12-تامىز كۇنى مەملەكەت باسشىسى قاسىم-جومارت توقاەۆتىڭ جارلىعىمەن بەلگىلى تەلەجۇرگىزۋشى دانا نۇرجىگىت قازاقستان رەسپۋبليكاسى پارلامەنت سەناتىنىڭ دەپۋتاتى بولىپ تاعايىندالدى. بۇل ەلىمىزدەگى نازىك جاندىلاردىڭ ءار سالادا كاسبي تۇرعىدا شىڭدالۋىنا مەملەكەت تاراپىنان ۇلكەن قولداۋ بولىپ وتىرعانىنىڭ ءبىر كورىنىسى.

وسى ۋاقىتقا دەيىن كوپشىلىككە كوگىلدىر ەكران ارقىلى تانىلعان دانا نۇرجىگىتتىڭ دەپۋتات بولىپ سايلانۋى كوپتەگەن قوردالانعان ۇلتتىق ماسەلەلەردىڭ شەشىمىن تابۋعا جاسالعان ءبىر قادام دەپ ساناۋعا بولاتىن سياقتى. سەبەبى ول وسى ۋاقىتقا دەيىن ءارتۇرلى الەۋمەتتىك، ينتەللەكتۋالدىق حابارلاردى جۇرگىزدى. ال، سوڭعى جىلدارى قازاقستان تەلەارناسىنان كورسەتىلگەن “دارا جول” حابارى كورەرمەن قاۋىمدى ۇلتقا ەڭبەگى سىڭگەن تالاي تۇلعالاردىڭ ءومىر جولىمەن تانىستىردى. كوپشىلىكتىڭ كوزايىمىنا اينالعان اتلمىش باعدارلامادا اكادەميك اسقار جۇمادىلداەۆتىڭ، رەجيسسەر ساتىبالدى نارىمبەتوۆتىڭ، اكتەر ءاسانالى ءاشىموۆتىڭ تاعى باسقا كوپتەگەن ۇلتقا ەڭبەگى سىڭگەن تۇلعالاردىڭ تاعدىر جولدارى تاسپالاندى. سوندىقتان مۇنداي حاباردى جۇرگىزگەن دانا نۇرجىگىتتىڭ دە ۇلتتىق ماسەلەلەرگە بەي-جاي قارامايدى دەگەن پىكىرلەر دە ايتىلدى.

ال، مەملەكەت باسشىسىنىڭ بۇل تاعايىنداۋى تۋرالى دانا نۇرجىگىتتىڭ ءوزى دە الەۋمەتتىك جەلى ارقىلى وقىرماندارىمەن ءبولىستى. دانا حانىمنىڭ ايتۋىنشا، كوپشىلىكتىڭ كوزايىمىنا اينالعان دارا جول حابارى توقتامايدى.

-قادىرلى وقىرماندارىم،قىمباتتى وتانداستار! ماعان جولداعان قۇتتىقتاۋلارىڭىزدى وقىپ وتىرمىن.كوپ راقمەت! پرەزيدەنت جارلىعىمەن ماعان جۇكتەلگەن مىندەتتىڭ مارتەبەسى قانشالىقتى بيىك بولسا،سالماعى اتان تۇيەگە جۇك بولارلىق سونشالىقتى اۋىر ەكەنىن ءجىتى ءتۇسىنىپ وتىرمىن. حالىق اماناتىن كوتەرىپ،كوپتىڭ ءۇمىتىن اقتاۋ ەندى ءبىزدىڭ بۋىنعا جۇكتەلىپ وتىر.ارىق سويلەپ،سەمىز شىقسىن دەيمىن... قال -قاۋقارىمشا ادال ەڭبەك ەتىپ، ەل ومىرىنەن اجىراماي،كابينەت قىزمەتكەرى ەمەس،حالىق قىزمەتشىسى بولۋعا ۇمتىلامىن.ونى ايتىپ وتىرعان سەبەبىم: "Dara jol" حابارى توقتامايدى.سول جەردەگى كەزدەسۋلەر،ۇلگى تۇتار تۇلعالاردىڭ اقىلى،تاجىريبەسى،كەڭەسى حالىق پەن زامان تىنىسىن، تىرشىلىك تامىرىنىڭ سوعىسىن سەزىنۋگە ايتارلىقتاي سەپتىگىن تيگىزەرى انىق. باتاڭىزدى بەرىپ،اقىل قوسقان بارشالارىڭىزعا العىس ايتامىن! اللا ابىروي بەرسىن دەيمىن...
زور قۇرمەتپەن:
دانا نۇرجىگىت ،- دەپ جازدى.

