، جارلىق پرەزيدەنت قول قويعان كۇننەن باستاپ قولدانىسقا ەنبەك.

Abai.kz