ءمينيستردىڭ سوزىنشە، ادامدار ەلدىڭ 7-8 قالاسىندا ۇستالعان. تۇرعىمباەۆ ادامداردىڭ ناقتى قاي قالالاردا ۇستالعانىن اشىپ ايتپادى.

وتكەن سەنبى كۇنى قازاقستاندا پوليتسيا ونداعان ازاماتتى ۇستاعان. ۇستالعانداردىڭ اراسىندا بيلىك جۇيەسىنە قارسى نارازىلىق بىلدىرگەندەر، "ساياسي تۇتقىنداردى" بوساتۋدى تالاپ ەتكەندەر جانە "قازاقستان مەن قىتايدىڭ بىرلەسكەن جوبالارىنا" قارسى شىققاندار بولدى.

ال 21 قىركۇيەكتىڭ الدىندا قازاقستان سوتى ەكسترەميستىك ۇيىم دەپ تانىپ، تىيىم سالعان "قازاقستاننىڭ دەموكراتيالىق تاڭداۋى" (قدت) قوزعالىسىنىڭ ليدەرى، 2009 جىلدان بەرى شەتەلدە تۇرىپ جاتقان قۋعىنداعى بۇرىنعى بانكير مۇحتار ءابليازوۆ جاقتاستارىن 21 قىركۇيەكتە جاپپاي كوشەگە نارازىلىق شەرۋىنە شىعۋعا شاقىرعان. قازاقستان باس پروكۋراتۋراسى "رۇقسات ەتىلمەگەن ميتينگىگە قاتىسۋ زاڭسىز" ەكەنىن ەسكەرتىپ، وعان قاتىسقان ازاماتتاردىڭ "جازالاناتىنىن" ەسكەرتكەن.

قازاقستان بيلىگى ۇستالعانداردىڭ كوبى "پروكۋراتۋرانىڭ ەسكەرتۋىنە قاراماستان، زاڭسىز ميتينگىگە شىققانىن" ايتادى.

ناۋرىز ايىندا ۋاقىتشا پرەزيدەنت مىندەتىن اتقارۋعا كىرىسىپ، 9 ماۋسىمدا كەزەكتەن تىس وتكەن پرەزيدەنت سايلاۋىنىڭ رەسمي قورىتىندىسى بويىنشا قازاقستان پرەزيدەنتى بولىپ سايلانعان قاسىم-جومارت توقاەۆ باتىس باسىلىمدارىنا بەرگەن سۇحباتىندا ميتينگى تۋرالى جاڭا زاڭ ازىرلەۋ جوسپارى جايلى مالىمدەگەن. پرەزيدەنت قىركۇيەكتىڭ باسىندا حالىققا جولداۋىندا "كونستيتۋتسياعا سايكەس، ازاماتتارىمىز ءوز ەركىن بىلدىرۋگە قۇقىلى. ەگەر بەيبىت اكتسيالار زاڭدى جانە ەلدىڭ شىرقىن بۇزۋدى كوزدەمەسە، وندا بەلگىلەنگەن زاڭ شەڭبەرىندە ميتينگىلەرگە رۇقسات بەرىپ، ارنايى ورىن ءبولۋ كەرەك" دەگەن. الايدا توقاەۆتى سىنايتىندار ونىڭ شەتەل باسىلىمدارىنا "جاڭالىق" دەپ وتىرعانى قولدانىستاعى زاڭدا بار ەرەجە ەكەنىن ايتادى.

Abai.kz