ول ءباسپاسوز ءماسليحاتىندا قىتايمەن كەلىسىم جاسالعان 55 جوباعا بايلانىستى تۇسىنىكتەمە بەردى. وسى اپتادا ەلدىڭ بىرنەشە قالاسىندا تۇرعىندار نارازىلىققا شىعىپ، "55 قىتاي زاۋىتىنىڭ جۇمىس ىستەۋىنە" قارسىلىق ءبىلدىرىپ، بيلىكتەن بۇل زاۋىتتاردى ەلدەن شىعارۋدى تالاپ ەتكەن ەدى.
- وسى 55 جوبانىڭ ىشىندە 3,9 ميلليارد دوللارعا باعالانعان 15 جوبا اۋىل شارۋاشىلىعى، مەتاللۋرگيا، حيميا، مۇناي-گاز، كولىك، لوگيستيكا جانە باسقا سالالاردا ىسكە قوسىلدى. بۇل 15 جوبا اياسىندا جاڭادان اشىلعان 4 مىڭعا جۋىق جۇمىس ورنىنا تۇرعانداردىڭ 95 پايىزى – قازاقستاندىقتار، - دەدى قاسىمبەك. ونىڭ سوزىنشە، بيىلعى جىلدىڭ سوڭىنا دەيىن تاعى 5 جوبا ىسكە قوسىلماق. بارلىق جوبانىڭ قۇنى - 27 ميلليارد دوللار.
پرەمەر-مينيستر ورىنباسارىنىڭ ايتۋىنشا، "ولاردىڭ كوبى - جوعارى تەحنولوگيالى كاسىپورىندار".
- جالپى وسى جوبالار بويىنشا ءبىز 20 مىڭعا دەيىن جۇمىس ورنىن اشۋدى جوسپارلاپ وتىرمىز. تاعى دا قايتالايمىن، (قازاقستانعا) باسقا ءبىر ەلدەن ەشقانداي ەسكى زاۋىت اكەلىنبەيدى، - دەدى ول.
قاسىمبەك ءسوز اراسىندا سوڭعى ۋاقىتتا ەلگە قۇيىلعان قىتاي ينۆەستيتسياسىنىڭ كولەمى 5,6 پايىز دەڭگەيدە قالعانىن دا جەتكىزدى.
ەلدەگى نارازىلىقتى مەڭزەگەن ۆيتسە-پرەمەر بۇل جوبالار جايلى اقپاراتتىڭ حالىققا دۇرىس جەتپەي جاتقانىن ايتىپ، سىرتقى ىستەر مينيسترلىگىنە قاراستى ينۆەستيتسيا جونىندەگى كوميتەت تولىق اقپارات بەرۋى ءتيىس دەدى.
2 قىركۇيەكتەن بەرى جاڭاوزەن تۇرعىندارى نارازىلىققا شىعىپ، قازاقستاندا قىتاي ينۆەستيتسياسىنا 55 ءوندىرىس ورنىن سالۋ تۋرالى ۇكىمەتارالىق كەلىسىمگە قارسىلىق ءبىلدىرىپ كەلەدى. نارازى جۇرت پرەزيدەنت قاسىم-جومارت توقاەۆتان 11-12 قىركۇيەكتە قىتايعا جوسپارلانعان رەسمي ساپارىنان باس تارتۋدى دا تالاپ ەتكەن. نارازىلىق اكتسيالارى 3-4 قىركۇيەكتە ەلدىڭ بىرنەشە قالاسىندا جالعاستى.
قىتاي باتىسىنداعى شىڭجاڭدا از ۇلتتاردىڭ، (ونىڭ اراسىندا ەتنيكالىق قازاقتار دا بار) قىسىمعا ۇشىراۋى تۋرالى حابارلامالار جيىلەگەن تۇستا ەلدە سوڭعى ۋاقىتتا قىتايعا قارسى كوڭىل-كۇي ورشىگەن. وتكەن جىلى بۇۇ شامامەن ميلليون ەتنيكالىق ۇيعىر مەن وزگە دە تۇركىتىلدى ازاماتتار شىڭجاڭداعى "قايتا ساياسي تاربيەلەۋ لاگەرلەرىندە قاماۋدا وتىر" دەپ مالىمدەگەن.
قىتاي – قازاقستانعا ەڭ كوپ ينۆەستيتسيا قۇياتىن - ءتورتىنشى، ەڭ كوپ قارىز بەرەتىن ءۇشىنشى ەل. قازاقستانعا ينۆەستيتسيا سالۋ بويىنشا نيدەرلاندى، اقش جانە شۆەيتساريا العاشقى ۇشتىكتە تۇر.
Abai.kz
