سەيسەنبى, 15 قازان 2019
307 0 پىكىر 10 قازان, 2019 ساعات 14:25

قىزىلوردا وبلىسىنىڭ اكىمى ازاماتتاردى جەكە ماسەلەلەرى بويىنشا قابىلدادى

قىزىلوردا وبلىس اكىمى قۋانىشبەك ىسقاقوۆ قابىلداۋعا جازىلعان تۇرعىنداردى جەكە ماسەلەلەرى بويىنشا قابىلدادى. قابىلداۋعا قالا اكىمى ن.نالىباەۆ پەن جاۋاپتى باسقارما باسشىلارى دا قاتىستى.

ازاماتتاردى قابىلداۋ ءۇزىلىسسىز 8 ساعاتقا جۋىق جۇرگىزىلىپ، 70 ادام ايماق باسشىسىنىڭ قابىلداۋىندا بولدى. كەلگەندەردىڭ نەگىزگى ماسەلەسى تۇرعىن ءۇي، الەۋمەتتىك ماسەلە مەن ءبىلىم جانە دەنساۋلىق سالالارىنا قاتىستى.

-سوڭعى جىلدارى  قالامىزدا 15 جاڭا شاعىن اۋدان بوي كوتەرىپ، 7 مىڭنان استام قىزىلوردالىق باسپانالى بولدى. وسى جىلى  تۇرمىسى تومەن كوپبالالى وتباسىلاردى تۇرعىن ۇيمەن قامتاماسىز ەتۋ ءۇشىن «بالامەكەن» جوباسى اياسىندا بولات وتەمۇراتوۆتىڭ جەكە قورىنىڭ دەمەۋشىلىك قولداۋىمەن 100 وتباسى تۇرعىن ۇيمەن قامتىلدى، سونداي-اق، بۇگىندە سىرداريانىڭ سول جاعالاۋىندا 25 كوپ قاباتتى تۇرعىن ءۇيدىڭ قۇرىلىسى اياقتالىپ، كىلتى تابىستالدى،-دەپ اتاپ ءوتتى ايماق باسشىسى.

كەزەكتە تۇرعان ازاماتتار ءۇشىن باسپانا زاڭعا سايكەس كەزەڭ-كەزەڭىمەن بەرىلەدى. بالاسى قانات جۋداباەۆتىڭ 1 ساناتتاعى مۇگەدەك ەكەنىن، ءۇي كەزەگىندە 13 جىل بويى تۇرعاندىعىن ايتا كەلگەن روزا اسقاروۆا كەزەگىنىڭ جاقىنداعانىن بىلمەي، پاتەر سۇراپ كەلگەن. ايماق باسشىسى روزا اسقاروۆاعا كەزەگىنىڭ كەلىپ، سىرداريانىڭ سول جاعالاۋىنان پاتەرلى بولعاندىعىن ايتىپ،قۋانتتى. باسپانالى بولعان انا وبلىس اكىمىنە العىسىن جەتكىزىپ، ريزاشىلىعىن ءبىلدىردى.

قابىلداۋعا  كەلگەن ءبىر توپ اقساقالدار سىرداريا اۋدانى، ايدارلى اۋىلىنداعى اياق سۋ ماسەلەسى جانە كانالداردىڭ قوقىسقا تولىپ، تازالانباي تۇرعانىن كوتەردى. قۋانىشبەك دوسمايىلۇلى كەلەسى جىلى ەگىن ماۋسىمىنا دەيىن كانالداردى تازالاپ، اياق سۋ جەتكىزۋ ماسەلەسىن شەشۋدى جاۋاپتى سالا باسشىلارىنا تاپسىردى.

جەكە ماسەلە عانا ەمەس، تۇگەل اۋىلىنىڭ، وبلىس ورتالىعىندا ءوزى تۇراتىن شاعىن  اۋدان، كوشەلەرىنىڭ ماسەلەسىن كوتەرىپ قوعامدىق احۋالدى ايتقان ازاماتتار دا سۇراقتارىنا جاۋاپ الدى.

وبلىس اكىمىنىڭ قاتىسۋىمەن  ءدال وسىنداي قابىلداۋلار الداعى ۋاقىتتا دا وتكىزىلەتىن بولادى.

Abai.kz

0 پىكىر