بەيسەنبى, 5 جەلتوقسان 2019
الاڭ 1640 2 پىكىر 22 تامىز, 2019 ساعات 13:05

Google مەن Mozilla قازاق بيلىگىنىڭ قاۋىپسىزدىك سەرتيفيكاتىن بۇعاتتايدى

Mozilla جانە Google كومپانيالارى قازاقستاندىق ينتەرنەت قولدانۋشىلاردىڭ ونلاين قاۋىپسىزدىگى مەن قۇپيالىعىن قورعاۋ تەحنولوگياسىن ىسكە قوساتىنىن مالىمدەدى. وسى ارقىلى ەكى كومپانيا قازاقستان بيلىگىنىڭ Firefox جəنە Chrome براۋزەرلەرىندەگى ينتەرنەت ترافيگىنە ارالاسۋىنا توسقاۋىل قويماق.

Mozilla سايتىندا اعىلشىن، قازاق جانە ورىس تىلىندە جاريالانعان رەسمي مالىمدەمەدە "كومپانيا قازاقستاندا ينتەرنەت قولدانۋشىلارعا قاۋىپسىزدىك سەرتيفيكاتىن ورناتۋدى تالاپ ەتىپ جاتقان سوڭ وسىنداي قادامعا باردى" دەپ جازىلعان. Mozilla "قازاقستان ۇكىمەت ۇسىنعان قاۋىپسىزدىك سەرتيفيكاتى ينتەرنەت قولدانۋشىلارىنىڭ بارلىق دەرەگىن وقۋعا مۇمكىندىك بەرەدى" دەپ سانايدى.

ءدال وسىنداي حابارلاما Google كومپانياسىنىڭ رەسمي بلوگىندا دا جاريالاندى. كومپانيانىڭ مالىمدەۋىنشە، جاڭا تەحنولوگيا قازاقستان بيلىگى ۇسىنعان قاۋىپسىزدىك سەرتيفيكاتىنا توcقاۋىل قويادى. Google جاڭا تەحنولوگيانى كومپانيا براۋزەرگە وزدەرى ورناتاتىنىن حابارلادى.

ء"بىز مۇنداي قادامعا بارماس ەدىك. بىراق قولدانۋشىلاردى قورعاۋ جانە ينتەرنەتتىڭ قاۋىپسىزدىگى - Firefox براۋزەرىنىڭ نەگىزگى قاعيداسى" دەدى Mozillا كومپانياسىنىڭ قاۋىپسىزدىك ءبولىمىنىڭ ديرەكتورى مارشالل ەرۆين.

ال Chrome براۋزەرىنىڭ باس ديرەكتورى پاريس تابريز "ناقتى ماسەلە بولعان سوڭ وسىنداي قادامعا بارعاندارىن، كومپانيا الەمدەگى بارلىق قولدانۋشىنى قورعاۋ ءۇشىن قاشاندا شارا قولداناتىنىن" ايتتى.

Mozilla قازاقستان بيلىگىنىڭ قاۋىپسىزدىك سەرتيفيكاتىن ەكىنشى رەت ەنگىزۋگە تالپىنىس جاساعانىن مالىمدەدى. العاشقى، 2015 جىلعى تالپىنىس ءساتسىز بولعان.

بيىل شىلدەنىڭ ورتاسىنان بەرى قازاقستاندىقتار ۇيالى بايلانىس وپەراتورلارىنان "ينتەرنەتكە كىرۋ ماسەلەسى تۋىنداماس ءۇشىن" ارنايى قاۋىپسىزدىك سەرتيفيكاتىن ورناتۋدى ۇسىنعان حابارلاما الا باستاعان.

سەرتيفيكاتتىڭ رەسمي اتاۋى - QazNet Trust Network. وپەراتورلار مەن قازاقستان بيلىگى مۇنى "كيبەر شابۋىلدى الدىن الۋ شاراسى" دەپ اتاعان.

بيلىك "سەرتيفيكاتتىڭ كيبەرشابۋىل مەن تەرىس كونتەنتتەن قورعايتىنىن، ونى ورناتۋ تۋرالى تۇپكىلىكتى شەشىمدى ءار ازامات ءوزى قابىلدايتىنىن" ايتىپ كەلگەن. بىراق QazNet سەرتيفيكاتىنان باس تارتقاندار كوپتەگەن الەۋمەتتىك جەلى مەن پوشتا جۇيەسىنە كىرە الماعانىن ايتىپ شاعىمدانعان.

بيلىكتىڭ سەرتيفيكاتتى جاپپاي ەنگىزۋ تالپىنىسىنان كەيىن نۇر-سۇلتان جەرگىلىكتى جانە حالىقارالىق ۇيىمدار مەن بەلسەندىلەردىڭ سىنىنا قالدى.

قازاقستاندىق قۇقىق قورعاۋشىلار مەن بەلسەندىلەر سەرتيفيكاتتان ورناتقان سوڭ "بيلىك تسەنزۋرانى كۇشەيتەدى" دەپ قاۋىپتەنەدى. ولار "بيلىك وسى سەرتيفيكات ارقىلى اركىمنىڭ جەكە اقپاراتىن باقىلاپ وتىرعىسى كەلەدى" دەپ توپشىلايدى. كەيبىر بەلسەندىلەر بيلىك باستاماسىنا نارازىلىق ءبىلدىرىپ، جالعىز ادامدىق اكتسيا وتكىزگەن. بۇل كەيىن جەلىدە قارسىلىق فلەشموبىنا اينالعان.

بىرنەشە زاڭگەر بايلانىس "قاۋىپسىزدىك سەرتيفيكاتىن" ورناتۋ حابارلاماسىن جىبەرگەن بايلانىس وپەراتورلارىنىڭ ۇستىنەن شاعىم تۇسىردى.

6 تامىزدا ۇلتتىق قاۋىپسىزدىك كوميتەتى كەنەتتەن قاۋىپسىزدىك سەرتيفيكاتى وشىرىلەتىنىن، QazNet​ تەست بولعانىن حابارلاعان. بىراق قازاقستان بيلىگى الداعى ۋاقىتتا ۇلتتىق قاۋىپسىزدىككە كيبەر شابۋىل جاسالعان جاعدايدا حالىققا ەسكەرتىپ، سەرتيفيكاتتى قولداناتىنىن مالىمدەدى.

Abai.kz

2 پىكىر