بارشامىزعا ءمالىم، 2 قىركۇيەك كۇنى قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ العاش رەت «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىن جاريالادى.

جولداۋ زاماناۋي ءتيىمدى مەملەكەت، ازاماتتاردىڭ قۇقىعى مەن قاۋىپسىزدىگىن قامتاماسىز ەتۋ، قارقىندى دامىعان جانە ينكليۋزيۆتى ەكونوميكا، الەۋمەتتىك جاڭعىرۋدىڭ جاڭا كەزەڭى، قۋاتتى ءوڭىر – قۋاتتى ەل دەپ اتالاتىن 5 باسىم باعىتتى قامتي وتىرىپ، ەلىمىزدىڭ الەۋمەتتىك – ەكونوميكالىق دامۋىنىڭ العىشارتتارىن ايقىنداپ بەردى.

سونىمەن قاتار، پرەزيدەنت جولداۋىندا ساپالى مەملەكەتتىك قىزمەتتەردى كورسەتۋگە دە باسا نازار قويدى. سەبەبى، حالىققا ساپالى قىزمەت كورسەتۋدى قامتاماسىز ەتۋ-مەملەكەتتىك ورگاندار جۇمىسىنىڭ اسا ماڭىزدى باعىتتارىنىڭ ءبىرى. قىزمەتتەردى الۋ بارىسىندا ازاماتتار مەملەكەتتىك اپپاراتتىڭ جۇمىسى تۋرالى بەلگىلى ءبىر ويعا كەلەدى. ال، حالىقتىڭ مەملەكەتكە دەگەن سەنىمى ەلىمىزدىڭ وركەندەۋىندە بىرلەسىپ جۇمىس جاساۋعا مۇمكىندىك بەرەدى.

وسىعان بايلانىستى، ەلىمىزدە مەملەكەتتىك قىزمەتتەردى كورسەتۋدىڭ ساپاسىن باعالاۋ تۇراقتى تۇردە جۇرگىزىلەدى جانە ول مىناداي ولشەمدەردى قامتيدى: قىزمەت الۋشىلاردىڭ مەملەكەتتىك قىزمەتتەردى كورسەتۋدىڭ ساپاسىمەن قاناعاتتاندىرىلۋى (الەۋمەتتىك زەرتتەۋ قورىتىندىسى); مەملەكەتتىك قىزمەتتەردى كورسەتۋ مەرزىمدەرىنىڭ ساقتالۋى; مەملەكەتتىك قىزمەتتەردىڭ كورسەتىلۋ ساپاسىن قامتاماسىز ەتۋ; مەملەكەتتىك قىزمەتتەردىڭ كورسەتىلۋ ساپاسىنا ىشكى باقىلاۋ.

قازىرگى ۋاقىتتا مەملەكەتتىك قىزمەتتەردى ۋاقىتىلى كورسەتۋ ءۇشىن زاڭنامالىق تۇرعىدان مەرزىمدەردىڭ ناقتى بەكىتىلگەندىگىنە، ءتيىستى اقپارتتىق جۇيەلەردىڭ قولدانىسقا ەنگىزىلگەندىگىنە، جاۋاپتى قىزمەتكەرلەر بەكىتىلىپ، مەملەكەتتىك ورگاندار قاجەتتى ماتەريالدىق-تەحنيكالىق بازالارمەن قامتىلعاندىعىنا قاراماستان مەملەكەتتىك قىزمەت كورسەتۋ مەرزىمدەرىنىڭ ساقتالۋ ماسەلەسى دە ماڭىزدىلىعىن جوعالتپادى. سول سەبەپتى اتالعان ماسەلەگە قاتىستى تالداۋ جاساۋ فۋنكتسياسىن دەپارتامەنت ءوز قولىنا الىپ، الداعى ۋاقىتتا زاڭ بۇزۋشىلىقتار بولعان جاعدايدا اۋدان اكىمى، اپپارات باسشىسىنىڭ، ءبولىم باسشىلارىنىڭ تارتىپتىك جاۋاپكەرشىلىگى ادەپ جونىندەگى كەڭەستە قارالاتىن بولادى.

دەپارتامەنت مەملەكەتتىك قىزمەتتەردى كورسەتۋ ساپاسىن باقىلاۋىنا العانىنا قاراماستان، تۋىنداعان ماسەلەلەر دەر كەزىندە شەشىلۋى قاجەت. بۇل ورايدا، ءاربىر اكىمدىكتە قۇرىلعان ىشقا باقىلاۋ بولىمدەرىنىڭ ماڭىزدىلىعى ارتا تۇسەدى. مەملەكەتتىك قىزمەتتەردىڭ كورسەتىلۋ ساپاسىنا ىشكى باقىلاۋدىڭ جوعارى دەڭگەيدە جۇرگىزىلۋى، اتالعان بولىمدەردە جۇمىس ىستەيتىن مامانداردىڭ جوعارى قۇزىرەتتەرگە يە بولۋى مەن كاسىبيلىگى نەگىزگى قويىلاتىن تالاپتاردىڭ ءبىرى.

