قازاقستان پرەزيدەنتى قاسىم-جومارت توقاەۆ ارىس قالاسىندا بولعان توتەنشە جاعداي كەزىندە ەرەكشە كوزگە تۇسكەن ازاماتتاردى ماراپاتتادى.

مەملەكەت باسشىسى 24 ماۋسىمدا ارىس قالاسىندا بولعان توتەنشە جاعداي كەزىندە جانە قارۋ-جاراق قويماسىنداعى جارىلىستىڭ سالدارىن جويۋ بارىسىندا ەرەكشە كوزگە تۇسكەن ەلىمىزدىڭ ازاماتتارىنا مەملەكەتتىك ناگرادالار تاپسىردى. «اقوردا» رەزيدەنتسياسىندا وتكەن سالتاناتتى جيىندا 40 ادام ماراپاتتالدى.

قاسىم-جومارت توقاەۆ ءوز سوزىندە تۇرعىنداردى قۇتقارۋعا جانە ارىس قالاسىن قايتا قالپىنا كەلتىرۋگە اتسالىسقان بارلىق ازاماتقا ريزاشىلىق ءبىلدىردى.

پرەزيدەنت 24 ماۋسىم حالقىمىزدىڭ تاعى ءبىر سىناقتان سۇرىنبەي وتكەن كۇنى رەتىندە تاريحتا قالاتىنىن ايتىپ، ارىس تۇرعىندارىنىڭ تىنىشتىعى بۇزىلعانىمەن، ەلدىڭ رۋحى تۇسپەگەنىن ايتتى.

– قايعىلى جاعداي ەشكىمدى بەي-جاي قالدىرمادى. ارىس قالاسىن بۇكىل ەل بولىپ قالپىنا كەلتىردىك. بۇعان قازاقستاننىڭ ءار تۇرعىنى ۇلەس قوستى. پاتريوتيزم مەن شىنايى كومەكتىڭ وسىنداي جارقىن ۇلگىسىنىڭ نەگىزىندە جاستارىمىزدى تاربيەلەۋىمىز كەرەك، – دەدى مەملەكەت باسشىسى.

قاسىم-جومارت توقاەۆ قازىرگى ۋاقىتتا نىسانداردىڭ 97 پايىزىنىڭ قايتا قالپىنا كەلتىرۋ جۇمىستارى اياقتالعانىن، ەڭ الدىمەن، كوپ بالالى وتباسىلاردىڭ باسپانالارى قالپىنا كەلتىرىلگەنىن حابارلادى. 1 قىركۇيەك كۇنى 16 مەكتەپ 12 مىڭ وقۋشىنى قابىلدادى، ونىڭ 2,5 مىڭى ءبىرىنشى سىنىپقا بارعان بۇلدىرشىندەر.

قازاقستان پرەزيدەنتى ءسوزىنىڭ سوڭىندا ارىس وقيعاسى حالقىمىزدىڭ قيىن-قىستاۋ كەزدەگى بەكەم بىرلىگى مەن ىنتىماعىن كورسەتكەنىن ايتتى.

- شىن مانىندە، بۇگىنگى جيىنعا قاتىسىپ وتىرعان ازاماتتار – ناعىز باتىرلار. ال، وسى زالعا كەلە الماعانداردىڭ ءبارى وردەندەرمەن جانە مەدالدارمەن ماراپاتتالاتىن بولادى، - دەپ قورىتىندىلادى مەملەكەت باسشىسى.

Abai.kz