قازاقستان رەسپۋبليكاسى ۇكىمەتىنىڭ قاۋلىسىمەن احمەتوۆا اقەركە ەستايقىزى ادىلەت ۆيتسە-ءمينيسترى قىزمەتىنە تاعايىندالدى. بۇل تۋرالى قازاقستان رەسپۋبليكاسى پرەمەر-ءمينيستردىڭ ءباسپاسوز قىزمەتى حابارلاپ وتىر.

اقەركە ەستايقىزى بۇعان دەيىن دە بىرنەشە جاۋاپتى قىزمەتتەردە ىستەگەن. الداعى اسا جاۋاپتى قىزمەتىندە دە جوعارى دەڭگەيدەگى مامان ەكەنىن كورسەتەتىنى ءسوزسى. ءارى مەملەكەتتىك ماڭىزدى قىزمەتتەردە وسىنداي جاس قىزمەتكەرلەردىڭ كەلگەنىن جاقسى جاڭالىق رەتىندە باعالاۋعا بولادى. قازاق "جاس كەلسە ىسكە" دەيدى. دەمەك، جاس كادرلاردىڭ كوبەيۋى جاڭا باستامالارعا جول اشادى دەپ سەنۋگە ابدەن بولادى.

تومەندە اقەركە احمەتوۆانىڭ ءومىربايانىن نازارلارڭىزعا ۇسىنامىز.

اقەركە احمەتوۆا 1975 جىلى الماتى قالاسىندا تۋعان.

ءبىلىم جولى:

شوحان ءۋاليحانوۆ اتىنداعى كوكشەتاۋ پەداگوگيكالىق ينستيتۋتىن تامامداعان.

ودان كەيىن  ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتى جانە كوكشەتاۋ ۋنيۆەرسيتەتىندە ءبىلىم العان

بۇدان تىس، قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىندا وقىعان.

ەڭ ماڭىزدىسى "بولاشاق" باعدارلاماسى بويىنشا ۇلىبريتانيانىڭ Sheffield ۋنيۆەرسيتەتىندە وقىپ، عالامدىق بىلىممەن سۋسىنداعان.

ەڭبەك جولى:

ال ەڭبەك جولىن 1991 جىلى باستاعان. جاس بولعانىنا قاراماستان ءار جىلدارى ءتۇرلى كوممەرتسيالىق سالادا جۇمىس ىستەگەن.

2000 جىلدان باستاپ قازاقستان رەسپۋبليكاسى ادىلەت مينيسترلىگىنىڭ قۇرىلىمىندا جۇمىس ىستەپ كەلەدى. باس مامان، حالىقارالىق كەلىسىمشارتتار جوبالارىن ساراپتاۋ ءبولىمىنىڭ باسشىسى، دەپارتامەنت ديرەكتورىنىڭ ورىنباسارى قىزمەتتەرىن اتقارعان.

2015-2017 جىلدارى ارالىعىندا - قازاقستان رەسپۋبليكاسى ادىلەت مينيسترلىگىنىڭ حالىقارالىق قۇقىق جانە ىنتىماقتاستىق دەپارتامەنتىنىڭ ديرەكتورى بولدى

2018 جىلعى ناۋرىزدان قازىرگى تاڭعا دەيىن قازاقستان رەسپۋبليكاسى ادىلەت مينيسترلىگىنىڭ مەملەكەتتىك مۇلىك قۇقىعىن قورعاۋ دەپارتامەنتىنىڭ ديرەكتورى لاۋازىمىن اتقارعان.

Abai.kz