قوعامدا قىزۋ تالقىعا تۇسكەن "كوك جايلاۋ" تاۋ شاڭعى كۋرورتىن سالۋ ماسەلەسى ءالى دە كۇنتارتىبىندە. كەشە مادەنيەت جانە سپورت ءمينيسترى اقتوتى رايىمقۇلوۆا اتالعان جايتقا قاتىستى تۇسىنىكتەمە بەردى. 

مۇنداي ماڭىزدى ماسەلەنىڭ ساليقالى جاۋاپتى قاجەت ەتەتىنىڭ ەسكەرتكەن رايىمقۇلوۆا،پرەزيدەنت توقاەۆتىڭ تاپسىرماسىمەن قازىر "كوك جايلاۋ" جوباسى توقتاپ تۇرعانىن ايتتى.

-قۇرمەتتى دوستار، قازاقستاندىقتاردىڭ كوپشىلىگىن الاڭداتقان الماتى ماڭىنداعى «كوك جايلاۋ» تاۋ شاڭعىسى كۋرورتىن سالۋ ماسەلەسى باستى نازاردا.

قوعامدا پىكىرتالاس تۋدىرعان مۇنداي ماڭىزدى ماسەلە ساليقالى جاۋاپتى قاجەت ەتەدى. قوعامنىڭ مۇددەسىن قورعاپ، جاناشىرلىق تانىتقان قالامگەرلەرگە ايتار العىسىم دا شەكسىز.

وكىنىشكە وراي، اتالعان باستاما بويىنشا جۋرناليستەرگە جاۋاپ بەرۋگە مۇمكىندىگىم بولمادى. وسى تاقىرىپ بويىنشا قىسقاشا تۇسىنىكتەمە بەرۋ مۇمكىندىگى ەندى عانا تۋدى.

بيىلعى جىلدىڭ ءساۋىر ايىندا قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا كۋرورت قۇرىلىسى توقتاتىلعانى بارشامىزعا ايان. مەملەكەت باسشىسى بۇل ماسەلەدە اسىعىستىق تانىتپاي، ساراپشىلاردىڭ تالداۋلارىن زەرتتەپ، قالا تۇرعىندارىنىڭ پىكىرىن ەسكەرۋ قاجەت ەكەنىن اتاپ كورسەتتى. سول كەزدەگى الماتى اكىمى باۋىرجان بايبەك قاسىم-جومارت توقاەۆتىڭ ۇسىنىسىمەن «كوك جايلاۋ» كۋرورتىنىڭ قۇرىلىسى جوباسىن تولىقتىرۋ جانە توقتاتۋ قاجەت ەكەنىن ايتقان بولاتىن.

قر مادەنيەت جانە سپورت مينيسترلىگى كەز كەلگەن ۇكىمەتتىك ۆەدومستۆو سياقتى ءبىرىنشى كەزەكتە قۇقىقتىق نورماتيۆتىك اكتىلەردى زەرتتەپ دايىنداۋمەن اينالىساتىنىن اتاپ ايتقىم كەلەدى. كوپ جاعدايدا مادەني، سپورت نەمەسە تۋريستىك نىسانداردى سالۋ تۋرالى شەشىمدى جەرگىلىكتى اتقارۋ ورگاندارى: اكىمدىك، ءماسليحات، قوعامدىق كەڭەس (بولعان جاعدايدا) قابىلدايدى. «كوك جايلاۋ» كۋرورتى بۇل ايادان تىسقارى شىعىپ، ول بويىنشا شەشىمدى پرەزيدەنت قابىلدادى. قازىرگى ساتتە قاسىم-جومارت كەمەلۇلى توقاەۆتىڭ تاپسىرماسى بارىمىزگە بەلگىلى: «كوك جايلاۋ» جوباسى توقتاپ تۇرعانىن جەتكىزگىم كەلەدى.

Abai.kz