رەسەيدىڭ تۇمەن وبلىسى، ۋپوروۆو اۋىلىندا قازاق سىنىبى اشىلدى. ازىرگە بۇل سىنىپ قازاق ءتىلى مەن مادەنيەتىن ۇيرەتەدى. ال، الداعى ۋاقىتتا ول ءۇشىن ارنايى عيمارات بەرىلمەك. بۇل تۋرالى قازاقستاننىڭ رەسەيدەگى ەلشىلىگى حابارلادى. 

-ۋپوروۆوداعى قازاق سىنىبى – وبلىس ورتالىعىن ساناماعاندا، وبلىس اۋداندارىنداعى جاڭالىقتىڭ العاشقى جارشىسى. اتا-انالار بالالارىن اپتاسىنا ەكى رەت ساباققا اپارادى. اۋداننىڭ بارلىق اۋىلى اۋدان ورتالىعىنان الىس ەمەس. ۇستاز – قازاقستاندا پەداگوگيكالىق ءبىلىم العان  كاسىبي مۇعالىم مايرامگۇل احمەتقاليقىزى ايتقوجەنوۆا, - دەپ حابارلادى ەلشىلىك.

قازىر سىنىپتا وبلىستىڭ ءارتۇرلى ەلدى مەكەندەرىنەن كەلەتىن 25 وقۋشى بار، دەيدى قازاقستاننىڭ رەسەيدەگى ەلشىلىگى.

ءوڭىر باسشىسى لەونيد ساۋكوۆ بالالارعا ساتتىلىك تىلەپ، ادىستەمەلىك وقۋ ادەبيەتتەرىن الۋعا سىيلىق سەرتيفيكات تابىس ەتتى.

سىنىپتىڭ اشىلۋىنا تۇمەن وبلىسى قازاقتارىنىڭ ۇلتتىق مادەني اۆتونومياسىنىڭ توراعاسى ەسەنعاليا يبراەۆانىڭ اتىنان وبلىستىق قازاقتار اۆتونومياسى كەڭەسى قارجىلاي قولداۋ كورسەتتى.

قازاق سىنىبى ۋاقىتشا پاتريوتتىق وداقتىڭ وقۋ سىنىبىندا شۇعىلدانا تۇرادى. كوپ ۇزاماي اۋدان باسشىلىعى سىنىپ ءۇشىن جەكە بولمە بولەدى، ال ۇيىمداستىرۋشىلار ونى قازاق ءتىلى مەن مادەنيەتى سىنىبى رەتىندە جاقسىلاپ بەزەندىرۋگە ۋادە بەردى.

-قازاق سىنىبىن ۇيىمداستىرۋشىلاردىڭ قاتارىندا ۋپوروۆ اۋدانىنىڭ اكىمشىلىگىمەن قاتار، ىشكى ىستەر مينيسترلىگىنىڭ وتستاۆكاداعى پولكوۆنيگى تولەگەن قۇدايبەرگەنوۆ باسقاراتىن تيۋمەن وبلىسى قازاقتارىنىڭ اۆتونومياسى –ۋپوروۆ پاتريوتتىق وداعى دا بار، - دەپ ناقتىلادى ەلشىلىك.

اۋدانداعى ەكىنشى قازاق سىنىبىن ەكى مىڭنان استام قازاق تۇراتىن گولىشمانوۆ اۋدانىندا اشۋ جوسپارلانۋدا.

Abai.kz