جۇما, 3 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
1895 1 پىكىر 2 قىركۇيەك, 2019 ساعات 11:57

ۋكراينا پرەمەر-ءمينيسترى بولىپ 35 جاستاعى الەكسەي گونچارۋك تاعايىندالدى

ۋكراينا جوعارعى راداسى 35 جاستاعى الەكسەي گونچارۋكتىڭ كانديداتۋراسىن پرەمەر-مينيستر رەتىندە بەكىتتى دەپ مالىمدەدى "ينتەرفاكس-ۋكراينا". ول ۋكراينا تاريحىندا ەڭ جاس ۇكىمەت باسشىسى اتاندى.

ونىڭ كانديداتۋراسىن پارلامەنتكە ەل پرەزيدەنتى ۆلاديمير زەلەنسكي مەن "حالىق قىزمەتشىسى" پرەزيدەنتتىك فراكتسياسى ۇسىنعان. بۇل فراكتسيا پارلامەنتتەگى كوپشىلىك سانىنا يە بولعاندىقتان، كونستيتۋتسياعا سايكەس، ۇكىمەت باسشىسىن ۇسىنادى.

بەيسەنبى كۇنى بۇرىنعى پرەمەر-مينيستر ۆلاديمير گرويسمان وتستاۆكاعا كەتتى.

گونچارۋك وسىعان دەيىن پرەزيدەنت كەڭسەسى باسشىسىنىڭ ورىنباسارى قىزمەتىن اتقارعان. ماماندىعى بويىنشا زاڭگەر. 2013–2014 جىلدارى مايدانداعى ازاماتتاردىڭ قۇقىعىن قورعاعان. 2015 جىلدان بەرى BRDO ساراپتاۋ ورتالىعىن باسقارىپ كەلدى. بۇل ەۋروپالىق وداق قارجىلاندىراتىن ۇكىمەتتىك ەمەس ۇيىم.

رادادا سويلەگەن سوزىندە گونچارۋك ۇكىمەتكە رەفورما جاساپ، كوررۋپتسيامەن كۇرەسىپ، ەل ەكونوميكاسىن كوتەرۋگە كۇش سالاتىنىن جەتكىزدى.

ۋكراينا پارلامەنتى دە جاڭا توراعاسىن سايلادى. جوعارى رادا سپيكەرى "حالىق قىزمەتشىسى" پارتياسىنىڭ ليدەرى دميتري رازۋمكوۆ بولدى.

جوعارعى رادانىڭ العاشقى وتىرىسىندا ەل پرەزيدەنتى ۆلاديمير زەلەنسكي ءسوز سويلەدى. ول ۋكراينا حالقى جاڭا پارلامەنتتەن كوپ ءۇمىت كۇتەتىنىن، ەگەر حالىق ءۇمىتى اقتالماسا، ءبىر جىلدان كەيىن رادانى تاراتاتىنىن مالىمدەدى.

29 تامىزدا كيەۆتە Iح شاقىرىلىمداعى جوعارعى رادانىڭ العاشقى وتىرىسى ءوتتى. 424 دەپۋتات انت بەردى (رادادا بارلىعى 450 ورىن، بىراق اننەكسيالانعان قىرىم مەن جانجال ءوتىپ جاتقان دونباسستا سايلاۋ وتپەدى).

Abai.kz

1 پىكىر