وسىعان بايلانىستى، دەپارتامەنت تۋىنداپ وتىرعان ماسەلەلەردى جەرگىلىكتى دەڭگەيدە شەشىلۋىن نازاردان شىعارمايدى. بۇل ماقساتتا، دەپارتامەنت تاراپىنان وسى بولىمدەردىڭ ماماندارىنىڭ بىلىكتىلىگىن ارتتىرۋ ءۇشىن قاجەتتى وقىتۋ جۇمىستارىنىڭ جۇرگىزىپ تۇراتىندىعىن ايتا كەتكەن ءجون. بۇعان قوسا، ءوڭىرىمىزدىڭ اۋداندارى مەن قالالارىنىڭ قوعامدىق كەڭەستەرىندە مەملەكەتتىك كورسەتىلەتىن قىزمەتتەردىڭ ماسەلەلەرى تۇراقتى تۇردە قارالىپ وتىرادى.

سونىمەن قاتار، دەپارتامەنت باستاماسىمەن تۇرعىندارمەن قىزمەتتەردى ەلەكتروندى نىساندا الۋىن قامتاماسىز ەتۋ ماقساتىندا بارلىق مەملەكەتتىك ورگانداردا، مەديتسينالىق مەكەمەلەردە، مەكتەپتەردە، بالاباقشالاردا، كوللەدجدەردە، جوعارعى وقۋ ورىندارىندا، كىتاپحانالاردا، قازپوچتا بولىمشىلەرىندە وزىنە-ءوزى قىزمەت كورسەتۋ بۇرىشتارىن قۇرىلعان بولاتىن.

بۇرىشتاردى قۇرىپ قانا قويماي، ول جەردە قىزمەت الۋعا كەلگەن تۇرعىندارعا پراكتيكالىق كومەك كورسەتەتىن قىزمەتكەرلەر بەكىتىلىپ جانە ولاردىڭ جۇمىستارىنا باقىلاۋ ورناتىلدى.

جوعارىدا اتالعانمەن قاتار، دەپارتامەنت وبلىسىمىزدا جىل باسىنان بەرى قوعامدا جوعارعى سۇرانىسقا يە قىزمەتتەردى ەلەكتروندى فورماتقا اۋىستىرۋ جانە سول ارقىلى قىزمەتتەردىڭ كورسەتىلۋىنىڭ اشىقتىعىن قامتاماسىز ەتۋدە.

اتاپ ايتساق، ورتا ءبىلىم بەرۋ مەكەمەلەرىمەن كورسەتىلەتىن قىزمەتتەردى تولىعىمەن ەلەكتروندى تۇرگە اۋدارۋ بويىنشا وبلىس بيۋدجەتىنەن 24 ملن. تەڭگە بولىنگەن mektep sitcen اقپاراتتىق جۇيەسى ىسكە قوسىلدى.

بۇل جۇيە ارقىلى جەڭىلدىكپەن تاماقتانۋ، بالالاردى ءبىرىنشى سىنىپقا تىركەۋ، دارىندى بالالارعا ارنالعان مەكتەپتەرگە قابىلداۋ ءۇشىن ءوتىنىم بەرۋ، لاگارگە جولداما الۋ، شالعايداعى اۋىلدىق ەلدى مەكەندەردە تۇراتىن بالالاردى جالپى ءبىلىم بەرۋ ۇيىمدارىنا جانە كەرى قاراي ۇيىنە تەگىن تاسىمالداۋعا جازىلۋ، سونىمەن قاتار، بالانى باسقا مەكتەپكە اۋىستىرۋ ۇردىستەرىن ەلەكتروندى تۇردە جۇزەگە اسىرۋعا بولادى.

سونىمەن قاتار، مەكتەپكە دەيىنگى بالالار ۇيىمدارىنا جولداما بەرۋ جانە كەزەكتى قالىپتاستىرۋ پروتسەسىن اۆتوماتتاندىرۋعا وبلىس بيۋدجەتىنەن 58 ملن. تەڭگە ءبولىنىپ، ە–zhetysu.kz پورتالى ەنگىزىلدى.

اۆتوماتتاندىرۋدىڭ نەگىزگى ارتىقشىلىعى اتا – انالارعا ناقتى ۋاقىتتا پورتالدا ءوتىنىشتى تىركەۋ جانە ءبىلىم ءبولىمى قىزمەتكەرلەرىنىڭ تىكەلەي قاتىسۋىنسىز تاندالعان بالاباقشالارعا جولداما الۋ مۇمكىندىگىگىن بەرەدى.

الماتى وبلىسى ەلىمىزدە ءبىرىنشى بولىپ بۇل قىزمەتتى تولىق وبلىس كولەمىندە اۆتوماتتاندىرعانىن ايتا كەتكەن ءجون.

قورىتا ايتقاندا، العا قويىلعان مىندەتتەردى ورىنداۋ جانە بولاشاق ۇرپاققا دامىعان ەلدى امانات ەتىپ قالدىرۋ بارشامىزدىڭ ورتاق مىندەتىمىز.

س.ءو. نۇرعيساەۆ

قازاقستان رەسپۋبليكسىنىڭ
مەملەكەتتىك قىزمەت ىستەرى
اگەنتتىگىنىڭ الماتى وبلىسى
بويىنشا دەپارتامەنتىنىڭ باسشىسى،
ادەپ جونىندەگى كەڭەستىڭ توراعاسى

Abai.kz