كوك اسپاندا كۇن كوتەرگەن قىرانىمىز ماڭگىلىك امان بولعاي.
سول قاسيەتتى قىرانىمىزدىڭ كۇن استىنا قانات جايعانىنا جيىرما التى جىلعا تاياعانىندا تاعى ءبىر قىران پايدا بولدى. ونى دا ۇلكەن كىسى ءوز قولىمەن ۇشىردى. ءمانى مەن ماعىناسى تەرەڭ قۇجاتتىڭ ءماتىنىنىڭ استىنا ن.ناز دەپ بارىپ، سوڭعى جاعىن شيماقتاپ كەپ جىبەرگەندە ءتۇرلى-ءتۇستى قاناتتى قىران اپپاق وردانىڭ شاڭىراعىنان قانات قاقتى. بىرتە-بىرتە كوتەرىلسە دە بولار ەدى، بىردەن قيعاش تارتتى. كادىمگى اۋەجايدان كوتەرىلگەن ۇشاق سىندى بىردەن بيىككە كوتەرىلدى. ارقالاعان اماناتى اۋەلگى قىراندىكىندەي بولماسا دا، ءبىرشاما سالماقتى ەدى. وسى ۇشقانى ۇشقان دەدىك، قىزىعا قاراپ تۇرىپ. بۇل ەندى قونار بولسا ۇلگەن-ۇلكەن تۇعىرلارعا عانا قونادى دەپ ويلادىق. قايدام. وبلىستارداعى، اۋداندارداعى ءىرىلى-ۇساقتى باسشىلار بۇ بايعۇستى ءار جەرگە قوندىراتىندى شىعاردى.

قايبىر كۇنى الىس اۋداننىڭ تۇكپىرىندەگى ءبىر اۋىلعا جولىم ءتۇستى. شىلىم الايىن دەگەنىم، الدە، ءشول باسارعا سۋسىن الايىن دەگەنىم ەستە جوق، ايتەۋىر ءبىر سەبەپپەن اۋىل ورتالىعىنداعى دۇكەننىڭ الدىنا توقتادىم. دۇكەننىڭ الدىنداعى قورشاۋدان الاباجاق بايعۇستى كەزدەستىرىپ قالدىم. ءمانسىز انىنە ءنارسىز ءماتىن جازىپ الىپ شاۋىپ جۇرگەن جاس بالانىڭ ءان كەشىنىڭ قاشان، قايدا وتەتىنىنەن حابار بەرەتىن افيشانىڭ جوعارى تۇسىنا قوندىرعان ەكەن. اياپ كەتتىم. نەگە ءبىز بۇ بايعۇستى كورىنگەن جەرگە جاپسىرا بەرەمىز. قانى توگىلىپ تۇرعان، ىستىعى باسىلماعان ەتتى عانا جەيتىن قىرانعا ارپا-بيداي شاشىپ جۇرگەننەن ساۋ ەمەسپىز بە؟

ايتەۋىر، وتىن جارىپ، سۋ اكەلسەك تە، اس ءىشىپ بولعاسىن جارىمىزدىڭ جانىنا جاتا كەتسەك تە، ءبارى رۋحاني جاڭعىرۋ باعدارلاماسى اياسىندا ىسكە اساتىن بولىپتى. جاڭعىرۋدان كورى، شاما-شارقىمىزشا جاڭعىرىپ جاتىرمىز دەگەن ەسەپ ايتەۋىر.

ايتپەسە، جاڭعىرۋ دەگەنىڭىز ەسى كەتكەن ەستراداعا ەلىگە بەرمەي، ءبىر ۋاق ەسىڭدى جيىپ، ەتەگىڭدى جاۋىپ، ءتول ونەرىڭە تامىر تارتۋ ەمەس پە؟.

جاراسحانشا ايتساق، «گازەت-جۋرنالدى پاراقتاساق تا، تەلەديداردى قاراپ قالساق تا» وسى بايعۇس ۇشىپ جۇرەدى، الاوكپە بولىپ. تاڭدا كيىنبەك بولىپ شيفونەردىڭ ەسىگىن، تۇستە قارىن اشا قالسا تاماقتانباق بولىپ توڭازىتقىشتىڭ ەسىگىن اشساق تا، ابايلاپ اشاتىن بولدىق. اشقان بەتتە وسى ءبىر الاقانات قۇس ۇشىپ شىعارداي سەزىنەسىڭ.

بۇ بايعۇستى اندا دا ۇشىردىق، مىندا دا ۇشىردىق. ەندى اۋەلى ءوزىمىز، سودان كەيىن بارىپ جان-جاعىمىزعا قارايىقشى. قانشالىقتى جاڭعىردىق؟ وزگەنى بىلمەدىم، ءوزىم ۇياتتىمىن. الدە بارىنەن كەش قالىپ جۇرەتىن ءوزىمنىڭ ەنجارلىعىم كىنالى مە؟ ۋا، جاميعات، جاڭعىرعاندارىڭ بولسا ايتا وتىرىڭدار. ايتەۋىر جارتاستار عانا جاڭعىرىپ جاتپاسىن.

بەيبىت سارىبايدىڭ facebook پاراقشاسىنان

Abai.kz