رەسەيلىك الاياقتار قازاقستاندىقتاردىڭ شوتتارىنان 200 ميلليون تەڭگەنى ۇرلاپ كەتكەن. بۇل تۋرالى ءماجىلىس وتىرىسىندا ءىىم ورىنباسارى مارات قوجاەۆ مالىمدەدى. ولار ازاماتتاردىڭ بانك شوتتارىنا قول جەتكىزۋ ءۇشىن ينتەرنەتتەگى جارنامانى پايدالانعان.

قازىر قازاقستاننىڭ ىشكى ىستەر مينيسترلىگى رەسەيدە جاسالعان 42 قىلمىستىق ءىس بويىنشا تەرگەۋ جۇرگىزىپ جاتىر.

-ينتەرنەتتەگى جالعان جارنامالار ارقىلى رەسەي فەدەراتسياسىنىڭ اۋماعىندا بەلگىسىز الاياقتار ءبىزدىڭ ازاماتتارىمىزدىڭ شوتتارىنداعى اقشانى ەلەكتروندى تۇردە اۋدارىپ العان. قازىر 200 ميلليونعا جۋىق اقشا اۋدارىلعانى انىقتالدى. بۇل قارجى ماسكەۋدە، سانكت-پەتەربۋرگتە، ۋفادا جانە تاعى باسقا قالالاردا، - دەدى قوجاەۆ.

سونىمەن قاتار، قوجاەۆ بيۋروكراتيالىق قيىندىقتارعا بايلانىستى بۇل ىستەردىڭ ۇزاققا سوزىلعانىن ايتتى.

-ءبىز، مينسك كونۆەنتسياسىنا سايكەس، اقشانى الىپ كەتكەن ادامداردىڭ بەت-بەينەسىن كورسەتۋدى سۇرادىق. بۇل ماسەلە بويىنشا، ءبىزدىڭ ورگانداردىڭ، پروكۋرورلاردىڭ اراسىنداعى كەلىسىم ەكى ايعا سوزىلدى. قازىر بەينەنى ساقتاۋ مەرزىمى اياقتالدى، الايدا، ءبىز بانكتەردىڭ بەينەنى مۇلدە ساقتاماعانىن بايقايمىز، - دەدى ول.

Abai.kz