قۇقىقتىق ساۋات دەگەندى قاتە ءتۇسىنىپ ءجۇرمىز-اۋ وسى...
...ۇيىنەن باياعىدا ۇزاتىلىپ كەتكەن قىز قارا شاڭىراقتاعى ىنىسىنەن ۇلەس داۋلاپ كەلدى جاقىندا. "زاڭ بويىنشا مۇراعا تالاسا الادى ەكەنمىن" دەيدى تەپسىنىپ.

...كۇيەۋى قايتىس بولعان كەلىنشەك جالعىز باسپانادان اتا-ەنەسىن قۋىپ شىقپاق. "كۇيەۋىم ەكەۋمىز سالعان ءۇي. وسى ۋاقىتقا دەيىن شىدادىم. ەندى جوندەرىن تاپسىن، مەنىڭ دە جەكە ءومىرىم بار" دەيدى قاتايعان كەلىن.

..."كۇيەۋىم جەردى انامنىڭ اتىنا راسىمدەيىك دەگەندە ارام ويىم بولماپ ەدى. بالا كۇتىمىنە دەپ تۇسكەن اقشانى، جيعان-تەرگەنىمدى تۇگەل ۇيگە سالدىم. سوڭعى كەزدە ءار نارسەنى سىلتاۋ ەتىپ اجىراساتىن بولدى. ماعان ۇلەسىمدى بەرەتىن ويلارى جوق. ەندى قايدا بارامىن؟" دەيدى بوپەسىن كوتەرگەن تاعى ءبىر كەلىنشەك.

...وتىز جىل وتاسقان كۇيەۋىن ۇيىنەن قۋىپ شىققان ايەلدى دە كوردىك. ءوزى ءومىرى جۇمىس ىستەمەگەن. بىراق، ەكى قاباتتى كوتتەدج، بىرنەشە قىمبات كولىك، بازارداعى كونتەينەر ايەلدىڭ اتىندا. جول پوليتسياسىندا قىزمەت ەتكەن كۇيەۋى جيعان-تەرگەنىن ايەلىنىڭ اتىنا جازا بەرگەن عوي. وپاسىزدىق جاسايدى دەپ ويلاماعان شىعار. ال ايەلى ەش مامىلەگە كەلەر ەمەس. "باۋىرىمىز زەينەتكە شىعىپ دەمالار شاعىندا دالادا قالدى. مىنا ايەل كوپ دۇنيەنى باۋىرلارىنىڭ اتىنا اۋدارىپ تاستاپتى. وسىنداي دا بولا ما؟" دەيدى جول ساقشىسىنىڭ ەكى اپكەسى. سولاي بولماسا سىزدەر رەداكتسيادان كومەك سۇراپ كەلەر مە ەدىڭىزدەر...

...وسىنداي جاعدايلارعا قاراپ تۇيگەنىم، ءبىزدىڭ قۇقىقتىق ساۋاتىمىز وسكەن جوق. ءبىزدىڭ ساۋاتىمىز جاقىندارىمىزدى جابىرقاتۋدىڭ، تۋىستار ەسەبىنەن تيىنىمىزدى تۇگەندەۋدىڭ دەڭگەيىنەن اسپاي وتىر...

اينۇر سەمباەۆانىڭ facebook پاراقشاسىنان

Abai.kz