31 قازان كۇنى برەكزيتكە قاتىستى كەلىسىم قابىلدانباسا، دجونسوننىڭ ايتۋىنشا، ۇلىبريتانيا كەلىسىمسىز وداقتان شىعا بەرەدى.

دجونسون 68 كۇننىڭ ىشىندە ەۋرووداقتى جاڭا كەلىسىمگە وتىرۋعا كوندىرۋى كەرەك، ازىرگە تاراپتاردىڭ ەشقايسىسى ءوز مۇددەلەرىنەن باس تارتقىسى جوق.

Reuters اگەنتتىگى ەۋرووداقتان بولەك شىعۋدىڭ مۇنداي ءتۇرى الەمنىڭ بەسىنشى ەكونوميكاسىنا يە ۇلىبريتانياعا اۋىر تيەدى دەپ جازدى. بريتاندىقتار ۇيىمنان كەلىسىمسىز شىققان جاعدايدا، ازىق-تۇلىك جەتىسپەي، شەكارادا حاوس بولۋى مۇمكىن. سونىڭ سالدارىنان ەلدىڭ دامۋى تەجەلەدى دەپ ەسكەرتەدى ساراپشىلار.

Reuters ءتىلشىسىنىڭ ەۋرووداقپەن كەلىسسوزدى 31 قازانعا دەيىن جۇرگىزۋگە دايىنسىز با دەگەن سۇراعىنا دجونسون: "ەو تۇبىندە جاڭا كەلىسىمگە وتىرۋعا كەلىسەدى دەپ ويلايمىن", - دەپ جاۋاپ بەردى.

بريتان پارلامەنتى دجونسونعا دەيىن ۇكىمەت باسقارعان تەرەزا مەي كەلىسىمىنىڭ جوباسىن ءۇش مارتە كەيىن قايتاردى. سودان كەيىن مەي قىزمەتتەن كەتتى. برەكزيت توڭىرەگىندەگى بىتپەس داعدارىس لوندوننىڭ الەمدەگى ىقپالدى قارجى ورتالىعى رەتىندەگى بەدەلىنە سىزات تۇسىرەدى دەپ جازدى Reuters اگەنتتىگى.

Abai.kz