قىزىلوردا وبلىسىندا جيىن-تەرىن ماۋسىمى قارقىندى جۇرگىزىلۋدە. بيىل جەرگىلىكتى ديقاندار 87,9 مىڭ گەكتار جەرگە كۇرىش ەككەن. بۇگىنگى تاڭدا ەگىن القابىنىڭ 80 پايىزى ورىلعان، - دەپ حابارلايدى اباي-اقپارات.

بۇل تۋرالى قىزىلوردا وبلىسى اۋىل شارۋاشىلىعى باسقارماسىنىڭ باسشىسى قامباربەك مۇباراكوۆ مالىمدەدى. ونىڭ ايتۋىنشا، اتالعان جۇمىستار قازان ايىنىڭ العاشقى ون كۇندىگىندە تولىق تامامدالماق. بۇدان بولەك، ول قىزىلوردا وبلىسىنان 15 مەملەكەتكە اۋىل شارۋاشىلىعى ونىمدەرى ەكسپورتتالىپ جاتقاندىعىن حابارلادى.

- بيىل ايماقتان وزبەكستان رەسپۋبليكاسىنا 118 باس تۇيە، 250 باس ەت باعىتىنداعى ءمۇيىزدى ءىرى قارا مالدارى، بىرىككەن اراب امىرلىگىنە 950 باس قوزى جانە يران يسلام رەسپۋبليكاسىنا 789 باس قوي مەن 56 باس بۇقاشىق ەكسپورتتالدى. الايدا ءونىمدى شيكىزات تۇرىندە وتكىزۋ ءتيىمسىز بولعاندىقتان ەت ءوندىرىسىن دامىتۋ قاجەتتىلىگى تۋىندايدى. وسى ورايدا، ءىرى ينۆەستيتسيالىق جوبالاردى ىسكە اسىرۋ جوسپارلانۋدا، - دەدى قامباربەك امانگەلدىۇلى.

سونىمەن قاتار سالا باسشىسى ەل پرەزيدەنتى جۇكتەگەن مىندەتتەردى وبلىستا جۇزەگە اسىرۋعا مۇمكىندىك بارىن جەتكىزدى.

- قر پرەزيدەنتىنىڭ جولداۋىندا اۋىل شارۋاشىلىعى سالاسىنىڭ ودان ءارى قاراي دامۋىنا اسا ءمان بەرىلىپ، سۋارمالى جەرلەردىڭ جەر كولەمىن كەزەڭ-كەزەڭىمەن ۇلعايتۋ، ونىڭ ەسەبىنەن ءونىم كولەمىن ەسەلەپ ارتتىرۋ، سىرتقا ءونىم شىعارۋعا قولداۋ كورسەتۋ، ءونىم وڭدەيتىن كاسىپورىندار الەۋەتىن ارتتىرۋ قاجەت ەكەندىگى ءسوز بولدى. سونداي-اق، شەتەلدەن ينۆەستيتسيا تارتۋ ماسەلەلەرى كەڭىنەن قوزعالىپ، اۋىل شارۋاشىلىعىنىڭ الەۋەتى تولىق پايدالانىلماي وتىرعاندىعى، ەلىمىزدە عانا ەمەس شەتەلدە دە سۇرانىسقا يە ورگانيكالىق جانە ەكولوگيالىق تازا ءونىم ءوندىرۋ ءۇشىن زور مۇمكىندىكتەر بار ەكەندىگى ايتىلدى. مەملەكەت باسشىسى اتاپ كورسەتكەن جۇمىستار وبلىستا كەزەڭ-كەزەڭىمەن جۇزەگە اسىرىلدا، - دەدى باسقارما باسشىسى.

سونداي-اق، قامباربەك امانگەلدىۇلى جەرگىلىكتى ديقاندار بيىل دا كۇرىشتەن رەكورد ورناتۋعا ءۇمىتتى ەكەندىگىن ايتتى.

Abai.kz