دانا نۇرجىگىتتىڭ سوزىنەن ۇققانىمىز – ول حالىقپەن ەتەنە بايلانىسىن ۇزبەيدى. ءوز سوزىمەن ايتقاندا، كابينەت قىزمەتكەرى ەمەس، حالىق قىزمەتشىسى بولۋعا ۇمتىلادى. ارينە، مۇنداي حالىقتىڭ اراسىنان شىققان ادامداردىڭ جوعارى بيلىككە بارۋى كوڭىل قۋانتادى. سەبەبى، ولار حالىقتىڭ جاي-كۇيىمەن، جاعدايىمەن ەتەنە تانىس.

ال، پارلامەنت سەناتىنىڭ دەپۋتاتى بولىپ تاعايىندااتىنىن دانا حانىمنىڭ ءوزى دە از كۇن قالعاندا بىلگەن.

-شىنىمدى ايتسام، مەن بۇل تاعايىنداۋ تۋرالى بىرنەشە كۇن بۇرىن عانا ءبىلدىم. بۇل مەن ءۇششىن ۇلكەن توسىن سىي بولعانىن جاسىرا المايمىن. بۇل تاعايىنداۋدان بۇرىن مەنىڭ وسى ۋاقىتقا دەيىن جاساعان جۇمىستارىم تالدانىپ، سارالانعان دەپ ويلايمىن. ارينە، ازداپ قورقىنىشتى. سەبەبى، قايتالاپ ايتايىن، بۇل – ۇلكەن جاۋاپكەرشىلىك، بيىك مارتەبە. سوندىقتان حالىققا ايتقان ءار ءسوزدىڭ ماڭىزى بار، -دەيدى ونىڭ ءوزى.

سونىمەن قاتار، ول ساياساتقا ءبىرجولا بەتبۇرۋى ءالى دە كۇماندى ەكەنىن ايتادى.

-مەن دە الەۋمەتتىك جەلىنىڭ قولدانۋشىسىمىن. بارلىعىمىز ۇيدە وتىرعاندا ونى قالاي ىستەيتىنىمىزدى بىلەمىز. سونداي-اق، سىزگە ءبىر ءىستى جاساۋعا مۇمكىندىك بەرگەندە اۋەلى كورىڭىز، جاساڭىز دەيدى. سوسىن بارىپ ءسىز ناقتى ىسكە كىرىسەسىز. سول سياقتى، مەن ءالى دە ناقتى بۇل تۋرالى شەشىم قابىلداعان جوقپىن. بىراق، سوعىس جوسپاردى كورسەتەدى، -دەدى.

ال، دەپۋتات رەتىندە ناقتى قانداي ماسەلەلەردى كوتەرەسىز دەگەن ساۋالدارعا دانا نۇرجىگىت ءبىلىم سالاسى مەن كوپبالالى انالار ماسەلەسىن كۇنتارتىبىنە قويۋدى جوسپارلاپ وتىرعان كورىنەدى.

-مەن انامىن. سوندىقتان قازىرگى ءبىلىم جۇيەسىندە نە بولىپ جاتقانىن جاقسى بىلەمىن. سونىمەن قاتار، كوپبالالى انالارعا تولەنەتىن جاردەماقى جايى مەن تولىق ەمەس وتباسىلاردىڭ جانە تۇرعىن ءۇي باعدارلاماسى تۋرالى جاعدايلاردىڭ قانداي ەكەنىن بىلەمىن. ارينە، ەل يگىلىگى ءۇشىن جاساۋعا ءتيىس ىستەر شاش ەتەكتەن، - دەيدى ول.

