سارسەنبى, 16 قازان 2019
46 - ءسوز 1741 1 پىكىر 16 قىركۇيەك, 2019 ساعات 12:27

15-قىركۇيەك - قازاق جەرىنىڭ تۇتاستىعى ساقتالعان كۇن

1991 جىلى 15 قىركۇيەكتە ورال كازاكتارى ورالدا وزدەرىنىڭ 400 جىلدىعىن اتاپ وتپەك بولدى. وعان رەسەيدىڭ ءار ايماعىنان كازاك اتاماندارى مەن جاساقتارى جينالدى. ءوز جيىندارىن كونتسەرتتىك قويىلىم مەن كورىنىس ارقىلى اتاپ وتەمىز دەگەن ولاردىڭ شىن مانىندە ماقساتى بولەك ەدى. قازاق ۇلتشىلدارى كازاكتار قازاقستاننىڭ باتىس ايماعىندا سەپاراتيزم ءدانىن ەگىپ جاتىر دەپ سانادى. ولاردىڭ قاۋىپتەرى نەگىزسىز ەمەس ەدى. ويتكەنى ءدال وسىنداي ستسەناري بويىنشا كازاكتار پريدنەستروۆەنىڭ بەرەكەسىن قاشىرۋدا رەسەيگە جاقتاستى.

ەلىمiزدىڭ بولشەكتەنبەۋىنە "ازات" قوزعالىسى مەن قاراپايىم حالىق ۇمىتىلماس ەڭبەك ءسىڭىردى. ولار 15 قىركۇيەككە دەيىن ەلىمىزدىڭ ءار ايماعىنان جينالعان ازاماتتارمەن بىرىگىپ ميتينگتەر وتكىزدى. ال 15 قىركۇيەك كۇنى بۇل جىمىسقى جوسپاردىڭ تالقانىن شىعاردى. كونتسەرت قويامىز دەپ جينالعان زالدا كازاكتار "ورالدى رەسەيگە قوسۋ ماسەلەسىن" تالقىلاپ جاتقان بولاتىن. ۇلتشىلدار بۇل ويدى ءبىلىپ، زالعا كىرمەك بولدى. سول ساتتە باتىرسىنعان كازاك سودىرلارى تايىپ تۇردى. دايىن تۇرعان اۆتوبۋستارعا وتىرىپ، رەسەيلەرىنە تابان جالتىراتتى. اسكەري ساپپەن ءجۇرىپ وتپەك بولعان كەي كازاكتار ءبىزدىڭ جىگىتتەردەن سوققى جەدى. وسىلايشا قاراپايىم قازاق جىگىتتەرى، جۇرەگى الاش دەپ سوققان پاتريوتتار ەلىمىزدى، بابادان قالعان قاسيەتتى مەكەندى ءبىر قاۋىپتەن ساقتاپ قالدى.

ولار جايلى بۇگىندە بيىك مىنبەردەن ايتىلىپ، تەلەديداردان كورسەتپەيدى. بىراق ءبىز ۇمىتپايمىز. سول وقيعاعا قاتىسۋشى پاتريوتتارعا العىس بىلدىرەمىن!

اسحات قاسەنعاليدىڭ facebook پاراقشاسىنان

Abai.kz

1 پىكىر