جۇما, 20 قىركۇيەك 2019
1331 2 پىكىر 16 تامىز, 2019 ساعات 14:02

قۇقىق قورعاۋشىلار: بەيبىت شەرۋلەر جونىندەگى زاڭ حالىقتى راديكاليزاتسيالاۋعا اكەلەدى

قازاقستاندا بەيبىت جيىنداردى، ميتينگتەردى، شەرۋلەر مەن اكتسيالاردى رەتتەيتىن زاڭ ازاماتتاردىڭ راديكاليزاتسيالاۋىنا اكەلەدى.

وسىلاي دەپ ادام قۇقىقتارى جونىندەگى حالىقارالىق بيۋرونىڭ ديرەكتورى ەۆگەني جوۆتيس مالىمدەدى.

قۇقىق قورعاۋشىنىڭ سوزىنشە، وعان جارتى جىلدىق مونيتورينگ ناتيجەسى كۋا بولا الادى. ونىڭ ايتۋىنشا، ميتينگتەرگە تىيىم سالۋ ازاماتتاردىڭ ماڭىزدى ماسەلەدە ءوزىنىڭ ويىن شەنەۋنىكتەرگە جەتكىزۋ قۇقىعىنان ايىرادى.

— ءبىزدىڭ ۇيىمعا سوڭعى ءۇش-ءتورت ايدا رۇقسات ەتىلمەگەن ميتينگتەرگە شىققانى ءۇشىن اكىمشىلىك جازاعا تارتىلعان بىرنەشە جۇزدەگەن ادام قايرىلدى. ولاردىڭ دەنى ەشقانداي ۇيىمداستىرۋشىلار بولماعان. كوبى اكتسيالارعا قاتىسپاعان، كوشەدە ءوتىپ بارا جاتقان ءجاي ادامدار بولعان. بىراق پوليتسيا قىزمەتكەرلەرى ولاردى دا ۇستاپ الىپ كەتكەن،- دەيدى ەۆگەني جوۆتيس.

قۇقىق قورعاۋشى سونىمەن بىرگە بەيبىت شەرۋلەردى رەتتەيتىن قازاقستان زاڭدارىنىڭ حالىقارالىق تالاپتارعا قايشى كەلەتىنىن اتاپ ءوتتى.

— حالىقارالىق تالاپتارعا سايكەس، بەيبىت شەرۋلەر وتكىزۋگە بولمايتىن ارنايى جەرلەر بولادى. ولار قۇبىر جولدارى، ءارتۇرلى سەبەپتەرمەن ادام دەنساۋلىعىنا قاۋىپتى ورىندار، اسكەري بولىمشەلەر. قالعان جەرلەردىڭ ءبارى ميتينگ وتكىزۋگە رۇقسات ەتىلۋى ءتيىس،- دەيدى قۇقىق قورعاۋشى.

بيىل 9-13 ماۋسىم ارالىعىندا قازاقستان پوليتسياسى ميتينگتەرگە شىققان ءتورت مىڭعا جۋىق ادامى ۇستادى. بۇل جونىندە ىشكى ىستەر ءمينيسترى ەرلان تۋرگۋمباەۆ مالىمدەدى. نارازىلىق اكتسيالارى ەلدەگى پرەزيدەنت سايلاۋى قارساڭىندا ءوتتى. ميتينگكە قاتىسۋشىلار كەزەكتەن تىس پرەزيدەنت سايلاۋىنىڭ زاڭسىز ەكەنىن ايتىپ، بويكوت جاريالاۋعا شاقىردى. نارازىلىق بىلدىرۋشىلەر سايلاۋ ناتيجەسىنە دە قارسىلىق ءبىلدىردى.

12 ماۋسىم يناۋگۋراتسيا كۇنى قازاقستان پرەزيدەنتى قاسىمجومارت توقاەۆ باتىس باق-تارىنا بەرگەن سۇقباتىندا حالىققا كەدەرگىسىز اكتسيالار وتكىزۋگە مۇمكىندىك بەرىلەتىن جاڭا زاڭ قابىلدانادى دەگەن.

Abai.kz

2 پىكىر