تاعى باسا ايتاتىن ءبىر دۇنيە – دەپۋتاتتىق كرەسلوعا وتىرسا دا، تەلەارناداعى تەلەجۇرگىزۋشىلىك جۇمىسى جالعاسا بەرەدى.

-مەن كابينەتتىك شەنەۋنىك بولعىم كەلمەيدى. حالىققا بارىنشا جاقىن ادام بولعىم كەلەدى. بۇعان كاسىبي قىزمەتىمدى توقتاتپاۋىم جاردەمدەسپەك. بۇل زاڭعا قايشى كەلمەيدى. ياعني، مەنىڭ ەل الدىنا شىعۋىم، ادامدار اراسىندا بولۋىم، ءار قالاداعى ءىسساپارلارىم، جۋرناليستىك قىزمەتىم، مەنى ۇيقىعا كەتۋگە مۇمكىندىك بەرمەيدى. مەن كوپ نارسەنى سەزىنىپ، ءيمپۋلستى قولىممەن ۇستايمىن. بۇل باعىتتا ءسوزسىز حالىقپەن تىكەلەي كەزدەسۋلەر بولادى. بۇل مەنىڭ دەپۋتاتتىق قىزمەتىمە جاردەمدەسەدى دەپ ويلايمىن،- دەيدى دانا نۇرجىگىت.

ايتا كەتەيىك، كۇنى كەشە پرەزيدەنت قاسىم-جومارت توقاەۆتىڭ جارلىعىمەن سەناتورلار بىرعانىم سارىقىزى ءايتىموۆانىڭ، اسقار اسانۇلى بەيسەنباەۆتىڭ، دۋلات راشيتۇلى قوسداۋلەتوۆتىڭ، گەورگي ۆلاديميروۆيچ كيمنىڭ، سەرگەي نيكولوەۆيچ گروموۆتىڭ، راشيد تولەۋتايۇلى تۇسىپبەكتوۆتىڭ دەپۋتاتتىق وكىلەتتىكتەرى توقتاتىلدى.

پرەزيدەنت جارلىعىمەن قازاقستان رەسپۋبليكاسى پارلامەنتى سەناتىنىڭ دەپۋتاتتىعىنا دانا نۇرجىگىتتەن بولەك، داريعا نۇرسۇلتانقىزى نازارباەۆا، مۇحتار ابرارۇلى قۇل-مۇحاممەد، ءلاززات جاڭىلىسقىزى سۇلەيمەن، نۇرتورە بايتىلەسۇلى ءجۇسىپ، قاناتبەك بەيسەنبەكۇلى سافينوۆ، اندرەي يۆانوۆيچ لۋكين سىندى بىرقاتار ازاماتتار تاعايىندالدى.

بايقاعانىمىزداي، سەنات دەپۋتاتتىعىنا تاعايىندالعان جەتى ادامنىڭ ۇشەۋى ايەل ادامدار. دەمەك، نازىك جاندىلاردىڭ ساياسات ساحناسىنداعى بەدەلى مەن ابىرويى ۋاقىت وتكەن سايىن ارتىپ كەلەدى دەگەن ءسوز. ويتكەنى ولار دا ەرلەرمەن يىق تىرەستىرە ءجۇرىپ، قوعامدىق ۇلتتىق ماسەلەلەردى بيىك مىنبەرلەردەن كوتەرۋدە باتىلدىق تانىتا الادى. ودان بولەك، ءار سالادا جەمىستى قىزمەت اتقارىپ جۇرگەن مينيستر، ءار ايماقتاعى اكىمدەرمەن ءتۇرلى شەندى قىزمەتتەردە دە وسى ايەل ادامداردىڭ سالماعى ارتىپ كەلەدى. حالىقتىڭ نۇروتان پارتياسىنىڭ دا تەڭ جارىمىنان استامى نازىك جاندىلار. دەمەك، ەلىمىزدەگى مەملەكەتتىك ساياساتتىڭ ماڭىزدى بولىگىنە اينالعان ەلباسىنىڭ گەندەرلىك ساياسات تۇجىرىمداماسى قوعامدا وڭ ناتيجە بەرىپ كەلەدى دەگەن ءسوز. بۇعان تولىق نەگىز بار.

Abai.kz